Luke 22

Jesu Tha Nading Tohgon

(Matt 26:1-5; Mrk 14:1-2; Jhn 11:45-53)

1 # Pot 12:1-27. Chuin kalchuh kut atiu cholsolou changlhah kut chu anaitan ahi. 2Chuin thempu pipuiho le danthu sunhon ama chu atha theina dingje aholtauvin ahi; ijeh-inem itile miho chu akichauvin ahi.

Jesu Johdoh Dinga Juda Anop

(Matt 26:14-16; Mrk 14:10-11)

3Chuin somleni lah-a Iscariot atiu Judas sunga chun Satan aluttan ahi. 4Ama chu achen thempu pipuiho le houvaipoho toh ama chu amaho amatsah theina dingje chu akihou taovin ahi. 5Chuin amaho akipah-un, ama chu sum peh dingin atep taove. 6Hichea chun ama anomin, chule mipi umlou petcha aman ama chu amaho henga pehdoh-a matsahna thei ding agomkom aholtan ahi.

Kalchuh Kut An Nehding Agonu

(Matt 26:17-25; Mrk 14:12-21; Jhn 13:21-30)

7Chuin kalchuh kutna kelngoi thana ding, cholsolou changlhah nikho chu ahung lhungtan. 8Chuin aman Peter le John asolin, Chelhonin lang kalchuh kut ineh dingu gago lhonin, ati.

9Chuin amanin, Hoikoma gago lhonleng nalungham? ati lhone.

10Aman ajah lhona, Ve lhonin, nangni khopi sung nalut lut lhonle twibel pu-a mi khattoh nakisuhto lhon ding ahi; ama nung chu jui lhonin, alutna in'ah lut lhonin. 11Chule hiche in neipa jah-a chun, Houhilin nangma henga hitin aseije, Kaseijuite toh kalchuh kut an kanehna ding indan chu hoilaiham? ati, gati lhonin. 12Chule amapa chun in dan chungnung lentah gotsadem khat navetsah lhon ding ahi; hikoma chun anago lhontan, ati.

13Chuin amani ache lhonin, aman ajah lhona aseibang bang chun agatoh lhonin, kalchuh kut agagong lhontan ahi.

Pakai Jan An Jon

(Matt 26:26-30; Mrk 14:22-26; 1 Cor 11:23-25)

14Chuin aphat alhinin, ankong aumtan, chule solchah somleni ho chun aum piuvin ahi. 15Chuin aman ajah uva, Kathohgim masanga nang hotoh kalchuh kut an nehkhom ding hi katup lheh jenge. 16Ijeh-inem itile nangho jah-a kasei ahi, Pathen lenggama hiche hi aguilhun masangse-a kaneh lou ding ahitai, ati.

17Chuin aman khon chu alan, athangvah-in, Hiche hi kilah unlang kihom-un; 18Ijeh-inem itile kaseipeh nahiuve, Pathen lenggam hung lhun kahse-a, keiman tukala lengpiga twi kadon lou ding ahitai, ati.

19Chuin changlhah alan, athangvah-in, ahehbal balin, amaho chu apen, Hiche hi nangho dinga kipe-a katahsa ahi; keima neihet jingna dingun hiche hi bolun, ati. 20#Jer 31:31-34. Chuin chutima chun khon chu alan a-anneh jouvun, Hiche khon hi kathisana kitepna thah, nangho dinga kisodoh chu ahi.

21 # Labu 41:9. Ahivanginla, veuvin, eipedoh-a pang dingpa khut chu dokhanga hin keitoh kaum khome. 22Mihem Chapa chu akigon banga chonpeh ding ahi; ahivangin apedoh-a pang mipa chu adana-e! ati.

23Chuin amahon alah uva chutobang thilbol ding chu koipen ahi dingu akidongto taovin ahi.

