Juan 17
17
Nagpangamuyo si Jesus para sa Iya mga Gintuton-an
1Sang makasiling si Jesus sini nga mga pulong, nagtangla sia sa langit kag nagsiling, “O Amay, ang tion nag-abot na. Ipakita sa mga tawo nga ang imo Anak makatilingala agod akon ipakita kon daw ano ka makatilingala sa imo. 2Kay ginhatagan mo sia sing awtoridad sa paggahom sang tanan nga mga tawo, agod nga mahatagan niya sing kabuhi nga wala sing katapusan ang tanan nga ginhatag mo sa iya. 3Kag#Klm. Sol. 15:3. amo ini ang kabuhi nga wala sing katapusan, nga ang mga tawo magkilala sa imo, nga ikaw lamang ang matuod nga Dios, kag sila magkilala kay Jesu-Cristo nga imo ginpadala. 4Ginpasidunggan ko ikaw sa duta paagi sang natapos ko na nga bulohaton nga imo ginhatag sa akon nga himuon. 5Karon, O Amay, sa imo atubang pasidunggi ako, ang amo nga kadungganan nga akon man anay upod sa imo, sa wala pa matuga ang kalibutan.
6“Ginpahayag ko ang imo ngalan sa mga tawo nga ginhatag mo sa akon halin sa kalibutan. Imo sila, kag ginhatag mo sila sa akon, kag gintuman nila ang imo pulong. 7Karon nakahibalo sila nga ang tanan nga ginhatag mo sa akon naghalin sa imo. 8Kay ginhatag ko sa ila ang mensahe nga imo ginhatag sa akon, kag ginbaton nila ini. Nahibaluan nila nga matuod gid nga ako naghalin sa imo, kag nagatuo sila nga ikaw nagpadala sa akon.
9“Ako nagapangamuyo para sa ila. Wala ako nagapangamuyo para sa kalibutan, kundi para sa ila nga ginhatag mo sa akon, kay imo sila. 10Ang tanan nga akon imo kag ang tanan nga imo akon, kag ang akon pagkamakatilingala ginapahayag paagi sa ila. 11Kag karon magakadto ako sa imo, ako wala na sa kalibutan, pero sila yara pa sa kalibutan. O balaan nga Amay! Paagi sa gahom sang imo ngalan bantayi sila nga ginhatag mo sa akon,#17:11 Paagi sa gahom sang imo ngalan bantayi sila nga ginhatag mo sa akon: Ang iban nga mga manuskritoBantayi sila paagi sa gahom sang imo ngalan, ang ngalan nga imo ginhatag sa akon. agod mangin-isa sila subong nga ikaw kag ako isa. 12Sang#Sal. 41:9; Juan 13:18. ako kaupod pa nila, ginbantayan ko sila paagi sa gahom sang imo ngalan nga ginhatag mo sa akon.#17:12 ginbantayan ko sila paagi sa gahom sang imo ngalan nga ginhatag mo sa akon: Ang iban nga mga manuskrito maypaagi sa gahom sang imo ngalan ginbantayan ko sila nga imo ginhatag sa akon. Ginbantayan ko sila, kag wala sing isa sa ila nga nadula, luas sa tawo nga madula gid man agod matuman ang kasulatan. 13Pero karon magakadto ako sa imo kag ginasiling ko ini nga mga butang sa kalibutan, agod maangkon nila sing bug-os sa ila mga tagipusoon ang akon kalipay. 14Ako ang nagpaalinton sa ila sang imo pulong, kag gindumtan sila sang kalibutan, tungod kay indi sila iya sang kalibutan, subong nga ako man indi iya sang kalibutan. 15Wala ako nagapangayo nga kuhaon mo sila sa kalibutan, kundi nga apinan mo sila batok sa Malaut. 16Subong nga ako indi iya sang kalibutan, sila man indi iya sang kalibutan. 17Pakabalaana sila paagi sa kamatuoran; ang imo pulong kamatuoran. 18Ginpadala ko sila sa kalibutan subong nga ginpadala mo ako sa kalibutan. 19Kag tungod sa ila ginahalad ko ang akon kaugalingon sa imo, agod nga mahalad man sila paagi sa kamatuoran.
20“Ako nagapangamuyo indi lamang para sa ila, kundi para man sa mga nagatuo sa akon paagi sa ila mga pulong. 21Nagapangamuyo ako nga sila tanan mangin-isa. O Amay, kabay nga sila manginyari sa aton, subong nga ikaw yari sa akon kag ako yara sa imo. Kabay nga mangin-isa sila, agod nga ang kalibutan magtuo nga ikaw nagpadala sa akon. 22Ako naghatag sa ila sang kadungganan nga ginhatag mo man sa akon, agod sila mangin-isa, subong nga ikaw kag ako isa. 23Ako yara sa ila kag ikaw yari sa akon, agod mangin-isa sila sing bug-os, kag agod nga ang kalibutan makakilala nga ikaw ang nagpadala sa akon kag nagahigugma sa ila subong sang imo paghigugma sa akon.
24“O Amay, ginhatag mo sila sa akon, kag luyag ko nga sila man manginkaupod nakon bisan diin ako, agod nga makita nila ang akon kadungganan, ang kadungganan nga ginhatag mo sa akon. Kay ikaw naghigugma sa akon sa wala pa matuga ang kalibutan. 25O matarong nga Amay, ang kalibutan wala makakilala sa imo, pero ako nakakilala sa imo, kag ini sila nakahibalo nga ikaw ang nagpadala sa akon. 26Ginpahayag ko sa ila ang imo ngalan kag magapadayon ako sa paghimo sini, agod ang imo paghigugma sa akon manginyara sa ila, kag agod nga ako man manginyara sa ila.”
Atualmente Selecionado:
Juan 17: MBBHIL12
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Maayong Balita nga Biblia © Philippine Bible Society, 2012
