LUKA 23
23
Jesu Pilat mai ah
(Mat. 27.1,2,11-14; Mrk. 15.1-5; Jhn. 18.28-38)
1Tuachi`n mipite aun un ading ua, amah Pilat kiangah apaipih ua, 2hihpa`n, “Kei Krist kumpipa ka hi chia Kaisar kiang a siah tawi akham leh ka chite uh atokbuai ka thei uhi,” chi`n ahek ua.
3Tuachi`n Pilat in, “Judate kumpipa nahi maw?” chi`n adong a.
Aman adawng a, “Na chih bangin ka hi,” achi a.
4Tualeh Pilat in siampite kiang leh mipite kiangah, “Hihpa tung ah bangmah mohna ka mukei hi,” achi hi.
5Hinanleh amau`n, “Hihpa`n Galili gam a pat in hihtanin Juda gam khuachin ah mipite thu hilh in mipite a tokbuai veu hi,” chi`n ahahpan sem uhi.
Jesu Herod mai ah
6Galili gam thu ajak takin, “Pilat in huapa Galili gammi ahihleh hihlouh adong a.” 7Tualeh Herod vaihawmna nuaia om ahi chih atheih takin Herod kiangah asawl a, hualaiin amah zong Jerusalem a om ahihjiak in. 8Tualeh Herod in Jesu amuh takin akipak mahmah a; atanchin anajak jiakin hun sawtpi a pat akimuhpih ut mawng ahi a; muh zong akinem hi. 9Tuachi`n aman a kiangah, thu tampi adawng a; hinanleh aman bangmah in adawng kei hi. 10Tualeh siampite leh laigelhmite a dingkhia ua, nasiatakin ahek uhi. 11Tualeh Herod leh a galkapte`n Jesu asimmoh bawl ua, chiamnuih bawlnan azang ua, puan thupi asilhsak ua, Pilat kiangah a sawlkikta uhi. 12Tualeh huani mah in Herod leh Pilat akihou theita uhi; hua masang ana ki houtheilou ahi uhi.
Jesu siding a thutanna
(Mat. 27.15-26; Mrk. 15.6-15; Jhn. 18.39—19.16)
13Tuachi`n Pilat in siampite, lamkaite leh mipite asam khawm a. 14A kiang uah, “Mi atokbuai chia hihpa ka kiang a nungpui uh ahi a. Tualeh ngaiun, namai ua hoihtak a ka etchian nung in na hekna uah a tung ah bangmah diklouhna ka mukei hi. 15Herod in zong amu kei, ajiak nou akiang ah kungsawl a, ngaiun, sihna khop hial bangmah abawl kei hi. 16Tuajiakin, ka jep ding a, ka khahmai ding,” achi hi. 17Ajiak ankuang luini a mi khat akiang ua a khahkhiat sak teitei ding ahi hi.
18Amauh kituak takin akikou ua, “Hihpa hih mangthang inla! Barabba hung pawtsak in!” achi ua. 19(Huapa khuapi sung a helna jiak leh tualthah jiak a thong a tang ahi.)
20Tuajiakin Pilat in Jesu akhah dok nuam a, akiang uah thu agen kik a. 21Hinanleh amauh akikou ua, “Kross ah kilhden in! Kross ah kilhden in!” achi ua.
22Tuachi`n aman athumveina dingin akiang uah, “Bang jiak in ahia? Bang ahia a bawlkhialh! Sihna khop hial atung ah bangmah ka mukei hi; tuajiakin ka jep ding a, ka khahmai ding,” achi hi.
23Hinanleh amau`n aw ngaihtak in, kross a kilhden dingin a ngen teitei ua. Tuachi`n amauh aw leh siampite aw in ajou jawta hi. 24Tuachi`n Pilat in anget bang ua bawl dingin thu atanta hi. 25Tualeh helna leh tualthahna jiak a thong tang angetpa uh akhah a, Jesu ahihleh a ut ut ua bawl dingin a piakhiata hi.
Jesu kilhden a omna
(Mat. 27.32-44; Mrk. 15.21-32; Jhn. 19.17-27)
26Tualeh amah apaipih lai un gamlam a kipan-a hungpai Kurini gammi Simon aman ua, Jesu nunglam a pua dingin atung ah kross angata uhi.
