MALAKHI 3
3
1 #
Mat 11.10; Mrk 1.2; Luk 1.76; 7.27. Kemisintsa Apvüwa na luneng, “Hi hi nyilo kesun pi ighena alenwa tsü kiden-keshaya thsüaden . Isalethu, nthu na ghang ketenwa Apvüwa na zulila ma Kekinyijjen witsü ghoben. Nthu na muya mvu keben nyilowa na gho nu hi cenkethenjüh pi thangchiaben.
2 #
Jol 2.11; Ccü 6.17. Isala thowa na ma kegho tsathang witsü ngan benya mehai nu? Thowa na ma gho lethu, hang benya mehai nu? Ma sapuno kekhang ti, amighe sametha keten anni kesü ti kesa. 3Ma satemetha nu rükatssü satemetha keten kesü ti ajühkaghaten ghoden. Amighe kecü nyi kesü na rükatssü nu suna mecang temetha keten ti Apvüwa nyilowa na keqhaikedithu tsü satemetha den, isanu mathu na kekinyithu kemeshon sennu Apvüwa wi gho thsü le kesalina. 4Isalethu, Judah nu Jerusalem nyithu na mathu kheni sa kegho ti kekinyithu sennu Apvüwa wi kegho tsü ma nenben.
5Kemisintsa Apvüwa na khiben, “Hi nthu jawi ghola ajühkaghaten den: nu hi wan kedema sa ketenthu, keqhezathu, milikemesa cüki kekhithu, mellidsa ketenthu kutimen mechu ketenthu, denyilethu, magha-maghangthu, nu asangthu miwi mathu ghena kekiyiwa saya ketenthu, nu hi kinyikü nketenthu tsüdi shunla khishiaben .
Gishü Tagha wi Kesü pi Kecü
6“Hi Apvüwa, nu khiela kemili nten. Tsalina no Jakob shicübvüghathu, nthu yasatha npi sa. 7Nthu na nthu tuwi nthu bamyithu ti iyenthu teshi nu tsüthu n-nieladha. khapeghe sennu hi wi gholo, isathu hi la nthu wi khapeghe ghoben. Isala nthu na keüden, ‘Ithu na no wi khapeghe ghole kesa mangwa nsathu yishü nu?’ 8Hi nthu keü kebenwa na, anyi kesü na Anyiza kemechu tsüna meshon ben kwe? Nyele, isala nthu na hi mechuben. Nthu na keüben, ‘Khati kesa wina nu?’ Gishü tagha wi kesü nu kekinyi khukechi jjügi wina. 9Nthu tsüdi miwi kishen-keshi na bendha. Kepaghenanye mizzatenti mabenla hi mechu ben. 10#Lev 27.30; Scs 18.21-24; Aye 12.6; 14.22-29; Neh 13.12. Nthu na gishü tagha wi kesü tsü maben sennu Kekinyijjen wi gholo, isanu ciwi kedsakejjü kejon benya thsü le kesalina. Hi ghan nanlo, isathu nthu na hi tangwi jjenkubhi sha chi nu kedsakejjü alen kepapa tsüdi meyisha pi nthu miwi pong kimenni sacü keben tsü nthu na muyaben. 11Hi pala gheithu ya nthu lli yasa thsü nben, nu nthu kemeshentsse llithu ya ma bi kejon bünya thsüben. 12Isalethu nthu yyi na kahang pen kemehai kesü saya keten ghena mizzatenti tsüdila nthu pi kemihhi ntsale ci waben.”
Anyiza na Nanketizen Kekhishi
13Apvüwa na khiben, “Nthu na icüki qhethiketen kesa khi. Isala nthu na keüben, ‘Ithu na ncüki mangwa khi nu?’ 14Nthu na khidha, ‘Anyiza kekuli kesa tsüna mangla nye. Ma khi kebenthu tsü kesa nyelela ithu na mangwa sadha khe tsü ghena ahathakina pi Apvüwa Kemisintsawa ccüca le kesa tsüna kemehai mangwa ben nu? 15Ithu na mukeben ti, anyi kekapvüthu na anonghethi saden. Anyi nkemehaithu na mehai kayi kesa ketan nyela mathu kekuli nkemehaithu sennu Anyiza lebenkesie tsü ghan nan nu pala makesü sa bvü neng den.’ ”
16Tsaseng wi anyi Apvüwa messi ketenthu na khokho keccünengli, nu Apvüwa na mathu na mangwa khi khe kina nu tsü zaya. Ma kete wi lesüshen kesü wi anyi thothu na Apvüwa messi nu kinyiküten khe tsü cüki zhüketheng na ben. 17Kemisintsa Apvüwa na khiben, “Mathu na inyithu saaben. Hi kuli keshagha tsathang wi mathu na iji ntsa saaben. Aba kesü na atsa ma kekuli sa ketenwa nantizen keten ti hi mathu nantizen cüaden . 18Inyithu na kheneng kuti anyi ketsatanwa nu gheshighenawa, anyi hi kekuli kesawa nu nkesawa jüwi kepapa mangwa khati saben khe muyaben.”
Atualmente Selecionado:
MALAKHI 3: RENGNBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.