LUKA 19

Zakai

1Tuachi`n Jesu Jeriko khua ah alut a, apaisuak a. 2Tualeh ngaiin, mikhat amin Zakai kichi, siah dong lamkai khat aom a, amah mi hausatak ahi. 3Tualeh aman Jesu mi bang chibang ahiam chih muh asawm a, hinanleh mipi lak ah adin a ngiam jiakin amu thei kei hi. 4Tuachi`n ana matai a, a en dingin theipi kungah akah a, aman hua lampi hungjui ding ahihjiak in. 5Jesu huamun a hungtun in, adaktou a, amah amu a akiang ah, Zakai, “Kintakin hung kum in, ajiak tuni`n na inn ah hungtung ding ka hi,” achi hi.

6Tuatakin kintakin akum a, kipak takin amah a zintunta hi. 7Hinanleh amau`n hih amuh tak un, “Mikhialte inn a tung dingin apai tave!” chi`n aphun uhi.

8Tuachi`n Zakai ading a, Toupa kiangah, “Toupa, en in! ka dangka kimkhat mi gentheite kiangah ka pia ding a, tualeh mi neihsa khat peuh diklou tak a kalak aom leh alehli in kadin ding,” achi hi. #Exo. 22.1; Lev. 6.5; Num. 5.6,7.

9Jesu`n akiang ah, “Tuni`n hih inn ah hundamna a tungta hi, amah zong Abraham tapa ahihjiak in. 10Ajiak mangthangte zong ding leh hundam ding a Mihing Tapa hungpai ahi,” achi hi. #Mat. 18.11.

Talent gentehna thu

(Mat. 25.14-30)

11Tualeh hih thute a ngaihkhiat lai un Jerusalem anaih ta`k jiak leh Pasian gam hungtung pai ding a a ngaihsut jiak un gentehna thu khat agen beh hi. 12Aman huajiakin agen a, “Mi thupi kuahiam khat kumpi gam khat la a hung kileh kik dingin khual gamla tak ah ahawh a. 13Tualeh aman a sila sawmte asam a, ‘Dangka-eng sawm akiang uah apia a, tualeh kung paikik masiah hihtawh summet na bawl un,’ akiang uah achi hi. 14Hinanleh amite`n amah ahua ua, ‘Hihpa katung ua vaihawm dingin ka deihkei uh chi`n anung ah palai asawl uhi.’

15“Tualeh hichi ahung hi a, gam avanei a, ahung kilehkik in, a dangka peipung dan uh theihna dingin a sila dangka apiakte a kiang ah asam sak a. 16Tuachi`n khatnapa a hungpai a, ‘Toupa na dangka-eng sawm in apung hi,’ achi a. 17Aman a kiangah, ‘Hoih e,’ ‘nang sila hoih! sil tawmnou khat tung a na gin-om jiakin khuasawm tung a vaihawmtu in pang in,’ achi hi. 18Anihnapa ahung pai a, ‘Toupa, na dangka-eng nga in apung hi,’ achi a. 19Aman tuachi mahbang in a kiangah, ‘Nang zong khua nga tung a vaihawm in pang in achi hi.’ 20Tuachi`n adang ahung pai a, ‘Toupa en-in, na dangka-eng hiah aom hi, kinawtna puan in ka tu`n a hoihtak in ka kem hi. 21Ajiak migumtat nahi a kung lau hi, na koihlouh zong nala a, tualeh na tuhlouh zong na-at hi,’ achi a. 22Aman a kiangah, ‘Nang sila gilou! na kamsuak ngeiin siamlouh kung tangsak ding. migumtat kahih a, ka koihlouhna a zong ka lak a, tualeh ka tuhlouhna a zong ka-at nathei hi. 23Atuachi ahihleh kungtun chiang a ka dangka apung tawh ka laktheih ding a ka dangka dangka inn a na koihlou na hia?’ achi hi. 24Tuachi`n aman agei a dingte kiangah, ‘A dangka laksak unla, sawm neipa kiangah pia un,’ achi hi. 25Hinanleh amau`n a kiang ah, ‘Toupa, aman dangka sawm anei!’ achi ua; 26‘Ajiak kung hilh ahi,’ ‘kuapeuh aneite piakbeh ahi ding a, tualeh kuapeuh aneiloute aneihsun zong laksak ahi ding hi. #Mat. 13.12; Mrk. 4.25; Luk. 8.18. 27Hinanleh ka melmate atung ua ka vaihawm ding deihloute hungpui unla, kamai ah that un!’” achi hi. #Mat. 25.14-30.