27Tualeh amah kah a mau jenjun numei hon in ajui ua. 28Hinanleh Jesu`n amauhlam hung nga in, “Jerusalem tanute aw! Kei hung kah kei unla, nou a ding leh na tate ua dingin kapjaw un. 29Ajiak ngaiun, hichi bang nite a hungtung ding a, ‘Tuani chiangin chiingte leh naupai ngailouhna gilte tualeh naungek tepngailouh noite ahampha uhi!’ achi ding uh. 30Tuachi`n amau`n mualte kiangah, ‘Hung netkhum un!’ Tualeh ta`ngte kiangah, ‘Hung khuhkhum un!’ achi ding uh. #Hos. 10.8; Kln. 6.16. 31Ajiak sing hing a bawn hih silte abawl uleh, singgaw ah bang akibawl tazen diai?”
32Amah tawh midang migilou nih zong hihlup dingin apui ua. 33Tualeh “Kalvari,” achih mun uh hualam ah kross ah akilhden ua migiloute tawh, khat ajiatlam ah tualeh khat aveilam ah akilhden uhi. 34Tuachi`n Jesu`n, “Pa, amauhte ngaidam in! A silbawl uh atheikei ua hi,” achi hi.
Tualeh apuansilh kihawm in ai asan uhi. #Psa. 22.18. 35Tualeh mipite`n a en gige ua tuachi`n lamkaite`n, “Midang bawn a hundam vele; Pasian mitel Krist ahih taktak leh amahleh amah ki hundamta henla!” chi`n a enghou ua. #Psa. 22.7.
36Galkapte`n zong chiamnuih bawlnan azang ua, hungpai in uain thuk apia ua, 37Tualeh, “Judate kumpipa nahih taktakleh nangmah leh nangmah ki hundam in!” achi uhi.
38Tualeh a lutung lam ah Grik leh Latin leh Hebrai ham in, “HIHPA JUDATE KUMPIPA AHI,” chia kigelh atuang hi.
39Tuachi`n migilou kikhaite lak a khat in, “Krist nahihleh nangmah ki hundam inla, kou zong hung hundam tanla!” achi a.
40Tualeh khat pen in amah phawkkawm in adawng a, a kibang a ahung kigawt theiin, “Pasian laulou lai nahi hiam? 41Eipen gawttak mawng ihi; ajiak isilbawlte man mu ihi; hinanleh hihpa`n bangmah a bawlkhial kei,” achi hi. 42Tuachi`n aman Jesu kiangah, “Toupa nagam na tunchiang in hung theigige in aw!” achi a.
43Jesu`n a kiang ah, Adiktak in kung hilh ahi, “Tuni`n ka kiangah paradis ah na om ding hi,” achi hi.
Jesu sihna
(Mat. 27.45-56; Mrk. 15.33-41; Jhn. 19.28-30)
44Tualeh dakgukna ding vel ahi a, dakkuana tan dongin leitung jousiah ahung mialta a. 45Tuachi`n ni ahung mialta a, Pasian tempul puanjak akimlai ah ahung kekta hi. 46Tualeh Jesu aw ngaihtak in a kikou a, “Pa! Na khut ah ka kha kung kemsakta hi!” achi a; tualeh hua achih zoh in akha akhahta hi. #Psa. 31.5.
47Tuachia galkap jalamkaipa`n sil omdan amuh in, hihpa pellou in midik ahi hi chi`n Pasian aphatta hi.
48Tualeh hua etnop a en ding a hung paikhawm mipite jousiahin sil omdan amuhtak un a awm uh tum kawmkawm in Innlam ah apaikikta uhi. 49Hinanleh ameltheihte tengteng leh Galili gam a amah hungjui numeite gamlapi ah ading ua, hih silte a en gige uhi. #Luk. 8.2,3.
Jesu vuina
(Mat. 27.57-61; Mrk. 15.42-47; Jhn. 19.38-42)
50Tualeh ngaiun, mikhat amin Joseph kichi vaihawmtu aom a, amah mihoih leh midik ahi a. 51Aman avaihawm uleh asilbawl uh zong lem anasakpih kei a; Amah Judate khuapi Arimathaimi ahi a, Pasian gam ngak jing a om ahi. 52Hihpa Pilat kiangah apai a, Jesu luang a ngen a. 53Tuachi`n ala a puannem in atuam a, kuamah sialngai nailouh suangkhuak kuak han khat ah asialta hi. 54Huani pen kiginni ahi a, khawlni ahung naita hi.
55Tualeh Galili gam a amah tawh hungjawkte`n zong anung ajui ua, ahan leh a luang kisial dan amu uhi. 56Tuachi`n apaikik ua sil namtui leh sathau namtuite asiam ua.
Tualeh thupiak dungjuiin khawlni in akhawlta uhi. #Exo. 20.10; Deut. 5.14.
Atualmente Selecionado:
LUKA 23: THKHBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
