Matthew 1

Ha Listaan Cha Singgalak Kan Jesus

(Luk. 3:23-28)

1Allaya listaan cha lampeɏpuwan Jesu Kristu un galak Ari David ya galak bo Abraham. 2Si Abraham chi aman Isaac, ked si Isaac chi aman Jacob, ked si Jacob chi aman cha Judah ya cha susuludla. 3Si Judah chi aman cha Perez kan Zera, ked si Tamar chi ilacha, si Perez chi aman Hezron ked si Hezron chi aman Ram, 4Si Ram chi aman Amminadab ked si Amminadab chi aman Nahshon un aman Salmon 5Si Salmon chi aman Boaz ked si Rahab chi ilala. Ha alak cha Boaz kan Ruth ked si Obed, ked siya aman Jesse. 6Si Jesse chi aman Ari David. Si Ari David chi aman Solomon ked si Bathseba ilala un sigud un asawan Uriah. 7Si Solomon chi aman Rehoboam, si Rehoboam chi aman Abijah, si Abijah chi aman Asa. 8Si Asa chi aman Jehoshaphat. Si Jehoshaphat chi aman Joram. Si Joram chi aman Uzziah. 9Uzziah chi aman Jotham. Si Jotham chi aman Ahaz. Ked si Ahaz aman Hezekiah. 10Si Hezekiah chi aman Manasseh, ked si Manasseh chi aman Amos ked si Amos chi aman Josiah. 11Si Josiah chi aman cha Jechoniah ya cha susuludla. Hachi timpu un langitallayancha kan cha iyIsrael ud Babylon.

12Libuwas pu litallayan cha iyIsrael ud Babylon, liyalak si Shealtiel un alak Jechoniah. Si Shealtiel chi aman Zerubabel. 13Si Zerubabel chi aman Abiud, si Abiud chi aman Elliakim ked si Elliakim chi aman Azor. 14Si Azor chi aman Zadok ked si Zadok chi aman Achim ked si Achim chi aman Eliud. 15Si Eliud chi aman Eleazar ked si Eleazar chi aman Matthan ked si Matthan chi aman Jacob. 16Si Jacob chi aman Joseph, un asawan Mary un langiyalak kan Jesus un ngadloncha Kristu.

17Umoy un lasawaɏan si opat un lolap malipud kan Abraham inggala kan David ked lasawaɏan bo si opat un lolap malipud kan David inggala si timpuʼn langitallayancha kan cha iyIsrael ud Babylon ya lasawaɏan bo si opat un lolap malipud si illinggewancha ud Babilonia inggala si liyalakan Kristu.#1:17 Ha Kristu si Greek ya Messias si Hebrew piolaʼn uguchon ha lachutukan.

Ha Liyalakan Jesu Kristu

(Luk. 2:1-7)

18Kamatla kauguchen chi liyalakan Jesus un kalanchaʼn Kristu. Si Mary un ilala liyabyeyan kan Joseph ngim sakbyey un manchapatcha, ladlaw Mary un labugi siya mipagapu si kilabyelin chi Ispiritun Apudyus. 19Gapu ta lalintog un tagu si Joseph un liyasaw-ala, achipunla pion un mikiteg si Mary ot pilanggoplaʼn isila siya un lappun makaagammu.#1:19 Ha ugalin cha Judio lu awed miyabyeyan un mangasawa si byebyeɏasang, mibilang un asawala. Lu awed makwa ked simsimmokla un achipunla ituɏuy, masapuɏ mangtod si kasuɏatan un mampaloklok un ichangala siya. Masapuɏ bo chuwaʼn sistigu. 20Si lalomsomsomkalad chi alla, kakma lampaila anghel Apudyus kan siya si in-ilop ot kalala, “Joseph, un galak Ari David, achika mangkossa un mangasawa kan Mary, ti halat un bugila ked mipagapu si kilabyelin chi Ispiritun Apudyus. 21Iyalakla leɏaki ked ngadlonyu siya Jesus, ti siya Malagu kan cha tagula kan cha byasbyasuɏcha.”

22Lakwa cha laoy ta matungpeɏ ugud Apudyus un inggilin cha propetala, un kalala: 23“Mabugi osaʼn byebyai un chaampun makaobog si leɏaki ked iyalakla leɏaki un ingachencha Emmanuel”#1:23 Isaiah 7:14 piolaʼn uguchon, “Awed si Apudyus kan chitaku.”

24Bummangon pun si Joseph, tiluttuwala imbilin chi anghel Apudyus kan siya ot ilasawala si Mary. 25Ngim achipunla yan kilaobog inggalà inyalak Mary leɏaki ot lingachalan Joseph siyà Jesus.

Atualmente Selecionado:

Matthew 1: HUA

Destaque

Copiar