ZEKHARIYA 10
10
Apvüwa na Khushikeya Kekhishhi
1Leghe tsüwi Apvüwa wi atsankegho khielo. Apvüwa na atsankegho kulukeshü nu atsankeghozü kesun pi anyi tsüdi ghena alli ya mejjü yathsü ketenwa tsü. 2Anyithu na atsikezhü nu atusencüki kekhithu wi kecenkinali den, isala mathu na milikemesa nu ma men nkemi keluneng tsü muyaden. Pahan na aman khikemili isala tsüwa tsüna nthu ssi deja keten ketan; mathu na leben kecca jüh khukechiwa tsüna ma men nmi. Tsalina anyithu na khaghaneni ti deja benden. Accülikesawa nkemi ghena mathu na agükeccü wi benden.
3Apvüwa na khiben, “Hi asang inyithu miwi kekhang sen ketenthu miwi ilebentsu ben, nu hi mathu meten cüden. Judah nyithu tsüna iji, nu hi, Kemisintsa Apvüwa na mathu noncca yaden. Mathu na iji goru kekhang ntsathu saaben. 4Mathu ja wina kekhang kesenthu, accülikesathu nu benchüthu na shhugho inyithu noncca ben. 5Judah nyithu na süpahithu na mathu ghinyithu pi alentonti wi anisha wi cüten kesa ti sa nu khang yaden. Apvüwa na mathu ssiketen ghena mathu nyu ssisaben, nu mathu na ghinyithu goru nyithu lela chayaben.
6“Hi Judah nyithu sapi zü cüaben;
hi Israel nyithu kekasha yaben.
Hi mathu nantizen nu mathu tsüdi ssinu
ajjen wi kheneng ghoaben .
Mathu na hi khiela mathu meya mvula nkesa ti saben.
Hi Apvüwa mathu Nyiza,
hi mathu kekhie tsü luneng cüben.
7Israel nyithu na süpahithu ti züben,
anyithu na kisengtssü jjü pvü keten ti anongheben.
Mathu shicübvüghathu na khangkeya ha meshenya,
nu Apvüwa na mangwa sachi khe tsü ghena anonghe ben.
8“Hi inyithu cipi saghuyaben.
Hi mathu kekashaya nu mathu sapi kheni ti
ji ntsa sa thsüaben.
9Hi mathu pi mizzatentithu jawi bvüzighe
wa thsü lela,
alenkesie wi lela mathu na hi meshen benden.
Mathu nu mathu tsangathu na hang yaben,
nu mathu gweghe ajjen wi ghoaben .
10Egipt nu Assiriya wina hi mathu ssinu ajjen wi gho,
nu mathu ya mathu diyyi witsü ben wa thsüaden .
Hi mathu pi Gilead nu Lebanon wi la ben wa thsüaden;
anyithu na ayyi mabenla pong shaben.
11Mathu na khathansha wi atssükedone kedhu
tsü pvüdhi wa khe,
hi, Apvüwa na atssükedone kethukehi chithu
Nil Ghaku kedhu tsüna keqha waben.
Assiriya kekapvü tsü satemenia,
nu Egipt kekhang ntsawa na ma kekhang bhataghaben.
12Hi inyithu sapi zü cü,
mathu na hi kinyi nu ijühkina ben.’
Apvüwa na khidha.
Atualmente Selecionado:
ZEKHARIYA 10: RENGNBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.