Malakias 3
3
May mabut nga aldaw nga ipangukuman it kasalaꞌan
1Maat siꞌ it AMPUꞌANG DIYUS nga landaw nga gunaan, “Yay matuud, may paꞌasanen ku nga taꞌgen ku. Kanyay makauꞌna it aken, ka asikasuun ya i panawan ku. Bawnga iyan Ampuꞌan nga pagtulusun mi, biglaꞌ yan nga mabut asan it Templo ya. Talagang mabut yan i pagꞌeꞌlaten mi ngayan, kanya nga patindeg it pakiꞌupakat ku,”#3:1 Yay pagpapuntuꞌan it pagꞌeꞌlaten ngaytu, si Jesu-Cristo. Kanya nga taꞌgen nga muꞌna it ki Jesu-Cristo ngaytu, si Juan nga uꞌna-uꞌnang namawtis (Mateo 11:7-10). maat it AMPUꞌANG DIYUS.
2Temed ta, siyuy makatindeg u siyuy makasagkaꞌ it malabayan ya, pagꞌabut it Ampuꞌan ngaytu? Sabap kabilangan ya, apuy nga magtunaw it bulawan isaꞌun maꞌawaꞌ i ega naga bulawan. Baw subung kanya gasiꞌ it pananalpuk nga sabun nga magꞌawaꞌ it damil.
5Inaat it AMPUꞌANG DIYUS nga landaw nga gunaan, “Talagang biglaꞌ aku nga mabut, ka ukumanan ku na kamu. Matuudan ku i mga katungkulan, mga magpamakun duꞌun it ega asawa nira, mga magpanistigu it kaꞌambutan, mga malulupig nga magpanluku it mga manigbuwat nira, mga magpakuriꞌ it mga balu baw mga ilu-ilu, mga ega magbegay it kataldengan kat mga dayuꞌan, baw sira nga egay galang it may iꞌlam it aken.”
Pagraꞌwayen gasiꞌ it Ampuꞌang Diyus i pagtakawan kanya it taw
6“Aku nga AMPUꞌANG DIYUS, talagang daꞌku pabaꞌgu-baꞌgu. Aypaꞌ ka ega piyuuꞌ ku kamu nga mga tungtung-inapuꞌ ni Jacob, 7maski subung naga it adat it mga kagiyaringanan mi i adat mit imyu. Mamagsutil kamu naga it mga urdin ku nga talagang ega pagsunudun mi. Paꞌuliꞌ kamu siꞌ sinit aken, isaꞌun magꞌuliꞌnan nagay pagkilala ku it imyu,” maat it AMPUꞌANG DIYUS nga landaw nga gunaan.
“Ingkut mi it aken, ‘Unuy paꞌaaten mu nga paꞌuliꞌ? Subuk egay magkaꞌrutan namen nga kaꞌilangan namen nga buwaten isaꞌun kapaꞌuliꞌ it imu.’
8Ta aken gasiꞌ nga ingkut,” maat it Ampuꞌang Diyus, “Magꞌuꞌunu mangaas i taw nga takawan yay Ampuꞌang Diyus? Temed talagang pagtakawan mi naga aku.
Ingkut mi siꞌ, ‘Kat unu nga kaꞌulugan?’
Tubag ku, ‘Kat ikasang puluꞌ nga bagiꞌ baw kat mga begay nga pasalamat.’ 9Talagang siyumpaan ku na kamung muꞌsa nga sang kabangsaan, sabap it panluku mi ngaytut aken nga bilang panakaw. 10Sukdanan mit ibgay it egay kurang i ikasang pulung bagiꞌ mi it aken, isaꞌun egay kurang it mga kaꞌilangan duꞌun it Templo ku. Sukdanan mit muwat i atkaytu ngaytu bawnga belsan ku it daꞌnay makasugid nga kagayenan. Ka subuk abriyen ku i mga lalawagan it langit baw iꞌilas situt imyu i subray bastang ildaw, seked it subraꞌ nga pagbastantiyen kamu na. 11Siguruun ku nga ega ranggaꞌen it ganggang u sarut i mga luwak mi, baw ega matata i buwaꞌ it ubas mi,” maat it AMPUꞌANG DIYUS nga landaw nga gunaan. 12“Bawnga maat yan it beken nga mga bangsa nga kamu, talagang magkasagya sabap it atnang gayen it rugar nga pagꞌiꞌistaran mi,” paꞌugdun paꞌ it AMPUꞌANG DIYUS ngaytu nga landaw nga gunaan.
13“Talagang mabebeꞌgat na nga arampangen i ipagsaꞌbug mi it aken,” maat it AMPUꞌANG DIYUS.
“Temed maat siꞌ i ingkut mi, ‘Unu na may unu i inampang namen nga kuntraꞌ it imu?’
14Maat bay inampang mi ngayan nga ega magkapakay ku, ‘Egay kapulusan it magsirbi ngaytu it AMPUꞌANG DIYUS nga landaw nga gunaan. Unuy napulus tami it pagsunud tat mga urdin ya? Baw unuy napulus tami it mga pagbuwaten tami nga maat katandaꞌ it magkasmek tami kat adapan it AMPUꞌANG DIYUS nga landaw nga gunaan sabap it mga kasalaꞌan ta? Daꞌga ega? 15Yay matuud, kayti, iyan mga mapiyataꞌas-taꞌas, sira na i pagꞌildawan nga banar kat pangaꞌgenan nira. Eeꞌ baꞌ, magpanggayen i pangaꞌgenan it mamumuwat it karaꞌe-raꞌetan. Baw ega lamang iyan, ka iyan beken, kat karaꞌe-raꞌetan nira talagang magꞌangut sira it panriga it Ampuꞌang Diyus, temed daꞌsira naga pagrigaen.’ Itu nay paꞌaaten ku ngayan nga mabebeꞌgat nga arampangen nga ipagsaꞌbug mi it aken,” maat it Ampuꞌang Diyus.
16Bawnga namagsugi-sugid i beken nga mga taw, sira nga paggalangen nirat may iꞌlam i AMPUꞌANG DIYUS. Pagdedngegen naga it AMPUꞌANG DIYUS ngaytu i pamagrundingen nira. Aypaꞌ ipiyasurat ya duꞌun it pagluulunun nga kasuratan duꞌun it adapan ya i arandeman pasar it mga taw ngaytu nga may iꞌlam it kanya baw paggalangen niray kanyang ngaran.
17“Talagang ipasiguru ku sira nga aken,” maat it AMPUꞌANG DIYUS nga landaw nga gunaan, “kat aldaw nga bulunun ku nay mga taawan ku, nga pabetang kut kanira, marerga nga mga kusas ku nga subraꞌ nga kararasan ku. Sanguꞌan ku sira in asan nat aldaw nga ipangukuman it kasalaꞌan, subung it pagtaraꞌna it esang amaꞌ kat anak nga masunud it kanya. 18Baw mabut siꞌ nga talagang mamuyaan mi i piyagbelagan it matanaꞌan it mga mataldeng baw mga maraꞌe-raꞌet i adat, iyan mga taw nga mamagsirbi it aken baw ega.”
Atualmente Selecionado:
Malakias 3: TBWONT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 1992, Wycliffe Bible Translators, Inc. All rights reserved.