މަންދޫބުންގެ މަސައްކަތް 15

ޖެރޫސަލަމުގައި ބޭއްވުނު ބައްދަލުވުން

1ޕައުލް އާއި ބަރުނައްބާސް އަންތީޔޮކުގައި ވަނިކޮށް ޖުދެއާއިން ބަނީއިސްރާއީލުގެ އީސާގެފާނަށް އީމާންވެގެންވީ ބަޔަކު އެ ރަށަށް އައެވެ. އަދި އެ ރަށުގައިވާ އީސާގެފާނަށް އީމާންވެގެން ތިބި މީހުން ގާތުގައި މިމީހުން ބުންޏެވެ. ”⁠މޫސާގެފާނަށް މާތްރަސްކަލާނގެ އަމުރުކުރެއްވި ފަދައިން ޚިތާނު ނުކުރެވޭ މީހުންނަކަށް ދިންނެވުމެއް ނުލިބޭނެ.⁠“ 2ނަމަވެސް ޕައުލް އާއި ބަރުނައްބާސް މި ކަމާއި މުޅިން ދެކޮޅުހަދާ އެމީހުންނާ ބަހުސް ކުރިއެވެ. ދެން އަންތީޔޮކުގެ އީސާގެފާނަށް އީމާންވެގެންވީ މީހުންގެ ޖަމާޢަތުން ނިންމީ ޕައުލް އާއި ބަރުނައްބާސް އާއި އަދި އެހެން ވެސް އިތުރު ބަޔަކާ ޖެރޫސަލަމަށް ފޮނުވުމަށެވެ. އެއީ އެމީހުން އީސާގެފާނުގެ މަންދޫބުންނާއި އަދި ޖެރޫސަލަމުގެ އީސާގެފާނަށް އީމާންވެގެން ތިބި މީހުންގެ ޖަމާޢަތުގެ ބޮޑުންނާ މި ކަމާ ބެހޭ ގޮތުން އިތުރަށް ވާހަކަދެއްކުމަށްޓަކައެވެ. 3އީސާގެފާނުގެ ޖަމާޢަތުގެ މީހުން މި ވަފުދު ޖެރޫސަލަމަށް ފޮނުވުމުގެ ދަތުރުގެ ހުރިހާކަމެއް ހަމަޖައްސާދިނެވެ. މިމީހުން ފެނީސިޔާއާއި ސަމީރިއްޔާގެ ތެރެއިން ދަތުރުކޮށް ދިޔަމަގުމަތީ ބަނީއިސްރާއީލު މީހުން ނޫން މީހުން މާތްރަސްކަލާނގެ ކިބަފުޅަށް އީމާންވަމުން ދާ ކަމުގެ ޚަބަރުތައް ދެމުން ދިޔައެވެ. މި ޚަބަރު ލިބުމުން އީސާގެފާނަށް އީމާންވެގެންވީ މީހުންގެ ހިތްތައް އުފަލުން ފުރުނެވެ.

