ປັຣນາຍ ປາລີ່ ພາຍາ 3
3
ຣາມຶ່ຮ ຣາໄງ່ອ໌ ກະ ຕະ ຕາປູ່ນ
1ກອນ ເອີຍ! ອຶນໂຈຍ ຊາລີຣ ແຕ ມັຮ ຣາມຶ່ຮ ເກົາ ອາຕີ.
ອຶງເຄາະ ໄມ່ ເຈີ ດໍອ໌ ຕຶ່ງ ຣາງຶ່ຮ ມັຮ ຣາມຶ່ຮ ເກົາ ປາຕັບ.
2ປັຣນາຍ ເກົາ ຕຽຮ ອາຕີ ເຕ່ອ໌ ໂອນ ໄມ່ ແກີດ ກົງ ອາມົ່ງ ດູ່ນ,
ກະ ເບີນ ບັນຊວານ ອຽນ ອໍ ຕຶ່ງ ກູ່ ຣານະ ໄມ່ ຕະ.
3ອຶນໂຈຍ ຕັຮ ເລີຍ ຣາງຶ່ຮ ອາໂຢ່ະ ປາຊິ ກະ ຣາງຶ່ຮ ຕານັ່ອງ ຕາປຶ່ງ.
ອຶງເຄາະ ໄມ່ ອີດ ມັຮ ຣາມຶ່ຮ ກັອຍ ອຶງກວາອ໌ ດໍອ໌ ຕຶ່ງ ຕາກອງ;
ອຶງເຄາະ ໄມ່ ຄຽນ ດໍອ໌ ຕຶ່ງ ຣາງຶ່ຮ.
4ເຈີ່ ໄມ່ ແກີດ ດັອຮ ບຸມບວລ ຮູລ ຢຸນຢົ່ງ,
ກະ ເຢືາງ ເຈົາຣາຊີ ກະ ມັຮ ກວາຍ ຊັອງ ຣໍ່ອ໌ ຣາງຶ່ຮ ກະ ໄມ່.
5ອຶງເຄາະ ໄມ່ ຊາອຳ ເຢືາງ ເຈົາຣາຊີ ອຶນແຍ່ະ ຣາງຶ່ຮ ຣາແຮີ.
ອຶນໂຈຍ ປັ່ອງ ແຕ ຣາມຶ່ຮ ໄມ່ ຄຶ່ດ ປາຍ ດັງ.
6ອຶງເຄາະ ໄມ່ ຄຶ່ດ ອຶນໂຍ່ງ ປໍ ເຢືາງ ເຈົາຣາຊີ ແຕ ກູ່ ຣານະ ໄມ່ ອີ ຕະ,
ເຈີ່ ເມ່ນ ອັນ ໂອນ ໄມ່ ເຮີມ ຣານາ ປຍາຍ໌ ລາລື່.
7ອຶນໂຈຍ ຄຶ່ດ ປາຍ ໄມ່ ດັງ ກາເລີຍ ແຕ ກວາຍ ການໍ່ອ໌;
ມາ ອຶງເຄາະ ໄມ່ ຕະ ຕາປູ່ນ ເຢືາງ ເຈົາຣາຊີ, ກະ ວຍາຣ ເຢີ່ງ ແຕ ຣານະ ຕາ ອໍ.
8ຄັນ ໄມ່ ຕະ ນ່ະກັອຍ, ລາ ແກີດ ນ່ະ ຣາເຮົາ ແບຼງ ດໍອ໌ ປົວ ເບິ ໄມ່,
ກະ ຕະ ບັນ ກູ່ ຣາມຶ່ຮ ອາອີ່.
9ອຶງເຄາະ ໄມ່ ຢຳນັ່ບ ເຢືາງ ເຈົາຣາຊີ ກະ ມ່ອບ ຊາງ ມູ່ນມັ່ງ ຊັງ ຊານາ ໄມ່ ໂອນ ອັນ,
ກະ ມ່ອບ ຊາງ ມັຮ ປາໄລ ຊັຣນົຮ ໄມ່ ອີດ ແຕ ຕາແບິ ລາລື່.
10ຄັນ ໄມ່ ຕະ ນ່ະກັອຍ, ໄມ່ ເບີນ ໂດຍ ຕາ ຣາລໍ່ ທຣໍ ຕາ ຣາລິ່ຮ,
ກະ ເບີນ ບຼັອງ ອາງຸ່ນ ແກຼີຍ ເກຼືາຍ ເຕົ່າ ແອິ ອຶນຕຸ ອີ ດໍອ໌ ນັ່ອງ.
