MATHI 9

Jisu na Kecügüshü Kesü sa pi Mehaikecü

(Mrk 2.1-12; Luk 5.17-26)

1Jisu na ahun wi duya nu kheneng aghajü pvüdhi sen ma nyutiwa wi tsü wa. 2Ciwi anyi pahan na kecügüshü nyi kesü pi awe wi chi pienu ma wi gho. Jisu na mathu kenondi keben tsü muya theng nu kecügüshüwa wi khi, “Lebenzü yalo, itsawa! No kesami teshi pi no cüdha.”

3Ayenkesansithu pahan na mathu jawi khi, “Anyi hawa ha Anyiza kethenjüh khiben le!”

4Jisu na mathu kemeshen tsü chüya kesalina hati khi, “Mangkesa na nthu pala nkemehai hati meshen benten nu? 5‘No kesami teshi pi no cüdhale,’ nyelela ‘Shagha nu alentsen walo’ manyi khawa kekhiwa le nu? 6Isalethu hi Anyi Tsawa na ayyi wi kesami teshi pi cüya kemehai kekhang benle kesa pi nthu chüya thsüden.” Tsalina ma kecügüshüwa wi kiza, “Shagha nwekeshiphi pieya nu njjen wi whalo!”

7Isanan anyiwa tsüna shagha nu ma jjen wi wha. 8Anyithu na tsü kemu wi mathu messi nu Anyiza seng, kepaghenanye ma kekhang hati pi anyi cü theng.

Jisu na Mathi Cikeya

(Mrk 2.13-17; Luk 5.27-32)

9Jisu na apen tsü teshi theng nu kegoe wa nan khajana kekhü nyi kesü ma nyan Mathi kesa na ma kekuli jjen wi donki keben muya. Jisu na ma wi, “Hi nie ghalo” kiza. Mathi na shagha nu ma nie wa. 10#Luk 15.1,2. Jisu na wala Mathi jjen #9.10: Mathi jjen wi; nyelela ma (tsüna Jisu) jjen wi wi dsajjü keben wi khajana kekhüthu nu kesamithu kejonla gho Jisu nu ma sansikeyathu gweghe dsajjü ben. 11Farisithu pahan na ha muya theng nu ma sansikeyathu wi keü, “Mangkesa na nthu kesansiwa na khajana kekhüthu nu kesamithu gweghe dsajjü ben nu?”

12Jisu na mathu jüh tsü zaya nu luneng chi, “Anyi mehaitsü kebenthu na dawakechüwa nsenla mehai, isala tsüna kesakinaathu ghena. 13#Mat 12.7; Hos 6.6. Wala Ntsawajüh na hati khi keben ha jjügi chüyalo, ‘Hi nanketizenwa nen khe asahang pi ahhansha kesawa tsü nye.’ Hi ketsatanthu nyela kesamithu ciya le ghole.”

Kezi Cüki Kekeü

(Mrk 2.18-22; Luk 5.33-39)

14Johan Baptizwa sansikeyathu na Jisu wi ghonu ma keü, “Ikhang nu Farisithu na keshüthangla ziden, isala mangkesa na no sansikeyathu tsü zi nten nu?”

15Jisu na luneng, “Nthu keshanyi kemishu wi kijünyi thu na shanyiwa mathu gweghe keben chu ahathanathi ben thsüya mehai kwe? Tsüti saya nben! Isala mathu jawi na shanyiwa ssibvü kesa tsathang na ghoden, ciwi ccüna mathu na ziben.

16“Anyi thola athsü ketheü kesü pi kaghawen khhwen nten, kepaghenanye ketheüwa tsüna tsü mezüqhe sen pvü nu ma ku la sa pi dipfü thsüaben. 17Nyelela thola kisengtssü ketheü pi akhüti kaghawen wi chi nten, kepaghenanye tsüti sa lethu akhüti na pvükhhi nu kisengtssü khatsü, nu akhüti la yasaben. Tsüti kesawa nye kisengtssü ketheü tsü pi akhüti ketheü wi chithu manyi qho mehaitsü benden.”