4އެމީހުންނަށް ޖެރޫސަލަމަށް އާދެވުމުން އީސާގެފާނުގެ މަންދޫބުންނާ، އީސާގެފާނަށް އީމާންވެގެންވީ މީހުންގެ ޖަމާޢަތުގެ ބޮޑުންނާ، އަދި އެ ޖަމާޢަތުގެ އެންމެން އެމީހުންނަށް ވަރަށް ހެޔޮކޮށް ކަންކުރިއެވެ. އަދި އެމީހުންގެ ދަތުރުގައި މާތްރަސްކަލާނގެ އެމީހުން މެދުވެރިކޮށް ކުރެއްވި ހުރިހާ ކަމެއްގެ ވާހަކަތައް ތަފްސީލުކޮށް ކިޔާދިނެވެ. 5އީސާގެފާނަށް އީމާންވެގެންވީ ފަރީސީނުގެ ބަޔަކު ވެސް އެތާނގައިވިއެވެ. މި ބައިމީހުން ބުންޏެވެ. ”⁠ބަނީއިސްރާއީލު މީހުން ފިޔަވާ އެހެން އީސާގެފާނަށް އީމާންވެގެންވާ މީހުންނަށް މޫސާގެފާނަށް މާތްރަސްކަލާނގެ އެންގެވި ގަވާއިދުތަކަށް ކަންތައްކޮށް އަދި ޚިތާނު ކުރުމަށް ވެސް އަންގަން ޖެހޭނެއޭ.⁠“ 6ދެން އީސާގެފާނުގެ މަންދޫބުންނާއި އީސާގެފާނަށް އީމާންވެގެންވީ ޖަމާޢަތުގެ ބޮޑުންނާއި އެއްވުމެއް ބާވާ މި ކަމާބެހޭ ގޮތުން ވާހަކަދެއްކިއެވެ. 7އެތައް އިރަކު މި ކަމާއި ބެހޭ ގޮތުން އެމީހުންގެ މެދުގައި ވާހަކަ ދެކެވުނެވެ. ދެން ޕަތަރަސް ތެދުވެ އެމީހުންނާއި މުޚާޠަބުކޮށް ވާހަކަދެއްކިއެވެ. އޭނާ ބުންޏެވެ. ”⁠އެންމެ ހާ އަޚުންނޭ، ތިޔަބައިމީހުންނަށް ވެސް އެނގޭނެ ފަދައިން އެންމެ ކުރީކޮޅުން ފެށިގެން މާތްރަސްކަލާނގެ ބަނީއިސްރާއީލު މީހުން ނޫން އެހެންމީހުންނަށް ހެޔޮޚަބަރުފުޅު ދެއްވުމަށް ތިޔަބައިމީހުންގެ ތެރެއިން އަހަރެން ހޮއްވެވި. އަދި އެބައިމީހުންނަށް އަހަރެން އެ ޚަބަރުފުޅު ދިނިން. އެ ޚަބަރުފުޅުގެ އަޑުއަހާ އެމީހުން އީމާންވި. 8ދެން އެންމެންގެ ވެސް ހިތުގެއަޑި ދެނެވޮޑިގެންވާ މާތްރަސްކަލާނގެ އެބައިމީހުންގެ އީމާންކަން ދެނެވޮޑިގެން ވާކަން ފާޅުކުރެއްވި. އެކަލާނގެ މާތްރޫޙުފުޅު ހަމަ އަހަރެމެންނަށް ވެސް ދެއްވި ފަދައިން އެ ރޫޙުފުޅު އެމީހުންނަށް ވެސް ދެއްވާ އެކަލާނގެ މި ކަން ހާމަކުރެއްވި. 9މާތްރަސްކަލާނގެ އެމީހުންނާ ދޭތެރޭ ވެސް ކަން ކުރެއްވީ ހަމަ އަހަރެމެން ބަނީއިސްރާއީލު މީހުންގެ ތެރެއިން ވެސް އީމާންވި މީހުންނާ މެދު ކަން ކުރެއްވި ފަދައިން. އެއީ އެމީހުން ވެސް އެކަލާނގެ ކިބަފުޅަށް އިތުބާރުކޮށް އީމާންވުމުން މާތްރަސްކަލާނގެ އެމީހުންގެ ހިތްތަށް ވެސް ސާފުތާހިރު ކޮށްދެއްވި. 10މި ފަދައިން ކަންތައް ހުރި އިރު މިހާރު އަނެއްކާ ތިޔަބައިމީހުން ބަނީއިސްރާއީލު މީހުން ނޫން އެހެން އީސާގެފާނަށް އީމާންވެގެން ތިބި މީހުންގެ ކަރުގައި މި ފަދަ ބަރުދަނެއް އަޅުވާ މާތްރަސްކަލާނގެ ކޯފާ ލިބިގަތުމަށް ތިޔަ އުޅެނީ އަޅެ ކީއްވެ؟ ތިޔަ ބަރުދަނަކީ އަހަރެމެންގެ ކާބަފައިންނަށް ވެސް އަދި އަހަރެމެންނަށް ވެސް އުފުލިފައި ނުވާ ބަރުދަނެއް ނޫންތަ؟ 11ނަމަވެސް މިހާރު އަހަރެމެން ވެސް އަދި އެމީހުން ވެސް ދިންނެވިފައި މި ވަނީ މާތްރަސްކަލާނގެ އީސާގެފާނު މެދުވެރިކޮށް ދެއްވި މަތިވެރި ނިޢުމަތްފުޅުގެ ސަބަބުންކަން އަހަރެމެން އެނގި ގަބޫލު ކުރަން.⁠“

