MALAKHI 1
1
1Hawa ha Apvüwa na ketsijüh pi Malakhi cü nu pi Israel nyithu wi kiza thsü.
Apvüwa na Israel Nanketizen
2 #
Rom 9.13. #Isa 34.5-17; 63.1-6; Jer 49.7-22; Ezk 25.12-14; 35.1-15; Amo 1.11,12; Oba 1-14. Apvüwa na ma nyithu wi khiben, “Hi keshüthangla nthu ghali ghoben.”
Isala mathu na khineng, “No khati kaghali pi ithu ccüca nu?”
Apvüwa na luneng, “Esau nu Jakob ma cünyu, isala hi Jakob nu ma shicübvüghathu tizen, 3nu Esau nu ma shicübvüghathu nanmeghü le. Hi Esau yyishiphon diyyi tsü yasa nu ayyiwa tsü yisha pi aghangsathu cüa.”
4Keujüla Esau shicübvügha Edom nyithu na “Ithu nyutithu na yasadha, isala ithu na tsü sa nengya tenle” khi lethu, Apvüwa na luneng ben, “Mathu ya tsü sa neng thsülo— hi kheneng tsü pheghe cüden. Anyithu na tsüthu pi ‘Nkemehai diyyiwa’ nu ‘Apvüwa na anuphanla ma miwi aghepvü keben mizzatentiwa’ tsüti ciaden.”
5Israel nyithu na mathu ketanla mathu nyon pi ha muden, nu mathu na khiben, “Apvüwa na Israel yyi na ameiwa lela khang ntsawa le!”
Apvüwa na Keqhaikedithu Kha kechi
6Kemisintsa Apvüwa na keqhaikedithu wi khiben, “Atsa kesü na ma ba kinyikü den, nu amagha kesü na ma pvüwa kinyikü den. Hi nthu ba — nthu mangkesa na hi nkinyikü nu? Hi nthu Pvüwa — nthu mangkesa na hi nkü nu? Nthu na hi nkhichi sa, isala nthu na keüden, ‘Ithu na khatinu no nkhichi sa nu?’ 7Hati saben — atsse nkemetha pi hi kekinyipen miwi kekinyi wina. Isanu nthu na keüben, ‘Ithu na khatinu no nküla sa nu?’ Hi nthu kizaden — hi kekinyipen tsüpi ma men nkemi kesa wina. 8#Aye 15.21. Khathansha wi nthu na ahhansha sapi hi cüle asahang kesü ma nyon nkemu, kinaa, nyelela accü nkemehai sengho khe, nthu na tsüti kesa wi mangla kesazzi nmile meshenben kwe? Asahang tsüti kesa kesü pi ahng cü nanlo! Tsüti kesa wi ma nthu nen nyelela nthu kenmvu katsüha lela sacü ben kwe?”
9Tsalina khili, no keqhaikedithu, Anyiza na ithu ghena kemehaiwa salo keü nanlo. Ma nthu kekhie luneng cü nben, nu tsüna nthu kesazzi. 10Kemisintsa Apvüwa na khiben, “Hi nthu meshu kesü na wa kekinyijjen jenka tsü khen isanu hi kekinyipen wi anni ma men nkemi tsü ncanki thsüle nthu khen mvuben. Hi nthu nen nbendha; nthu na kekinyithu sennu hi wi kegho tsü hi ya nben. 11Ayyi ccügwen kesü na wa pahanwa kecu wi anyithu na hi kinyi ben. Apen tsüdi wi mathu na hankedemvu mecang pi hi kinyi nu keya qo ahhanshathu khuchi ben. Mathu tsüdila hi kinyikü ben le! 12Isala nthu na hi kekinyipenwa tsüna ma men nmile khi nu nthu nkeya mvu atsse pi tsü miwi kekinyi kesa wi nthu na hi kinyikü nben. 13Nthu na khiben, ‘Hathu tsüdi ghena ithu na khatila alidhamangdha nu!’ Nu nthu na hi nanwisa benden. Nthu na hi kinyile asahang ghanfükeya nyelela accü nkemehai nyelela kinaa kesü sengho hi cüben. Hi nthu wi tsü yaben le meshenben kwe? 14Ma sahang jawi kemehaiwa pi hi cüle khishia nu asahang ma men nkemiwa pi ahhansha sapi hi cüla mechu ketenwa miwi kishen-keshi ben ben le! Kepaghenanye hi kadimi kedi kesü, nu mizzatentithu wi anyi tsüdila hi messi den.”
Atualmente Selecionado:
MALAKHI 1: RENGNBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.