Matiu 2

Sari Tie Tumatumae pa Kali Gasa Rimata

1Zisu si podo pa vasileana Betilihema pa popoa Ziudia sipu korapa baṉara se Herodi d. Mudina asa si kamo mae pa Zerusalema si kaiqa tie pa kali gasa rimata, saripu tumatumae pa guguadi rina pinopino, 2meke nanasa, “Avei sa koburu sapu podo pude na baṉara tadi na Ziu? Dogoria gami sa Nana pinopino vura maena pa kali gasa rimata, ke mae si gami pude vahesia,” gua si arini.

3Totoso avosia e Herodi sapu gua asa, si balabala mamata si asa meke sari na tie pa Zerusalema.#2:3 Sina balabala ia Herodi sapu sa Baṉara vaqura hie si gina kote hobea sa nana tuturuana baṉara, gua. 4Ke tioki Herodi sari na ṉati hiama d meke na tie va tumatumae koasa Tinarae te Mosese d meke nanasi sa, “Pavei kote podo sa Karisito d?” gua si asa.

5Ke olaṉa si arini, “Pa vasileana Betilihema, pa popoa Ziudia, sina guahe si kuberia keke poropita d.

6‘Agoi Betilihema pa popoa Ziudia.

Arilaemu hola ni goi sari doduru vasileana nomadi pa Ziudia,

sina kaqu vura mae koa goi si keke koimata

sapu kaqu turaṉi na kopu ni sari na Qua tie Izireli,’ ” gua.#Mka 5:2

7Ke tioko golomi Herodi sari kasa tie tumatumae pu mae guadi pa kali gasa rimata, meke vivinei koa rini si asa pude hata vura nia sapu totoso sa zoṉazoṉa si ta dogoro sa pinopino. 8Beto si garunu lani sa si arini pa vasileana Betilihema meke zamai sa, “La mamu hata valeania vasina koa sa koburu sana, meke pana dogoria gamu, si mi pule mae tozi nau, pude maqu atu somana vahesia,” gua si asa.

9Mudina sa dia vivinei koe Herodi si taluarae taloa sari kasa, meke dogoro pulea rini sa pinopino sapu dogoria rini pa kali gasa rimata, rizu va kenue la si asa koa rini osolae noso si asa panaulu koasa vasina koa sa haha. 10Totoso dogoria rini sa pinopino si qetu hola dia si arini. 11Nuquru la si arini pa vetu meke totoso dogoria rini sa haha meke sa tinana, se Mere, si hoqa todoṉo si arini meke vahesia rini sa koburu. Keru vura ni rini sari na dia vinariponi sapu na qolo, na vina uququ oto huda humaṉa lea, meke na oto huda moa, meke poni ni rini koasa koburu.

12Meke taluarae pule la pa dia popoa soti si arini, ene gua tu pa votiki siraṉa, sina va balau i Tamasa pa pinutagita pude madi lopu pule la koe Herodi, gua.

Sa Ginovete La pa Izipi

13Mudidia taluarae sari tie tumatumae si vura koe Zosepa pa pinutagita sa mateana tanisa Baṉara meke zama, “Zosepa, kote hata ia e Herodi sa koburu pude va matea, ke tekulu, vagia sa koburu meke sa tinana, mamu govete la pa popoa Izipi. Mamu koa vasina osolae Arau tozi pule nigo pude taluarae vasina,” gua si asa.

14Ke pana boṉi asa si tekulu se Zosepa, vagia sa sa koburu meke sa tinana, meke taluarae la pa Izipi, 15meke vasina si koa si arini osolae mate se Herodi.

Sa inene hie va gorevura ia gua sapu zama nia sa Baṉara koasa poropita, sapu guahe:

“Tioko vura nia Arau pa Izipi sa Tuqu koreo,” gua.#Hoz 11:1

Sa Vina Matedi rina Koburu Koreo Hitekedi

16Totoso rove vagia e Herodi sapu sekesekei nia rina tie tumatumae si asa, si bugoro sisigiti si asa. Meke garuni sa sari nana tie pude va mate betoi sari doduru koburu koreo pa vasileana Betilihema meke sari vasivasileana tatadi, podalae koari pu karua vuahenidi meke gore koari na haha hitekedi. Hie si tavetia sa luli gua koasa tinozi tadi na tie tumatumae koasa totoso sapu podalae ta dogoro sa pinopino.

17Koasa ginugua hie, si tava gorevura gua sapu zama nia Tamasa koa sa poropita Zeremaea:

18“Keke mamalaiṉi si ta avoso pa vasileana Rama,

na kinabo taruqoqo lavata.

Kaboi Reseli sari na tuna,

meke korona tava manoto si asa,

sina mate beto si arini,” gua.#Zer 31:15

Pule La pa Popoa Izireli

19Mudina sa minate te Herodi, si vura pule koe Zosepa pa pinutagita, sa mateana tanisa Baṉara meke zama, 20“Zosepa, tekulu mamu vagia sa koburu meke sa tinana mamu pule la pa popoa Izireli, sina sarini pu kukiti nia sa koburu si ele mate,” gua si Asa.

21Ke tekulu se Zosepa, vagia sa sa koburu meke sa tinana meke pule la pa popoa Izireli. 22Ba totoso avoso nia Zosepa sapu e Akilisi na hobea se Herodi sa tamana pude koa baṉara pa popoa Ziudia, gua, si matagutu pude pule la si asa. Tava balau si asa pa pinutagita, ke la si asa pa popoa Qaleli. 23Ke la veko kinoa si asa pa keke vasileana pozana si Nazareti. Ke tava gorevura gua sapu zama nia rina poropita, sapu guahe:

“Kaqu ta pozae Tie Nazareti si Asa,” gua.#Mk 1:24; Lk 2:39; Zn 1:45

Atualmente Selecionado:

Matiu 2: ROV

Destaque

Copiar