12ދެން މި ކަންތައްތަކާ ކުރެވެމުން ދިޔަ ބަހުސް ހުއްޓި އެންމެން ހަމަހިމޭންވެ ޕައުލް އާއި ބަރުނައްބާސް މެދުވެރިކޮށް މާތްރަސްކަލާނގެ ބަނީއިސްރާއީލު މީހުން ނޫން މީސްތަކުންގެ މެދުގައި ދެއްކެވި މުޢުޖިޒާތްތަކާ ހައިރާން ކުރުވަނިވި ކަންތައްތަކުގެ ވާހަކަތައް އަޑު އެހިއެވެ. 13އެމީހުންގެ ވާހަކަ ނިމުމުން ޔާމިޒު ވާހަކަދައްކާ އެމީހުންނަށް ބުންޏެވެ. ”⁠އެންމެ ހާ އަޚުންނޭ، އަޑުއަހާ.#15‏:13 މި ޔާމިޒު އަކީ ބާރަ ޚާއްސަ މަންދޫބުންގެ ތެރެއިން އެކަކު ކަމުގައި އީސާގެފާނު ހޮއްވެވި ޔާމިޒުއެއް ނޫނެވެ. އެ ޔާމިޒު ވަނީ މީގެ ދެތިން އަހަރު ކުރިން ހެރޮދު ރަސްގެފާނުގެ އަމުރަށް މަރާލެވިފައެވެ. މި ޔާމިޒު އަކީ އީސާގެފާނުގެ ކޮއްކޯފުޅެއް ކަމުގައިވާ ޔާމިޒުއެވެ. މީނާއަކީ މިހާރު ބަނީއިސްރާއީލު މީހުންގެ ތެރެއިން އީސާގެފާނަށް އީމާންވެގެން ތިބި ޖެރޫސަލަމުގެ ޖަމާޢަތުގެ ވެރިއަކަށް ހުރި މީހާއެވެ. 14ސިމިޔާނު ޕަތަރަސް ހަމަދެންމެ އަހަރެމެންނަށް އެ ކިޔާ ދިނީ އެންމެ ފުރަތަމަ ފަހަރު މާތްރަސްކަލާނގެ އެކަލާނގެ ލޯބިފުޅު ބަނީއިސްރާއީލު މީހުން ނޫން އެހެން މީހުންނަށް ދައްކަވާ، އެމީހުން ވެސް އެއީ އެކަލާނގެ މީސްތަކުންގެ ތެރެއިން ވާ ބަޔަކު ކަމުގައި ލެއްވި ގޮތުގެ ވާހަކަ. އެންމެފުރަތަމަ ފަހަރަށް މާތްރަސްކަލާނގެ ބަނީއިސްރާއީލު މީހުން ފިޔަވާ އެހެން މީހުންގެ ތެރެއިން ބަޔަކު އެކަލާނގެ މީސްތަކުންގެ ގޮތުގައި އެކަލާނގެ ހޮއްވަވައިފި. 15ނަބީބޭކަލުން އެބޭކަލުންގެ ލިޔުއްވުންތަކުގައި ލިޔުއްވި ބަސްފުޅުތަކާ މިހާރު މި ވަމުން ދާ ކަންތައްތަކާއި މުޅިން އެއްގޮތް. އެއީ ލިޔެވިގެންވި:

16’⁠މާތްސާހިބުވަންތަ ރަސްކަލާނގެ ވަޙީކުރެއްވިއޭ. މިއަށް ފަހު ތިމަންކަލާނގެ އެނބުރި އަންނާނަމޭ. އަދި ދާއޫދުގެފާނުގެ ނެތިގެން ގޮސްފައިވާ ރަސްކަން އާކުރައްވާނަމޭ. އެ ރަސްކަމުގެ ވީރާނާވެފައިވާ ބައިތައް ތިމަންކަލާނގެ އަލުން އާކުރައްވާ ވަރުގަދަ ކުރައްވާނަމޭ. 17ދެން އޭރުން ދުނިޔޭގެ އެހެން ޤައުމުތައް ވެސް ތިމަންކަލާނގެ ކިބަފުޅަށް އެނބުރޭނޭ. އަދި އޭރުން އެމީހުން ވާނީ ތިމަންކަލާނގެ ޚާއްސަކުރެއްވި ތިމަންކަލާނގެ މީސްތަކުންނަށޭ. މިއީ ތިމަންކަލާނގެ ބަސްފުޅޭ. 18މިއީ އެތައް ޒަމާނެއްގެ ކުރިން ތިމަންކަލާނގެ ކުރެއްވި ވަޢުދުފުޅެކޭ.⁠‘⁠“

19ޔާމިޒު ވާހަކަ ކުރިއަށް ގެންދަމުން ބުންޏެވެ. ”⁠އެންމެ ހާ އަޚުންނޭ، ވީމާއި އަހަރެންނަށް ފެންނަ ގޮތަކީ އީސާގެފާނަށް އީމާންވެގެންތިބި ބަނީއިސްރާއީލު މީހުން ނޫން މީހުންގެ ކޮނޑުގައި ބުރަތައް ނާޅުވާ އެމީހުންނަށް އުނދަގޫ ނުކުރުން. 20އޭގެ ބަދަލުގައި އަހަރެންނަށް ފެންނަނީ އަހަރެމެން އެމީހުންނަށް ސިޓީއެއް ލިޔެ މި ފަދައިން އެންގުމަށް. އެއީ އެމީހުން އެއްވެސް ކަލާނގެއަކަށް ޤުރުބާންކޮށް ހުށައަޅާފައިވާ ކާއެއްޗެހި ނުކެއުމަށާއި އަދި ކަރުއަނބުރާ މަރާލެވޭ ޖަނަވާރުތަކުގެ މަސް ނުކެއުމަށާ އަދި އެއްވެސް ޖަނަވާރެއްގެ ލޭ ނުބުއިމަށާއި އެއްވެސް ކަހަލަ ޖިންސީ ފާފައެއް ނުކުރުމަށް އެންގުމަށް. 21އެއީ މާތްރަސްކަލާނގެ މޫސާގެފާނަށް އެންގެވި ގަވާއިދުތަކާއި ޤާނޫނުތައް ކޮންމެ ސަބަތުގެ ދުވަހެއްގައި ދީނީ މަރުކަޒުތަކުގައި ކިޔެމުން ދާ ތާ އެތައް ޒަމާނެއް ވެއްޖެ. އަދި ކޮންމެ ރަށެއްގައި ވެސް އެކަލޭގެފާނުގެ ބަސްފުޅުތައް ވެސް ވަނީ އަންގައިދެއްވިފަ.⁠“

އީމާންވެ ތިބި މީހުންގެ ތެރެއިން ބަނީއިސްރާއީލު މީހުން ފިޔަވާ އެހެން މީހުންނަށް ފޮނުވުނު ސިޓީ