11ກອນ ເອີຍ! ແຕີ່ອ໌ ເຢືາງ ເຈົາຣາຊີ ແອບ ອາຕີ, ອຶງເຄາະ ໄມ່ ອຶນໂຈຍ ພາມາດ,
ກະ ອຶນໂຈຍ ຕາ ເມ່ນ ຕະ ມັຮ ປັຣນາຍ ອັນ ຕາໄມຮ ໄມ່.
12ເຢືາງ ເຈົາຣາຊີ ແອບ ອາຕີ ມັຮ ກວາຍ ກາ ອັນ ອາໂຢ່ະ,
ນ່ະ ອຶມປໍ່ ແອບ ອາຕີ ກອນ ກາ ອັນ ປາຊິ.
13ບຸ່ນ ລາລື່ ແຕີ່ອ໌ ປໍ ກວາຍ ກາ ຣາມົຮ ອາກັນ ຣາໄງ່ອ໌ ຣາລັ່ງ,
ລາ ກວາຍ ກາ ເບີນ ຣາງຶ່ຮ ຊາປຸ່ຮ.
14ຣາໄງ່ອ໌ ຣາລັ່ງ ລາ ເກືາ ເປ່ງ ກາເລີຍ ແຕ ປຣະ ແຢງ.
15ຣາໄງ່ອ໌ ຣາລັ່ງ ເບີນ ເກືາ ກາເລີຍ ແຕ ມັຮ ຕາເມົາ ເປ່ງ,
ລື່ ຕາ ເບີນ ຣາມຶ່ຮ ອຶນເຕົ່າ ກວາຍ ຢໍອ໌ ອີ ເບີນ, ມາ ເຕ່ອ໌ ຕາລີ ກະ ຣາໄງ່ອ໌ ຣາລັ່ງ.
16ຣາໄງ່ອ໌ ຣາລັ່ງ ໂອນ ໄມ່ ເຕ່ອ໌ ແກີດ ກົງ ອາມົ່ງ ດູ່ນ,
ແກີດ ຊຸ ອາຊັອຮ ກະ ເບີນ ຊະເຢືາງ ແຮີ.
17ຣາໄງ່ອ໌ ຣາລັ່ງ ຕະ ໂອນ ແດີຍ ອາມົ່ງ ໄມ່ ຣໍ່ອ໌ ອໍ,
ກະ ເດີງ ໄມ່ ປໍ ອຶນຕຸ ອຽນ ອໍ.
18ຣາໄງ່ອ໌ ຣາລັ່ງ ລາ ນ່ະ ອາລ່ອງ ໂອນ ກວາຍ ເຕ່ອ໌ ອາມົ່ງ;
ບຸ່ນ ລາລື່ ກວາຍ ກາ ໂປຍ໌ ດໍອ໌ ປາໄລ ແຕ ກັ່ລ ກັອຍ.
19ເຢືາງ ເຈົາຣາຊີ ແຕງ ກຣວາງ ກູແຕອ໌ ໄນ່ ຍ່ອນ ຣາໄງ່ອ໌ ຣາລັ່ງ ແຕ ອັນ;
ຍ່ອນ ແຕ ອັນ ດັງ, ນ່ະກັອຍ ເຕ່ອ໌ ອັນ ອາຈຸຮ ມັນລັ່ອງ ໂອນ ແອີດ ຕຶ່ງ ມວຍ ອຶນຕຸ.
20ອັນ ດັງ ຕະ ໂອນ ແດີອ໌ ກູລິ່ຮ ອາລັ່ອຮ,
ກະ ຕະ ໂອນ ຣາມິ່ລ ແກີດ ແດີອ໌ ເມືາ ແຊງ ປໍ ກຣວາງ ກູແຕອ໌.
21ກອນ ເອີຍ! ອຶງເຄາະ ໄມ່ ຢຸມ ໂອນ ຈັບ ອາກັນ ຣາໄງ່ອ໌ ຣາລັ່ງ ກະ ດັງ ຕະ ໂອນ ກຣັ່ກ ອໍ.
ອຶນໂຈຍ ໂອນ ບາຣ ຣາມຶ່ຮ ໄນ່ ຣາຕັຮ ແຕ ໄມ່.
22ບາຣ ຣາມຶ່ຮ ກັອຍ ລື່ ຕະ ໂອນ ໄມ່ ເບີນ ອາມົ່ງ,
ກະ ແກີດ ນ່ະ ຈຸ່ ໄມ່ ອຶງກວາອ໌ ຕຶ່ງ ຕາກອງ.
23ໄມ່ ເຕ່ອ໌ ຕາຢັຮ ເປາະ ກຼີດ ກຼອດ ຈອດ ອໍ,
ກະ ຕາ ເບີນ ກູຕົ່ຮ ອຶນເຕົ່າ.
