ADECHHÜ 3

Anyi Na Ajüh nkeya

1 # Ccü 12.9; 20.2 Apvüwa Anyiza na aghangsathu sa kechi jawi amaghangwa tsüna acho kepvü ntsawa. Amaghang na nzawa keü, “Anyiza na asanku wi kedsau bi mangla ndsa lalo no kiza kwe?”

2Nzawa khineng “Ma ishinyi na asanku wi kedsau bi tsüdila dsaya mehai; 3isala Anyiza kekhi na, ‘Nshinyi na achan asanku non wi kebenwa tsü ndsala nu tsü la nkidhenla, isalethu nshinyi shüaben’ tsüti kizale.” 4Amaghang na khineng “Tsü ntsakhiwa nye; nshinyi shü nben. 5Kepaghenanye Anyiza na chüben, nshinyi na kusi kedsau tsü dsa khe nshinyi nyon sha chi nu nshinyi la Anyiza ti kemehai-keteshi chüyaben.”#3.5: mangwa na mehai nu mangwa na nmehai khe chüya; nyelela tsüdila chüya.

6Tsaseng wi nzawa na achanton tsüna khatila tsimehai nu ma bi tsüna mehaiben khe muya nu ma metsa shaghaya mvuthi sa. Tsalina ma kedsau tsü lapi dsaya, nu gishü pahan pi ma wuba cü nu ma wuba la tsü dsaya. 7Manyi tsü dsaya meyi manyi nyon shachi cü nu manyi kemissü kesa chüya; tsalina manyi khhaghabvü wa du pi kewenkili pi manyi wheng bhonya.

8Minulen wi manyi Apvüwa Anyiza na asanku wi kegoe keten hhai zaya, nu manyi wa achan jawi ma kuthi wa. 9Isala Apvüwa Anyiza na npvüzawa tsü cichi nu khi, “No khiewa ben nu?” 10Ma khineng “Hi no asanku wi keten hhai zaya nu hi kemissü ghena no messi nu kuthi benle!”

11Anyiza na ma keü, “Thowa no kemisüle kiza nu? Hi no kedsau ndsa lalo kekhi tsü dsadha kwe?”

12Npvüzawa na khineng “No pi hi kaghanpfü sa kecü nzawa tsüna kedsau pi hi cü nu hi tsü dsadhale!”

13 # 2 Kor 11.3; 1 Ti 2.14. Apvüwa Anyiza na nzawa keü, “No mangkesa na tsüti sa nu?”

Nzawa na khineng “Amaghang na hi mechu pi tsü dsa thsüle!”

Anyiza jühkekaghaten

14Tsaseng wi Apvüwa Anyiza na amaghang kiza, “No ha ghena ketizensa den; aghangsathu tsüdi miwi no ketan kishen-keshi ha pvüden, khili nten npvü pi ayyi kizzanu kegoe, nu no kahang chu ayyinikhu dsaben. 15#Ccü 12.17 Hi no sapi nzawa nshinyi nankemeghüli thsüaden; nshinyi shicübvügha na keshüthangla nankemeghüli den. Ma shicübvügha na nli cücha cüben, nu no mathu ccümeccen #3.15: mathu ccümeccen; nyelela mathu shicübvügha mcüben.”

16Ma nzawa kiza, “Hi no yala atsanga kenpvü wi ketizensa nu kepvügha wi agüccü ntsa sa thsüden. Isalela no tsü miwi nwuba nmvuthi saben nu ma cakhu wi ben thsüben.”

17Kheneng ma npvüzawa kiza, “No nwubvü jühkina nu hi ndsa lalo kesa kedsau tsü dsadha. No tsüti kesa ghena hi kishencü pi ayyi miwi chidha. No kahang chu n-güccü ntsa kuli nu kedsakejjü muyaben. 18Ciwi kepagha nu aghazüthu na shhugho nu no aghangwen tsü dsaben. 19Ayyi pi no zhü ketheng ti no ayyi npi ceng neng kewa chu agüccü nu kekuli wi shishü nu ayyi miwi pala mu dsaben. Ayyi pi no zhütheng nu no ayyi ceng neng wa ben.”

20Adam #3.20:Adam; Anyan hawa ha Ibri jüh wi majjügi “anyi kahangli maben” na ma wubvü nyan pi Eve #3.20: Eve; Anyan hawa ha Ibri jüh wi “kahangli” kekhi hhai cheng ben, ha hisha wi “anyi kahang” khiben ciya, kepaghenanye ma anyi tsüdi jjawa. 21Apvüwa Anyiza na asahyu thsümeni saya nu pi Adam nu ma wubvü manyi mphi thsü.

Asanku Wina Adam nu Eve Manyi Kejügüshi

22Tsaseng wi Apvüwa Anyiza na khi, “Anyi na khilitsü ikhang ti sa nu kemehai-keteshi #3.22: kemehai-keteshi; nyelela pala tsüdi chü bendha chü bendha. Ma yala kahang chanton bi tsü dsanu anuphan hang thsü nten.” 23Tsalina Apvüwa Anyiza na Eden Sanku wina ma jügüshi nu kheni pi ma zhüketheng ayyiwa tsü ceng wa thsüa. 24Ma anyiwa jügüshi; nu Eden Sanku nishuwa tsü cherubim #3.24:cherubim; nyelela aghangsa agisha kepvü; Ajüh jjügi wi ghangchi. nu njünnu nnikeqhe apen tsüdi wila muya kemehaiwa tsüpi hie thsüa. Tsüna anyi thola kahang chanton tsüwa kete wi ngho thsüle kesalina.

Atualmente Selecionado:

ADECHHÜ 3: RENGNBSI

Destaque

Copiar