22ދެން އީސާގެފާނުގެ މަންދޫބުންނާ އަދި އީސާގެފާނުގެ ޖަމާޢަތުގެ ބޮޑުންނާ އަދި މުޅި ޖަމާޢަތުގެ އެންމެންނާ ވާހަކަދައްކާ ނިންމީ އެ ޖަމާޢަތުން ވަކި ބަޔަކު ކަނޑައަޅާ އެމީހުން ޕައުލް ބަރުނައްބާސް އާއި އެކު އަންތީޔޮކުއަށް ފޮނުވުމަށެވެ. މިގޮތުން އެމީހުން ކަނޑައެޅީ މުޅި ޖަމާޢަތުގައި ވެސް އެމީހުންނާއި ދޭތެރޭ މީހުން އިޙުތިރާމު ކުރާ ދެމީހުން ކަމުގައިވާ ބަރުސައްބާސް އާއި ސިލާހު އެވެ. (މި ބަރުސައްބާސްގެ އަސްލު ނަމަކީ ޔުދާސްއެވެ.) 23އަދި އެމީހުންނާއި އެކު ތިރީގައި މި ބަޔާން ކުރެވޭ ސިޓީ ވެސް ފޮނުވުނެވެ. މި ސިޓީ މި ފޮނުވުނީ އީސާގެފާނުގެ މަންދޫބުންނާއި އަދި އެކަލޭގެފާނު ގަބޫލުކޮށް އީމާންވެގެން ތިބި މީހުންގެ ޖަމާޢަތުގެ ބޮޑުންގެ ފަރާތުންނެވެ.

ބަނީއިސްރާއީލު މީހުން ކަމުގައި ނުވާ އީސާގެފާނަށް އީމާންވެގެން ތިބި އަންތީޔޮކު އާއި ސޫރިޔާއާއި އަދި ސިލީސިޔާގެ ޖަމާޢަތުގެ މީހުންނަށް އަހަރެމެން ސަލާމާއި ހެޔޮއެދުން ފޮނުވަމެވެ.

24އަހަރެމެންނަށް އެނގިފައިވާ ގޮތުގައި އަހަރެމެންގެ ތެރެއިން ބަޔަކު ތިޔަބައިމީހުންގެ ގާތަށް ގޮސް އެމީހުންގެ ބަސްތަކުގެ ސަބަބުން ތިޔަބައިމީހުންނަށް އުނދަގުލާއި ހާސްކަން ލިބިއްޖެއެވެ. ނަމަވެސް އެމީހުން އެއީ އަހަރެމެން ފޮނުވައިގެން ތިޔަބައިމީހުންގެ ގާތަށް ދިޔަ ބަޔެއް ނޫނެވެ. އަދި އެމީހުން އެކަން ކުރީކީ ވެސް އަހަރެމެން ރުހޭގޮތަކަށް ނޫނެވެ. 25އެހެން ކަމުން އަހަރެމެން އެންމެން އެއްބަސްވީ އަހަރެމެންގެ ތެރެއިން ވަކި ބަޔަކު ހޮވާ ތިޔަބައިމީހުންގެ ގާތަށް ފޮނުވުމަށޭވެ. އެމީހުން ދާނީ އަހަރެމެންގެ ލޮބުވެތި އެކުވެރިން ކަމުގައިވާ ޕައުލް އާއި ބަރުނައްބާސް އާއި އެކުގައެވެ. 26އެދެމީހުންނަކީ އަހަރެމެންގެ މާތްސާހިބާ އީސާ އަލްމަސީޙުގެ ޚިދުމަތުގައި އެމީހުންގެ ފުރާނައަށް ނުރައްކާތެރިވީ ހިނދު ވެސް ކެރިގެން ކުރިމަތިލާފައިވާ ބަޔެކެވެ. 27އެމީހުންނާއި އެކު މި ފޮނުވާ އަނެއް ދެ މީހުންނަކީ ބަރުސައްބާސް އާއި ސިލާހު އެވެ. އެދެމީހުން އަހަރެމެން މި ސިޓީގައި ލިޔެފައި މިވާ ބަސްތައް އަނގަ ބަހުން ތިޔަ އެންމެންގެ ގާތުގައި ކިޔާދޭނެއެވެ. 28މި ކަންތައްތައް ފިޔަވާ ތިޔަބައިމީހުންގެ ކޮނޑުގައި ނޫފުލޭ ފަދަ އުނދަގޫ ބުރައެއް އެޅުވުމަކަށް މާތްރޫޙުފުޅު އެދިވަޑައިގެނެއް ނުވެއެވެ. އަހަރެމެން ވެސް އެދެނީ ހަމަ އެ ފަދައިންނެވެ.