24ແຕີ່ອ໌ ໄມ່ ມູ່ດ ບິ, ລາ ໄມ່ ຕາ ເບີນ ຊັອງ ອຶງກັອຮ ອຶນເຕົ່າ,
ກະ ໄມ່ ເຕ່ອ໌ ບິ ລາງ່ຳ ກ່ຳ ລາເງ່ດ.
25ໄມ່ ຕາ ເບີນ ຄຶ່ດ ນັ່ອງ ແຕ ກູຈີດ ປິ່ດ ກາ ແຕີ່ອ໌ ໄຈ ລາລື່ ປໍ ກວາຍ ຕາ ອໍ, ນ່ະ ກູຢາລ ຣາປູ່ອ໌.
26ເຢືາງ ເຈົາຣາຊີ ອີ ກຸ່ມກຍາອ໌ ກູຣຍາອ໌ ດໍອ໌ ໄມ່.
ອັນ ຕາ ເບີນ ຕັຮ ໄມ່ ໂອນ ຈວາດ ຕຶ່ງ ຣາບາງ ເນົ່າ ຕໍ ດໍອ໌.
27ບັອງ ແລ່ະ ໄມ່ ເຕ່ອ໌ ຈ່ອຍ,
ລາ ອຶງເຄາະ ໄມ່ ຈ່ອຍ ມັຮ ກວາຍ ກາ ເບີນ ຕຸ່ຮ ກັ່ດ.
28ອຶນໂຈຍ ໂອນ ເຢົ່າ ແອີດ ເກຣາະ ໄມ່ ແຕີ່ອ໌ ຕາໄງ ປັຣແນີ;
ຄັນ ໄມ່ ເຕ່ອ໌ ຈ່ອຍ ໄລ່, ລາ ອຶງເຄາະ ຈ່ອຍ ແຕິ່.
29ອຶນໂຈຍ ອາລັ່ອຮ ເງ່ ຕາ ອໍ ໂຈະ ເຢົ່າ ກາ ແອີດ ມູ ດຸງ ຈຸງ ມູ ວີ່ລ ກະ ໄມ່,
ຍ່ອນ ເຍືາ ຢິດ ແດີອ໌ ມູ ອຶນຕຣັ່ອຮ ອັອຮ ແດີອ໌ ມູ ອຶນຕຣີ່ນ.
30ອຶນໂຈຍ ບຣອຮ ອາຕ່ຳ ບຣຳ ອາເວ່ຣ ຕາ ແກີດ ກຼອງ ກະ ກວາຍ ການໍ່ອ໌,
ຍ່ອນ ອັນ ຕາ ເກີ່ຍ ຕະ ໄມ່.
31ອຶນໂຈຍ ຊັຣແມງ ກູມິ່ ແຕ ກວາຍ ແຣັ່ງ,
ແຕີລາ ດວຍ໌ ນ່ະ ເຕຣ່ງ ໄລ່,
32ຍ່ອນ ເຢືາງ ເຈົາຣາຊີ ຊາອັຣ ມັຮ ກວາຍ ຣາງຶ່ຮ ໂກ່ະ,
ມາ ອັນ ຊັອງ ຊັຣນັບ ກະ ກວາຍ ມັນຕັ່ດ ມັນດຍາຮ.
33ເຢືາງ ເຈົາຣາຊີ ເວ່ນ ມັຮ ດຸງຊູ ກວາຍ ໂລ່ຍຮ,
ມາ ອັນ ຈໍອ໌ ກຼື່ອ໌ ກາຕື່ອ໌ ອາຢວຣ ມັຮ ດຸງຊູ ກວາຍ ຕານັ່ອງ ອໍ.
34ເຢືາງ ເຈົາຣາຊີ ດໍອ໌ ມັ່ດ ໂຈະ ກວາຍ ໂອດ,
ມາ ອັນ ຈ່ອຍ ເມືາດ ກວາຍ ກາ ອາແຊງ ຈະ.
35ກວາຍ ຣາໄງ່ອ໌ ຣາລັ່ງ ເບີນ ຊະເຢືາງ ປັຣເລືາງ ປາເນົາ,
ມາ ມັຮ ກວາຍ ຊາກູລ ຕາ ແກີດ ອາລຶ່ ອາຈຍາອ໌ ອຶນເຕົ່າ.
Atualmente Selecionado:
ປັຣນາຍ ປາລີ່ ພາຍາ 3: ກາຕາງ
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023 (Active) Wycliffe Bible Translators, Inc. All rights reserved.