Kediwa Nga nu Nza Kesü na Jisu Thsü Kedhenkechi

(Mrk 5.21-43; Luk 8.40-56)

18Jisu a ajüh khitu keben wi Judah nyi kedi kesü na gho ma tuwi akhhutsüdu nu khi, “Inga na shüdha, isala gho nkwen chang pi ma miwi chithu ma hang yaben”

19Jisu na shagha nu ma nie wa, nu ma sansikeyathu la ma gweghe wa.

20Nza kesü ma gwo wi amapi taghakeni ajjü keji keten nyi kesü na gho asengwa na Jisu thsü katen kidhenchi. 21Nzawa na ma ketanla khi, “Keujüla hi ma thsü ketanla kidhenya lethu, hi mehai yaben.”

22Jisu na khapeghe wa ma muya nu khi, “Inga, lebenzü yalo! No kenondi na no sa pi mehai cüdha.”

23Tsaseng wi Jisu na kediwa jjen wi wa. Ma wa keshü khwi sa keben nu anyithu na qai keben kemu wi 24ma khi, “Anyi tsüdila akhemi wi shhulo! Lanyiwa ha nshü isala ma jen benle!” Mathu na ma nankeqhe. 25Isala anyithu na bvü meyi Jisu na lanyiwa kejenpen wi du nu ma kwen zankichi, nu ma shagha. 26Ha cüki ha diyyi tsü kevü tsüdila khiwa.

Jisu Na Anyon Nkemu meshu Keni sa pi Mehaikecü

27Jisu na apen tsü teshi thengnu kegoe wa nan anyon nkemu meshu keni na ma niela magha nu khi, “David Tsawa, ishinyi nantizen chicülo!”

28Jisu na ajjen non wi du nan anyon nkemu keni tsüna ma wi gho, nu ma manyi wi keü, “Nshinyi na hi nshinyi sa pi mehai cü benle kesa nondi ben ma?” Manyi na “Anle, Apvüwa” khineng.

29Tsaseng wi Jisu na manyi nyon pa nu khichi, “Nshinyi kenondi tsüti sayalo!” — 30isanu manyi pala mu nengya. Jisu na manyi wi, “Ha pi thola nkiza lalo!” kesa kiza ntsa sachi.

31Isala manyi wala Jisu cüki khi pi diyyi ciwi tsüdila kepong sa chia.

Jisu na Ajühkhi nkeya nyi kesü sa pi Mehaikecü

32Anyithu na bvü keten wi anyi pahan na anyi kesü atsaghang ssi keten ghena ajüh khiya nketen ssinu Jisu wi gho. 33Isala atsaghang tsü jügüshi meyi anyi tsüwa na ajühkhi shagha nu anyi tsüdila amansa nu khi, “Ithu Israel wi khiela hati kesa mangla npi mu le!”

34 # Mat 10.25; 12.24; Mrk 3.22; Luk 11.15 Isala Farisithu na khi, “Hawa ha atsaghangthu jawi kediwa na kekhang pi ma cü nu ma atsaghangthu jügüshiya thsü benle!”

Jisu na Anyithu Nanketizen

35 # Mat 4.23; Mrk 1.39; Luk 4.44 Jisu na anyuti nu anyu tsüdila hhainan wa. Ma sinagogthu wi Kadiyyi cüki Ajühkemehaiwa pi nyu sansi, nu anyithu na kesakinaa nu khuma-khujü kepapa pvü ketenthu tsüdi sa pi mehai cü. 36#Scs 27.17; 1 Kad 22.17; 2 Kc 18.16; Ezk 34.5; Mrk 6.34. Ma anyitenti kemu wi ma leben güccüya, kepaghenanye mathu na ahathana nu kekiqa nmi, anenithu na kehiewa nkemi ti saben. 37Tsalina ma ma sansikeyathu wi kiza, “Alli kewwiqo na keti la ben, isala ciwi kekuli nyi na kezeng-u ketan. 38Tsalina alli pvüwa wi kekhie sanu ma yala kekuli nyi kejon kesun pi ma lli wwi thsülo.”

Atualmente Selecionado:

MATHI 9: RENGNBSI

Destaque

Copiar