Mat 28

Aya ayɔ ni Yesu adɔ ni bekpo ʋa mɛ

1Agi Lizemɔniwe le liza ɛ, xe Lipadzruwe le olezatɔ nɔ ɛna ɛ, Maria Magdaladzee ni Maria ʋlaɛ bɛtrɛ si bɛtredi ɔdrɔ lɔ. 2Kyɔŋ klɔ ko e, kesea kɛhwa gagla; lɛ Ɔka Aya yɛ ɔxwɛdzɛɛ eple adɔ ni lifunu ne, lɛ emli likla nɛ gi bɛkɔ etsi ɔdrɔ lɔ onu i azanɔ ɛ, lɛ ezè ní lɛ aʋa ɛ. 3Yɛ kiŋwiŋwi yɛ mɛ, kize ŋwisi dzeni kifububu kinɛ, lɛ yɛ ewu la ɛxwa pititi ŋwisi aklala kinɛ ɛ. 4Lifu liku banɔpe ba nyani nyani sì besugu nite si bɛfɛ ŋwisi banɔ gi betse na a. 5Lɛ Aya yɛ ɔxwɛdzɛɛ apani aki badzɛ ba sì, “Mlakíse lifu, mete sì Yesu gi beku ní osetsase lo su i, yɛ mlɛpɛ.” 6Ɔ́ma ní ya a; bɛyɔni yɛ, ɔlɛ ligbã́, ŋwisi kiliɛ gi apani i kinɛ. Mleti eku tɔ mledi niklɔ gi afɛ ɛ. 7Mlatrɛ kyɔŋ, tɔ mlasi yɛ badɔkpasi ba sì, ‘Bɛyɔni yɛ dɔni bekpo ʋa mɛ. Eku mlɔ ɔtɔ ɛɛtrɛ ní Galilea, niklɔ mlamɔ yɛ!’ Mlaplɛ aŋu ní liboe lɛ gi masi mlɔ aʋa ɛ.” 8Nite si bɛkɔsi sɛ ní ɔdrɔ lɔ su nì lifu, pɔ̀ isami kyɛ izeku ba xe bɛzɛtrɛ si bɛzeedo ɛsi yɛ badɔkpasi ba a. 9Kyɔŋ klɔ ko e, Yesu atsani ba lɛ apani ba si “Kusuyɔ ki mlɔ.” Beti ipɔni Yesu, bevu yɛ kuklikpɔɔ lɛ besumu ye e. 10Lɛ Yesu asi ba si, “Mlakíse lifu, mlazɛ si mɛ benemi ba si batrɛ ní Galilea, lɛ niklɔ biamɔ mɛ ɛ.”

Banɔpe ba kunutsatsaa

11Agi badzɛ ba bɛsɛ ɛtrɛ ɛ, baguta ba ba me batɔ bɛtrɛ ní kusumu yo baka ba klɔ ní ɔma ʋidi lo me. Lɛ bɛsi ba liboe kakaa gi liba lɛ mɛ ɛ. 12Gi kusumu yo baka ba nì banɔtsitsi ba bɛtsá ɛ, bɛbitɛ kutrɔtrɔ lɛ bɛki baguta ba kibɔ gi kidzi aŋu mɛ ɛ. 13Lɛ bɛsi ba si mlapani si yɛ badɔkpasi ba bɛba ezuru yɛ okpo ye elesi la gi kwidɔ sra sɛ ɛ. 14Lɛ xegi kesea ɔʋadi ye aanu liboe lɛ ya ɛ, kwialiɔʋi yɛ tɔ kwiabu mlo ní liboe me. 15Banɔpe ba bɛzi kibɔɛ lɛ bɛzɛbitɛ ní liboe lɛ klɔ gi bɛsi ba aʋa ɛ. Niteme si lɛ lize liboe lɛ gi lizɛklanɔ ní Yudanɛ ma kiboedoe onu ga kɔna ni omono o.

Yesu ebú isu ya abasi yɛ badɔkpasi ba

16Lɛ yɛ badɔkpasi liɔfɔ ni tole ba ɛ, bɛtrɛ ní ketokpaa aʋa ní Galilea ní niklɔ gi Yesu asi ba si batrɛ ɛ. 17Agi bɛmɔ yɛ ɛ, besumu ye, pɔ̀ ba mɛ batɔ bazɛ lɛ aʋa ŋa a. 18Lɛ Yesu eti apɔni ba lɛ asi ba sì, “Aya akɔ kigaglaɛ pɔ́ ní lifunu ne ni kesea aʋa akpɛ ní mɛ awla a. 19Lɛ loso e, mlatrɛ, ní ɔkɔ kakaa ni banima pɔ́ klɔ tɔ mlabitɛ ba mɛ badɔkpasi: mlakpɛ kuni aki ba ní Ɔka yɛ ni Obi ye ani Ɔfuɛfuɛ Dradra lɔ linyi ne me. 20Tɔ mlabasɛ ba sì babitɛ kidɔ kakaa gi kɛsu makpɛ ɔsã aki mlɔ ɛ. Lɛ mlaplɛ aŋu si, malɛ nì mlɔ lipoe kakaa kɔzɛna nì kelea ligù nɛ ɛ.”

Atualmente Selecionado:

Mat 28: avn

Destaque

Copiar