29ނަމަވެސް ތިޔަބައިމީހުން އެއްވެސް އެހެން ކަލާނގެއަކަށް ޤުރުބާން ކޮށް ހުށައެޅިފައި ވާ ކާއެއްޗެއް ކައިގެން ނުވާނެއެވެ. އަދި ތިޔަބައިމީހުން ޖަނަވާރެއްގެ ލޭ ކެއުމަށް ބޭނުންކޮށްގެން ނުވާނެއެވެ. އަދި ކަރުއަނބުރާ މަރާލެވިފައިވާ އެއްވެސް ޖަނަވާރެއްގެ މަސް ވެސް ކައިގެންނުވާނެއެވެ. އަދި ޖިންސީ ފާފައެއް ކޮށްގެން ނުވާނެއެވެ. މި ފަދައިން ތިޔަބައިމީހުން ކަން ކުރަނީނަމަ ތިޔަބައިމީހުންގެ ދިރިއުޅުން ރަނގަޅުވެ ރަޙުމަތްލެއްވޭނެއެވެ. ތިޔަ އެންމެންނަށް އަހަރެމެންގެ ފަރާތުން ހެޔޮއެދުން ފޮނުވަމެވެ.

30ދެން އެމީހުން ޖެރޫސަލަމުން ފުރައިގެން އަންތީޔޮކުއަށް ގޮސް އީސާގެފާނު ގަބޫލު ކުރާ މީހުންގެ ޖަމާޢަތުގެ އެންމެން އެއްކޮށް އެ ސިޓީ އެމީހުންނާއި ހަވާލު ކުރިއެވެ. 31މި ސިޓީ ކިޔުމަށް ފަހު އެންމެންގެ ހިތުގައި އުފާވެރިކަން އުފެދުނެވެ. އެއީ އެ ސިޓީގައިވާ ހިތްވަރު ލިބޭ ފަދަ ބަސްތަކާއި ޚަބަރުގެ ސަބަބުންނެވެ. 32ބަރުސައްބާސް އާއި ސިލާހު އަކީ ދެ ނަބީބޭކަލުން ވެސްމެއެވެ. އެހެން ކަމުން އެމީހުން އީސާގެފާނު ގަބޫލުކޮށްގެން ތިބި މީހުންގެ ޖަމާޢަތުގެ މީހުންނަށް ހިތްވަރާއި ބާރު ލިބޭނެ ފަދަ ބަސްތަކުން އެމީހުންނާއި ވަރަށް ގިނައިރު ވާހަކަދައްކާ ހެދިއެވެ. 33ދެން ދުވަސްކޮޅަކަށް ފަހު ބަރުސައްބާސް އާއި ސިލާހު އެނބުރި ޖެރޫސަލަމަށް އެމީހުން ފޮނުވި މީހުންގެ ކަރިއަށް ދިޔައެވެ. އެމީހުން ދިޔައީ އީމާންވެގެންވީ މީހުންގެ ޖަމާޢަތުގެ އެންމެންގެ ހެޔޮއެދުން ލިބިގެންނެވެ. 34{ސިލާހު ގަސްތު ކުރީ އެ ރަށުގައި މަޑު ކުރާށެވެ.}#15‏:34 މިފޮތް ލިޔެވިފައިވާ އަސްލު ބަހަކީ ގުރީކު ބަހެވެ. ނަމަވެސް އެ ލިޔުންތަކުގެ ތެރެއިން މިއާޔަތް ހިމެނިފައި ވަނީ ބައެއް ލިޔުންތަކުގައެވެ.