Koichu Alen Ham Tia Kinelna

24 # Matt 18:1; Mrk 9:34; Luk 9:46. Chuin alah uva koipen chu achungnung penin akiseidem tia kinelna asohdoh tan ahi. 25#Matt 20:25-27; 10:41-42. Chuin aman ajah uva, Chidang namdangho lengho khu achunguva alal lheh-un; chule achunguva thunei ho khu phatna bol akitiuve. 26#Matt 23:11; Mrk 9:35. Nangho vang nachuti lou dingu ahi; ahin nalah uva alenjo chu aneojo bangin umhen, chule apipen chu lhachale bangin umhen. 27#Jhn 13:12-15. Ijeh-inem itile ankonga toule alhachale koijoh lenjo-em? Ankonga toujoh chu hilouham? Ahinla keima nangho lah-a lhachale bangin kaume.

28Ahivangin eiki patepna-a eiumpi jingpeh nangho nahiuve. 29Chule ka Pan keima eigotpeh banga, keiman nangho lenggam khat kagotpeh nahiuve; 30#Matt 19:28. Chutia chu kagam sunga kadokhang chunga naneh-a nadon uva, chule nangho lal touna-a natou uva Israel phung somle phung ni thu natan dingu ahi.

Jesu'n Peter'in Aseilep Dinga Seimasah

(Matt 26:31-35; Mrk 14:27-31; Jhn 13:36-38)

31Chuin Pakaiyin aseijin, Simon, Simon, ven, chang kilhichil banga lhitchil dingin Satan'in nathume; 32Ahivangin natahsan alosam louna dingin kataopeh-e: chule nangman nalung nahei kit nungle nasopiteho jong naphudet ding ahi, ati.

33Chuin aman ajah-a, Pakai, nangma toh songkul le thina-a chetha dinga kigosa dema umjing kahi, ati.

34Chuin aman ajah-a, Peter, kaseipeh nahi, nangman keima neihet hi thumvei naseilep masangse-a tunia ahchal khong lou ding ahi, ati.

Sumdip, Sakhao, Chule Chemjam

35 # Matt 10:9-10; Mrk 6:8-9; Luk 9:3; 10:4. Chuin aman amaho jah-a, Keiman nangho kengchot selou, sumbom keng lou, chule sakhao keng louva kasoluva chu ima nalhahsam nao umji-am? ati. Chuin amahon, Aumjipoi, atiuve.

36Chuin aman ajah uva, Tu vangin sumbom nei neijan kiken hen; chutima chun sakhao jong kiken hen; chule chemjam nei lou louvan asangkhol johhen, chemjam khat kichoh hen. 37#Isai 53:12. Ijeh-inem itile kaseipeh nahiuve, Ama michonseho toh kisimtha ahitai, tia thu kisun chu kachunga guilhung sohkei ding ahi; ijeh-inem itile keima chungchang thudol chengse kichaisoh ding ahitai, ati.

38Chuin amahon, Pakai, hikoma chemjam ni aume, atiuve. Aman, Hichu aphasetne, ati.

Olivet Mola Jesu Atao

(Matt 26:36-46; Mrk 14:32-42)

39Chuin ama achonna ngai bangin apotdoh-in, Olivet molsanga achetan; aseijuiten jong anungnung ajuijun ahi. 40Chukom mun chu alhun phatnun, ajah uva, Lhepma nalhah louna dingun taovun, ati.

41Chuin ama songse phahna chan khat ache chonin, adilsun ataovin, 42Hepa, naphatsahle hiche khon hi kakoma konin chon mangin; ahivangin keima lunggot bang hi louvin nangma lunggot bangjoh hihen, ati. 43Chuin van'a konin vantil khat ahung kilah-in, thahat ahungpen ahi. 44Chuin aman na asa behseh jengin, guntah-in atao kittan; chule thisan aloma tolla valha bangin, a-ul thisanin along jengtan ahi.

45Chuin atao jouvin athoudoh-in aseijuite henga ahungin ahile, amaho lungkhama ana-imutlhuh-u ahungtoh-in, 46Ajah uva, Nangho ibola ihmua nahiuvem? Lhepna-a nalhah louna dingun thouvun lang taovun, ati.

Jesu Amatnu

(Matt 26:47-56; Mrk 14:43-50; Jhn 18:3-11)

47Aman chutia asei pettah chun, veuvin, mipi hon khat ahungin, solchah somleni lah-a Judas atiu chu ahung lamkaijin; chuin ama chun Jesu chop dingin akom ahin naijin ahi. 48Ahin Jesu'n ajah-a, Vo Judas, Mihem Chapa hi chopma matsah nagot ham? ati.

