MATHI 7
7
Me Kemu Kefü
(Lk 6:37-38,41-44)
1“Hagun me kemu fü nya, tsonlo yatselo Sunggigü ko hagun kemu fü loho. 2Kechamvule hagun le pe me nmu keshü gü tsü lope hagun nmu niti; lo hagun le ndo keshügü tsü ndoni pe hagun tsüti. 3Lo nle nyuthyüo nnpvü nyhütyü ka senthün kebin gü rüchün mvuo, n sikezengü yhütyü nyu kerhu keshanyu le kebin gü nri hü nla? 4Nmvue nyuthyüo nyhütyü nyu senthün le kebin rüchün mvuo nzikezengü ka, ‘A no nyhütyü ka rükhü tsü kinla ta,’ tsonkethyü zolo gwa la? 5Nle kerokon kehü gü, n npvü nyhütyü ka senthün gü kinla richi, tsonlo yatselo tsüki we nle n sikezengü yhütyü nyu kerhu gü hyu tsentsülo-o kinla ti.
6“Tha kenshün pe tehi tsünya, lo tyü a-min ketsen pe tebo mhundyü ka shü nya, anyugun le anyun pha pe kedülao raniryüo nthu nishüe sha loho.
Hi, Fü Lo Kakhin Kekho Kethyü
(Lk 11:9-13)
7“Hi chi, lo khipe hagun tsüti, fü chi, lo hagun le hyulo ti. 8Kakhin kekho chi, lo khinshye pe hagun tsüti. Kechamvule temi ligü higüe hi kehünyu le hyulo hünyo; lo fü kehünyue hyulo hünyo. 9Lo kakhin kekho kehünyue khinshye pe tsüshü ti. Lo hagun dan nyu segü le a-nyu le tensü hilo, tso khipe tsü hü nla? 10Nmvue tsehü hilo, peri pe tsühü nla? 11Hagun serikemvunyue thakegwa pe hagun nyenyu ketsü jvü shalo, tsünyeki tsangge kebin hagun Pvü le thakegwa pe a-ka hi kehünyu tsüshü mvu ti ole?
12“Tsügenyu me le hagun ge nyu thyüshülo hagun kenyü hüyo, hagun ko me ge tsühontse thyüshü nye, kechamvule hile tejvü gü lo sidyükeshanyu jobin.
Chwida Kenrüngü
(Lk 13:24)
13“Hagun chwida kenrüngü nyu yülo chi, kechamvule kenke nyu gun kehü chwida le nmhun lo tson-e nne, lo temi kechon le tsünyu yü kehü genyu. 14Ai kerhün nyu kegun chwida tsüle nrün, lo a-tson le tsen, lo tsü hyukelo temi le rho.
A-sha Ge A-bin Shakelo
(Lk 6:43-44)
15“Kenku sidyükesha dan genyu petsülo, tsüdan le tanyü phinya ben-o hagun dan nyu ryüzhü nyo, ai phisin kiwe anyugun le me tenketyü teken dan me. 16Anyugun sha ge anyugun shalo ti. Me le tsehü bin ge vainsha lülo, nmvue hüron bin ge kherosha lülo hü ole? 17Tsühontse senbin kegwa lihie a-sha kegwa nshalo hünyo. Ai senbin gwakemvu le a-sha gwakemvu nsha hünyo. 18Sanbin kegwa nme le gwakemvu sha nsha loho, nmvue senbin gwakemvu nme le kegwasha nsha loho. 19Sanbin lihie kegwa nshalo hü kemvunyu gwen pe mah nyu shüla hünyo. 20Tsühontse a-sha ge hagun le anyugun sha loti.
Ale Hagun Shamvu
(Lk 13:25-27)
21“A ka, Npugü, Npugü, tse kehünyu aphu tsangge keda nyu yükü loho, ai tsangge kebin Apvü kendo zen kehünyu nti ti. 22Lo tsangkeben jon tsünyu temi kechon le aka, “Npugü, Npugü, ale nzan nyu sidyükesha jozo, Nzan nyu tero gwakemvu hüshwi, lo nzan nyu ndun kethyü tha kechon thyü mvu ole?” tson soti. 23Tsontsin a-le anyugun ka, Ale thame kae hagun shamvu le; hagun gwakemvu kethyü ju, hagun a nrhi tinla chi; tson lati.
Ka Kethyü Rüla Kenyhun
(Lk 6:47-49)
24“Tsügenyu ligü higüe ajo dan nyülo njüo tsü thyü lo zen kehü gü le temi kensü tsonye so ge a-ka thyükelo gü hontse ti. 25Tsangri tsüryü, züda ryü, lo tsangnbu ryüo ka tsügü gwün, ai gwünphünlo mvula; kechamvule ka tsügü le tsonye so ge thyü kela genyu.
26“Lo ligü higüe Ajo nyülo njüo tsü thyü, lo zen hükemvu gü le, temi kepho hachon so ge a-ka thyü kelogü hontse ti. 27Tsangri tsüryü, züda ryü, lo tsangnbu ryüo ka tsü gwün, tson-o gwünphünla; lo nke sala!”
Jisu Kekvu Le Kebin
(Mk 1:22)
28Lo Jisu le jo hidan hi zothüshü ntsin temi dan le a-senkethyü jo genyu anyugun dun thyüla. 29Kechamvule a-le lesükesha tsinnyu hontse mvuo a-kekvu kebin nyu nme hontse anyugun senthyü keshü genyu.
Atualmente Selecionado:
MATHI 7: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
