METTHIU 3
3
Duiluploumei Jahon
(Mrk 1.1-8; Luk 3.1-8; Jhn 1.19-28)
1Mi douc tei duiluploumei Jahon Judia tuang tazikramv khou guangna, 2“lungh laic tho, Ravguangc guangcdic ana the,” twna dinc the.#Met 4.17; Mrk 1.15
3“‘Poubauhmei guang pw the,
kakhang chaeng sw tho,
kakhang chaeng sw ntyng tho,’
twna gaanv khat tazikramv khou kauc bam e,”
twna muhzwng Isaia rui saloumei tei kamei hei the.#Isa 40.3
4Jahon tei guaikuan hiw phey piu e, ramhgic bungkam kamc e, khatni nkav lev nwm khuaicdui rui kataek sw e.#2 Ki 1.8 5Jerusalem, Judia kapwm, khatni Jordan duiriang gaengv zaengv kapwm khou rui meic nunc kadaeng khou guang khwan e. 6Kaniw paap kalauhna, kaniw ta Jahon rui Jordan duiriang khou duiluplou khwan e.
7Pharisimei khatni Saddukimei meic mpeyna duiluplou khang guang bammei ta how la khou, Jahon rui kaniw khou sa the, “Nangniw nrui nac nunc! Guang nimei latzan khou rui pak la tho twna nangniw khou thow rui sa pwna cho?#Met 12.34; 23.33 8Nangniw tuang paap guay khou rui lungh laih the twmei taanv rui lyan pat ro. 9Aniw pu Abraham nai e guang nimei dandi khou rui duak puni de twna nangniw ning la riu. Mi ntauh guay ti hei Abraham nac nunc tiswlou nuh de.#Jhn 8.33 10Ntaw ni thing bang guay bangbi khou nrih lou bam the, kumna kathai gaymei nthai makmei bang guay ta tei gai bauna mai khou phaiclou puni.#Met 7.19
11“Nangniw lungh laic the twmei ndauhna, ai rui nangniw ta dui rui luplou the. Tiki akhang suangc daihmeipu athei khou guang e; ai thu katuang phaythuapc na sini sin tat khang biuhmei hamh e. Kamei rui nangniw ta Bumaengh Nthanmei rui khatni mai rui luplou puni. 12Kabaanc khou nzamh sin e; kagung guay tei laudy bamv khou rui hun ganc puni. Katak guay tei saamh khou phungc guang puni; kagung guay tei amit dat makmei mai khou ntei puni.”
Jisu Duilupmei
(Mrk 1.9-11; Luk 3.21-22)
13Duilup khang, Jisu Galili khou rui Jordan khou, Jahon daeng khou guang the. 14Tiki Jahon rui kata khaamna, “Nang rui ata duiluplou khang diki, ai rui luplou khang guang tu cho?” twna sa the.
15Jisu rui mundawna sa the, “Ntaw thu nuhlou tho; mi hei kumcna ravchaptatmei taanv mung guay tei taanc nthuihlou nina di the.” Khoutei Jahon nuhlou the.
16Jisu tei duiluploupui lev, dui khou rui thau dat the. Khoutei tingkauh laanc pat the, kumna Ravguangc Bumaengc akhouhna kumcna keyna kakhou towloumei ta kamei how the. 17Khoutei tingkauh thangc rui, “Mi hei ai rui nzianmei alung kwnmei nac mpouh e,” twna khwan akhat rui sa the.#Tha 22.2; Kal 2.7; Isa 42.1; Met 12.18; 17.5; Mrk 1.11; Luk 9.35
Atualmente Selecionado:
METTHIU 3: RONGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
