Cäk 8
8
Thök amool
1Ku Nhialic akën nɔm määr në Nowa, kekë ka nu abëlic në yen ë tök kedhie. Go Nhialic yom tɔ put në piny nɔm, go pïïu dëu cak. 2Go kuɛɛr ë tul ë pïïu keyiic thiöök, ku thiök tënhial e yic, ku kääc deŋ në tuɛny. 3Ku ŋoot pïïu ke ke lɔ piny. Ku në thök ë bɔt ë nïn ku thiërdhïc, ke pïïu ë ke jɔ dëu. 4Ku në kööl ë ye pɛɛi ye pɛ̈i dhorou thok thiëër ku dhorou, ke abël ë jak kur nïïm, kur ke kuur cɔl Ararat. 5Ku ŋoot pïïu ke ke dëu agut en cï pɛɛi ë ye pɛ̈i thiëër. Ku në kööl tueŋ de pɛɛi ë ye pɛ̈i thiëër, ke kur ë ke jɔ bɛ̈n tïŋ nïïm.
6Ku në thök ë nïn kathiërŋuan, ke Nowa ë liep awëërnyin, awër wään cï luöi abël. 7Ku tooc gaak biic. Go gaak lɔ tɔ̈u ke pär nhial ëtɛ̈ɛ̈n, agut të bï pïïu dëu në piny nɔm ëbɛ̈n. 8Go Nowa guuk bɛ lɔ̈ɔ̈k tuɔɔc piny, bï pïïu bɛ̈n tïŋ na cïk dëu ë piny nɔm. 9Go guuk ciën të yök, të tɛ̈ɛ̈u en e cök thïn. Go yenɔm puɔ̈k Nowa abëlic, në luɔi ë ŋoot ë pïïu ë piny nɔm ëbɛ̈n. Go Nowa yecin ɣɔ̈ɔ̈k bei, ku dɔm leer abëlic të nu yen thïn. 10Ku be tïït në nïn kɔ̈k kadhorou, ku be nyɔk ë tooc en guuk biic ke nu ë abëlic. 11Go guuk enɔm lɔ dɔk ɣɔn thëën, ke muk yïny ë tim de olip ë piac luɔk në yethok, yïny tɔ̈c. Ago Nowa ŋic nɔn cï pïïu dëu në piny nɔm. 12Ku be Nowa ŋoot ke be tïït në nïn kɔ̈kiic kadhorou, ku be guuk tuɔɔc piny. Go guuk enɔm kɛ̈n bɛ lɔ puɔ̈k en.
13Na ɣɔn, aacï run ke Nowa aa bot kadhetem ku tök, ku në kööl tueŋ ë pɛɛi tueŋ, pïïu aake cï jɔ dëu ëbɛ̈n në piny nɔm. Go Nowa akum abël nɔm nyaai, ku woi piny nɔm ëbɛ̈n. Go yök ke cï nɔm koth. 14Ku në pɛɛi ë ye pɛ̈i rou, kööl ë yen thok thiërrou ku dhorou, ke piny ë jɔ nɔm riɛl.
15Ago Nhialic lɛ̈k Nowa an, 16“Lɔ biic abëlic wekë tiiŋdu, ku wɛ̈ɛ̈tku, ku diäär ke wɛ̈ɛ̈tku. 17Ku bɛ̈ɛ̈iyë kapïr tɔ̈u në yïn bei kedhie. Kapïr ëbɛ̈n, diɛt ku läi, ku ka ye mol piny në keyöth, bïk röt lɔ dhiëëth në piny nɔm, ku bïk piny lɔ thiɔ̈ɔ̈ŋ nɔm.” 18Go Nowa lɔ biic kekë wɛ̈ɛ̈tke, ku tiiŋde ku diäär ke wɛ̈ɛ̈tke. 19Ku këriëëc ee cath piny ëbɛ̈n acïk bɛ̈n bɛ̈n bei në abëlic kedhie ke ke cï kenyïïn kuany: läi kedhie, ku ka ye mol në keyöth, ku diɛt.
Nowa ë Nhialic näk
20Go Nowa Bɛ̈nydït yiëk yïk, ku nööm läi piɛth nyïïn ëbɛ̈n, läi duëërë ke näk Nhialic, ku nööm diɛt piɛth nyïïn ëbɛ̈n, diɛt duëërë ke näk Nhialic, ku gɛm miɔ̈c ye nyop ëbɛ̈n në yïk nɔm. 21Go Bɛ̈nydït piɔ̈u miɛt në luɔi cï En atuɔ̈m ŋöör. Go lueel në yepiɔ̈u an, “Yɛn cï piny bï bɛ cieen nɔm, në biäk ë karɛɛc ye raan looi. Na cakaa nɔn ye täŋ ë raan piɔ̈u kërac ë cieŋ ë yen meth, Yɛn cïï piny bï bɛ nyɔk ë riääk Ɛn kë tɔ̈u thïn cït man cän e riɔ̈ɔ̈kë. 22Agut të bï piny nɔm lɔ, abï dɛ akööl ke cum, ku akööl ke tëm, ku acïkï kɔ̈ɔ̈th bï bɛ tɛɛm, ayï akööl ke liɛɛr, ku akööl ke tuöc, ku mɔ̈i ayï rut, aköl ku wakɔ̈u, kakë kedhie acïkï kɔ̈ɔ̈th bï bɛ tɛɛm ananden.”
Atualmente Selecionado:
Cäk 8: dip-JPB
Destaque
Compartilhar
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fpt.png&w=128&q=75)
Quer salvar seus destaques em todos os seus dispositivos? Cadastre-se ou faça o login
The Bible in Jieeng de Padang © The Bible Society in South Sudan, 2011.