35ޕައުލްއާއި ބަރުނައްބާސް އަންތީޔޮކުގައި އިތުރަށް ދުވަސްކޮޅަކު މަޑު ކުރިއެވެ. އަދި އެ ރަށުގައި އެހެން ވެސް އެތައް ބަޔަކާއިއެކު މީސްތަކުންނަށް މާތްސާހިބާ ދެއްވި ހެޔޮޚަބަރުފުޅު އަންގައިދީ ފާޅުކުރަމުން ގެންދިޔައެވެ.

ޕައުލް އާއި ބަރުނައްބާސް ވަކިވުން

36ދެން ދުވަސްކޮޅެއް ފަހުން ޕައުލް ބަރުނައްބާސް އަށް ބުންޏެވެ. ”⁠އަހަރެމެން ކުރިން ދިންނެވުމުގެ ޚަބަރު ދިން ރަށްތަކަށް އެނބުރި ދަމާ ހިނގާ. އެއީ އޭރުން އެ ރަށްތަކުގައިވާ އީސާގެފާނަށް އީމާންވެގެން ތިބި މީހުންގެ ކަންތައް ހުރިގޮތެއް އަހަރެމެންނަށް އެނގޭނެ.⁠“

37ބަރުނައްބާސް ބޭނުންވީ ޔޫޙަންނާ މަރުކުސް ވެސް އެމީހުންނާއި އެކު ގެންދިއުމަށެވެ. 38ނަމަވެސް ޕައުލް މި ކަމާ އެއްބަހެއް ނުވިއެވެ. އެއީ އެމީހުން ކުރިން އެކުރި ދަތުރުގައި ވެސް ޔޫޙަންނާ މަރުކުސް މަސައްކަތް ނުނިމެނީސް ޕަންފީލިޔާއާއި ހިސާބުން އެމީހުން ދޫކޮށްލާފައި އެނބުރި ޖެރޫސަލަމަށް ވަނީ ގޮސްފައެވެ. 39ނަމަވެސް މި ކަމުގައި ޕައުލް އާއި ބަރުނައްބާސް އާއި ދެމެދުގައި ވަރަށް ބޮޑު ދެބަސްވުމެއް ހިނގިއެވެ. އެކަމުގެ ސަބަބުން އެދެމީހުން ވަކި ވެ ދެމީހުން ދެ މަގުން ދިޔައެވެ. ދެން ބަރުނައްބާސް މަރުކުސް އާއި އެކު އޮޑިއެއްގައި ސައިޕުރަސް އަށް ދަތުރުކުރިއެވެ.

40ދެން ޕައުލް ސިލާހު އޭނާއާއި އެކު ގެން ދިއުމަށް ނިންމާ އޭނާގެ ދަތުރުގައި ކުރިއަށް ދިޔައެވެ. އަންތީޔޮކުގެ އީސާގެފާނަށް އީމާންވެގެން ތިބި މީހުންގެ ޖަމާޢަތުގެ މީހުން ޕައުލް މާތްރަސްކަލާނގެ ބެއްލެވުމުގެ ދަށަށް ދޫކޮށް ހަވާލު ކުރެއްވިއެވެ. 41ދެން ޕައުލް ސިލާހު އާއިއެކު ސޫރިޔާ އާއި ސިލީސިޔާގެ ހިސާބުތަކުގައި ދަތުރުކޮށް އެތަންތާގައި ހުރި އީސާގެފާނަށް އީމާންވާ މީހުންގެ ޖަމާޢަތްތަކަށް ހިތްވަރު ދީ ބާރުދެމުން ގެންދިޔައެވެ.

Atualmente Selecionado:

މަންދޫބުންގެ މަސައްކަތް 15: ކމ

Destaque

Copiar