49Chuin akimvela umho chun ipi aso ding chu amuvin, ajah-a, Pakai, chemjam'a kasat dingu hitam? atiuve. 50Chuin alah uva khatnin thempu chungnung sohpa asatle, abilkol jetlam asatlhatan ahi.

51Chuin Jesu'n ajah-a, Hichan beh hi phalun, ati. Chuin abilkol chu athamin aboldamtan ahi.

52Chuin aman dinga hung thempu pipuiho, houin ngah vaipoho, chule upaho jah-a chun, Gucha michom man dinga kon banga chemjamle moltum tho-a nahung konu ham? 53#Luk 19:47; 21:37. Nang hotoh niseh-a houin'a kaum lai chunla keima matnan nakhut nalha pouvin; amavang tu hi nangho phat le muthim thahat ahi, ati.

Peter'in Jesu Aseilep

(Matt 26:57-58,69-75; Mrk 14:53-54,66-72; Jhn 18:12-18,25-27)

54Chuin amahon ama amanun, thempu chungnung in lama akaitaove; chuin Peter'in galkanga ajuipeh-in ahi. 55Chuin amahon inpi leitol lailunga mei akitiuva atoukhom petnun, Peter jong amaho lah-a chun atouvin ahi. 56Ama meikoma atou pet chun soh nungah khatnin amun, hoitah-in aven, Hichepa jong hi akiloipi ahi, ati.

57Ahivangin aman ama chu aseilepmin, Numei ama chu kahepoi, ati.

58Ajo chomkhat jouvin, mi adang khatnin amun, ajah-a, Nang jong alah uva khat nahi, ati. Ahivangin, Peter'in, Mipa, keima kahipoi, ati.

59Chuin nidan khat jouvin michom dang khatnin atahti tenin, Tahbeh-in ama jong hi aloiho khat mong mong ahi; ijeh-inem itile ama hi Galilee mi ahi, ati.

60Ahivangin Peter'in, Mipa, nasei chu keiman kahehih hele, ati. Hichu asei nalaijin, hiche pettah chun ahchal akhongtan ahi. 61Chuin Pakai chu akiheijin, Peter lam aven ahi. Chuin Peter'in, Tunia ahchal khon masanga thumvei neiseilep ding ahi, tia Pakaiyin asei chu ageldoh-in, 62Chuin Peter polama apotnin lhasetah-in hakan akaptan ahi.

Jesu Totnopna Aneiju Le Ajepmu

(Matt 26:67-68; Mrk 14:65)

63Chuin Jesu manna tuhho chun ama chu totnopnan abolun, chule avovin ahi.

64Chuin ponin amit atomun, amai abehpeh-un, koiham nadenga chu gaovinlang seijin? atiuve.

65Chule ataitom ataitomun ama gotnan thu tamtah aseijun ahi.

Houvaipoloi Anga Jesu Apuiju

(Matt 26:59-66; Mrk 14:55-64; Jhn 18:19-24)

66Chuin jing khovah vah-in, miho upaho chengse, thempu pipuiho, chule danthu sunho chu ahung khomun, houvaipoloi kikhopna-a chun akaijun; 67Nangma Christa chu nahim? neisei peh-un, atiuve. Ahivangin aman amaho jah-a, Keiman nangho seipeh jongleu veng, natahsan lou dingu; 68Chule nadong jongleu veng, neidonbut lou dingu, lha jong neilhalou diu ahi. 69Ahivangin tua pat Mihem Chapa hi Pathen thilbolthei khut jet lama tou ding ahitai, ati.

70Chuin amahon abonchauvin adongun, Achutile nangma Pathen Chapa nahim? atiuve. Chuin aman ajah uva, Naseiju chu kahi, ati.

71Chuin amahon, Thu hettohsah dang iding iti tah dinguham? Ijeh inem itile eihotah-in aman akamcheng tah-a asei ijataove, atiuve.

Atualmente Selecionado:

Luke 22: THADBSI

Destaque

Copiar