JOHAN 3

Jesu leh Nikodem houlimna

1Pharisaite lak a mi amin Nikodem kichi Juda vaihawmtu khat a om a. 2Amah jan in Jesu kiangah a hungpai a, a kiangah, “Rabbi, Pasian akipan a siapa ding a hungpai nahi chih kung thei uhi. Ajiak Pasian akiang a aom keileh na sillamdang bawlte kuaman a bawlthei kei ding,” achi hi.

3Jesu`n adawng a akiang ah, “Adiktak in adiktak in, kung hilh ahi: mi kuapeuh apianthak keileh Pasian gam amukei ding hi,” achi a.

4Nikodem in a kiangah, “Mi atek nung in bangchi`n a piangthei dia? Anu sung ah nihvei lut in a piangthei ding maw!” achi a.

5“Adiktak in, kung hilh ahi, mi kuapeuh tui a leh kha a apianthak keileh Pasian gam alutkei ding hi. 6Sa-a piang taphot sa-a ahi a, Kha-a piang taphot Kha-a ahi. 7Na pianthak ngeingei ding ahi na kiang a kungchih lamdang saken. 8Huih a utna na ah alang a, agin naja hi, hinanleh khoia kipan a hungpai ahia, khoilam a pai ding ahia chih na theikei. Kuapeuh Kha-a piangte tuachi bang ahi,” achi hi.

9Nikodem in adawng a, akiang ah, “Hihsilte bangchi`n ahithei dia?” achi a.

10Jesu`n adawng a, akiang ah, “Israelte siapa nahi a hih silte theilou nave maw? 11Adiktak in kung hilh ahi: kou ka theih uh ka gen ua ka muh uh ka theisak uhi; hinanleh ka thu theihsak uh nasang kei uhi. 12Leitung silte kung hilh bawn gingtalou nahih uleh van lam silte hung hilh leng bang chi`n na gingta ding ua? 13Van a pat a hung kumsuk mihing Tapa van a om chihlouh kuamah van ah akah ngai naikei hi.”

14Tualeh Mosi-in gamdai a gul akhai kang mahbang in mihing Tapa zong khaikang in aom ding hi, #Num. 21.9. 15kuahileh amah gingta in mangthang lou a khantawn a hinna aneih jawkna ding un. 16Ajiak Pasian in hih leitung a it mahmah a, tuachi`n a Tapa tang neihsun apia hi, tuachia kuahileh amah gingtate mangthang lou a tangtawn hinna a neizawkna ding un.#3.16: Hih leitung=Hih leitung mite chihna ahi chia ngaihsut ding ahi. 17Leitung siamlouh tangsak dingin Pasian in a Tapa a sawlkei, leitung amah jiak a hundam a hihtheihna dingin a sawljaw hi.

18Kuahileh amah gingtate siamlouh tansak in aom kei ding a, hinanleh a gingtaloute pen siamlouh tansak khit ahi ta, Pasian Tapa tangkhat min a gintatlouh jiak in. 19Tualeh hih siamlouh tanna ahi, vak leitung ah a hungpai a, hinanleh mi`n vak sang in mial a itjaw uh, a silbawlte uh agitlouh jiak in. 20Ajiak kuahileh silgillou bawl in vak ahua ua, tualeh vak ah zong apai nuam kei uhi; atuachih keileh a silbawl uh alang kha ding. 21Hinanleh kuahileh sildik bawlte pen vak ah ahung pai ua, a silbawlte uh Pasian jiaka bawl ahi chih alattheihna ding in.

Jesu leh Johan

22Hih silte zoh in Jesu a nungjuite tawh Judea gam ah a hungpai ua, huasan ah amauh tawh aom jing a, tualeh a baptis hi. 23Tualeh Johan in zong Salim gei Ainon ah a baptis a, huasan a tui atamjiak in, tualeh amauh a hungpai ua, baptisma atang uhi. 24Ajiak huahun laiin Johan thong ah aki khum naikei hi. #Mat. 14.3; Mrk. 6.17; Luk. 3.19,20.

25Tuachi`n Johan nungjuite leh Judate kikal ah ki siansuahna thu ah kinialna ahung omta a. 26Tualeh amauhte Johan kiangah a hungpai ua, akiang ah, “Rabbi, Jordan gal a na kiang a om, a tanchin na theihpih pa`n, ngaiin, huapa`n baptisma a tangsak a, mijousiah a kiangah a hungpai uh!” achi ua.

27Johan in adawng a, “Van a kipan a piak ahihkeileh mihing in bangmah a bawlthei kei. 28‘Kei Krist ka hikei a, ama-a sawl ka hijaw chih nou mahmah in nung theihpih uhi.’ #Jhn. 1.20. 29Mouneipa pen mou pasal ahi a, hinanleh mouneipa lawmpa, akiang a ding a athu ngaikhia tuh mouneipa aw jiakin akipak mahmah ding hi. Tuajiakin hih ka kipahna abukimta hi. 30Amah akhangtou semsem ding a keipen ka kiamsuk semsem ding hi.”

Van a kipan a hungpaipa

31Tunglam a kipan a hungpaipa pen mi jousiah tung a ahi a; leia piangjaw leimi ahi, tualeh leithu agen hi, van a kipan a hungpaipa pen mijousiah tung a ahi. 32Tualeh amuh leh ajakte aman a theisak jel hi, kuaman athu theihsak a taksan kei uhi. 33Kuahileh athu theihsak taksan in Pasian midik ahi chih akipsak hi. 34Ajiak Pasian sawl in Pasian thu agen hi; Pasian inlah a kiangah Kha teh sese in apia kei hi. 35Pa in Tapa it a, akhut ah sil jousiah apiata hi. #Mat. 11.27; Luk. 10.22. 36Kuapeuh Tapa gingta in tangtawn hinna aneita, kuapeuh Tapa gingta lou in hinna amu kei ding a, Pasian hehna atung ah aom jing jaw ding hi, achi hi.

Atualmente Selecionado:

JOHAN 3: THKHBSI

Destaque

Copiar