Jesu gualjou a Jerusalem a alutna

(Mat. 21.1-11; Mrk. 11.1-11; Jhn. 12.12-19)

28Tualeh aman hichibang thu agenkhit in a lamkaih a, Jerusalem lam juanin apaitou ua. 29Tualeh hichi ahi a, Olive kichi mual a Bethphage leh Bethani khuagei a hungtun un a nungjuite lak a minih asawl a 30“Namai ua khua ah vapai unla, na lut chiang un sabiltung nou kuamah tuanngai nailouh navamu ding uh, sut unla, hungkai un. 31Tualeh mi kuapeuhin bangding a nasut uh chia a hungdok uleh, Toupa`n apoimoh hi, chi`n akiang uah gen un,” achi hi.

32Tualeh asawlte avapai ua, akiang ua agen bangbang in avamu uhi. 33Hinanleh sabiltungnou asut uleh aneiten akiang uah, “Sabiltung nou bangding a nasut uh ahia?” achi ua.

34Amau`n, “Toupa`n adeih a ahi,” achi ua, 35tuachi`n Jesu kiangah ahung kai ua. Tualeh sabiltung nou tungah apuante uh aphah ua, atung ah Jesu atousak uhi. 36Tualeh apailai in lampi ah apuante uh aphah ua.

37Tuachi`n atun ding kuan a Olive mual kumsukna ding takah nungjui mipi jousiahin asil thupi bawlte jousiah amuh jiak un akipak ua aw ngaihtakin Pasian apahtawi ua: 38“Toupa min a hungpai kumpipa ahampha hi, van ah lemthu leng henla, tungnungpen ah thupina om hen!” chi in. #Psa. 118.26.

39Tualeh mipi lak a Pharisai khenkhat in, “Siapa, na nungjuite phawk in,” achi ua.

40Aman adawng a akiang uah, “Kung hilh ahi, hihte adaih uleh hih suangte akikou pai ding uhi.”

Jesu`n Jerusalem akah khum

41Tualeh a tunkuan in khuapi amu a akahkhum a, 42“Aw nangmah ngeiin tu nahun sung be`k in na khamuanna hung thei leteh maw! Hinanleh tuin jaw na muhlouhna dingin akiphualta hi! 43Ajiak hichibang nite natung ah a hungtung ding, na melmate in na kimkot in leikulh akhawh ding ua, na kimkawt in pawt theilouin ahung umkhum ding ua. 44Tualeh nang leh natate tualsatna in ahung nei ding ua, na sung ah suang khatbek kithuap in a nusia kei ding uh; ahung kivehlai na theihlouh jiakin chi in!”

Jesu`n Pasian tempul a suksiangna

(Mat. 21.12-17; Mrk. 11.15-19; Jhn. 2.13-22)

45Tuachi`n amah Pasian tempul sung ah alut a, siljuakte leh leite a hawlkhia a, 46akiang uah, “Ka inn ahihleh thumna inn kichi ding ahi, chih gelh ahi. hinanleh nou gutate kua in nabawl uhi!” achi hi. #Isa. 56.7; Jere. 7.11.

47Tualeh aman niteng in tempul ah thu ahilh a, hinanleh siampite, laigelhmite leh mipi lamkaiten amah sukmang atum uhi, #Luk. 21.37. 48hinanleh mipi jousiahin lunglut tak a athu angaihkhiat jing jiak un alawhna ding dan atheikei uhi.

Atualmente Selecionado:

LUKA 19: THKHBSI

Destaque

Copiar