MATHI 14
14
Johan Baptist Gü Kesi
(Mk 6:14-29; Lk 9:7-9)
1Tsükatsü Hero le Jisu le zankechwi thyülo kela shalo-o a-gonyu dan ka; 2“Higü hile Johan Baptist gü so; a-le kesinyu dan nyu rhün nisoryü laso; lo tsügenyu ndun kethyü tho hi thyülo bin laso.”
3Lo Herod tsüle himhundyü a-sikezengü Filip nu Herodia genyu Johan tenlo njüo phin pe doka nyu shüla. 4Kechamvule Johan le a-ka, “Nle tenu tsügi lokethyü tsüle a-zü mvu, tsozo keshü genyu.” 5Lo Hero le Johan dushvula nyü keso ka temi dan nshvula, anyugun le a-le sidyükeshanyu nme letse kehü genyu.
6Ai Herod kenyu jon le gunryü ntsin Herodia nyu tenugi le me mhundyü ka nashü pe Herod kenyü thyüshü. 7Tsügenyu a-le tenunyu tsügi le tha lihi hi-e pe tsü titse swe-o zoshüla.
8Tsükatsü tenunyu tsügi le a-jvü jo zen-o a-ka, “Nle Johan Baptist gü pe khipe khun nme ka shü sen ryüo atsüshülo!”
9Tsontsin raja gü le a-nyun kenjün thyüla, ai a-keswe genyu lo mele ryüo a-ka nyu ho kebin nyu dan genyu khipe a-tsü titse zoshüla. 10Tson-o a-le me nishüo meno doka nyu Johan pe gwenlo. 11Tson-o pe khun nme ka shü sen gungü tenunyu tsügi tsüla. 12Lo Johan sikethen nyu dan le ryüo a-min pen gungü sunla; lo anyugun le gun gü Jisu ka zoshü.
Temi yie pvün Ginthyü Keshü
(Mk 6:30-44; Lk 9:10-17; Jn 6:1-14)
13Tsükatsü Jisu le jo tsü shalo njüo tsünyu tin-o run ge bin-o tehen nyu gunla. Tsontsin temi dan le a-le tinkela shalo njüo rünyi kedagü nyu tsonchü sen-o a-fü gun. 14Tsükatsü a-le tinchwi gü temi dan me hyulo-o anyugun shwinjün rilao anyugun kehokenyü thyü ngwa shü.
15Lo ngwün thyü gü zhüla ntsin senthyükelo dan le a-ki ryüo a-ka, “Hiki hile tehen so; lo tsangkeben jon-e güzhü laso; tsügenyu temi dan nishüo anyugun no gungü anyugun gin fütyülo gwünta,” tsonshü.
16Ai Jisu le anyugun ka, “Anyugun no tinla mvue gwa, hagun npvü anyugun gin thyülo!”
17Tsontsin anyugun le a-ka, “Agun le tensü pvün lo tsehü kenyhun tse sen kehü gwünzin a-me tsünyeki tha ndi.”
18Tsontsin a-le, “Tsü senryüo atsü shülo,” tsonshü 19Tson-o a-le temi dan no tehen ge binlo lotse zoshü; tsüselo a-le tensü pvün lo tsehü hvu tse khinselo njüo nyisogü tsangge nrilo-o jochü pe tsüge shü. Tso-o tensü dan boshwelo-o khipe senthyükelo dan tsüshü, lo senthyükelo dan ko khipe temi dan tsüshü. 20Lo anyugun aphu tsü tyü pe anyugun ginyü külo; lo anyugun le a-sen khü kequen shü ntsin khvütsü tseryü kenyhunche kesü khülo. 21Lo anyugun tsü ketyü dan, nche tenu simvu tse temi le yiepvün kho.
Jisu Le Zü Soge Tsonchü Kethyü
(Mk 6:45-52; Jn 6:15-21)
22Tsüsika Jisu le senthyükelo nyu dan no run nyu yülo njüo a-mhundyü zida gü kecha kipon külo lo tsela, a-le temi dan nishü ketse ka. 23Lo temi dan nishü kela siki, a-le a-npvü kazüthun ki kehithyü titse küla. Tson-o tsangzün ryüla,lo Jisu le a-npvü tse tsüge bin; 24lo tsügwünkho tsüle run gü le zida gü nyu nithen sa gunla, zü kenkhen no pvü kezen sen-o, kechamvule tsangkenbu le ryü tsügü ntsun-o whünlo kela genyu.
25Tsükatsü khejeki rikhun kelu pezigü ka a-le zida soge tsonchü sen-o anyugun ki ryü zhü. 26Tsontsin senthyükelo ju le a-le zü soge tsonchü ryü kezhü hyulo-o anyugun kerüshvu la. Anyugun le zo-o, “Hile rümen nme so!” tson-o nshvuo nra senshü.
27Tsontsin Jisu le anyugun ko-o, “Hagun nyun pechelo, Ale le; nshvu nyalo.”
28Tsontsin Pitor le a-ka, “Npugü, Nle yatselo, Nle ano zü soge tsonchü sen-o nki ryülo lotse zoshü ta.”
29Lo Jisu le a-ka, “Ryülo!” tsonshü ntsin Pitor le run nyu tsenryüo zü soge tsonchü sen-o Jisu ki ryü zhü. 30Ai a-le tsangkenbu hyushüo nshvu sala; tsükatsü a-le zü nyuki yüzhüla kethyü genyu nrao, “Npugü nle akenishülo!”
31Tsontsin Jisu le a-ben shwe chwigü a-nrhisülo-o a-ka, “Hire, ketenyen kerhogü! Nle nyuthyüo kenyuhvula hü nla?”
32Tson-o au le run nyu yülo ntsin tsangkenbu le ma tsela. 33Tsontsin run nyu kebin nyu le a-rüshvuo, “Nle Sunggigü Nyugü ketsin le!” tsonso.
Jisu Le Genesaret Ka Kehonyu Thyü Ngwakeshü
(Mk 6:53-56)
34Tsüsika anyugun le tsü nken chwio Genesaret tsekethyü nyu ryülo. 35Lo rünyi tsünyu kebin nyu le a-shalo ntsin anyugun le me nipe tsüte tsümhun kebin aphu ka shüo ho kebin nyu aphu zen-o a-ki ryü. 36Tson-o anyugun le a-ka, “Agun no nphishwe-e kesülo ta.” tson-o hiso; lo kesü kelonyu aphu gwa külo la.
Atualmente Selecionado:
MATHI 14: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
