MATHI 11

Johan Baptist gü Jolo

1Tsüselo Jisu le senthyükelo tseryü kenyhunche dan ka tha zothüshü kela siki a-le gun gü me rünyi nyu me senthyü lo jünzo shü.

2Tsüselo Johan le doka nyu Khrista gü tho shalo ntsin a-le senthyükelo ju nishü. 3Lo anyugun le a-ka, “Nle ryü titse kehü gü le? le agun no kecha khwen bin mon?” tson-o ketso. 4Tsüselo Jisu le anyugun ka, “Hagun gun gü hagun kesha kehyu aphu pe Johan ka zoshü nye. 5Yhükeponyu-e tha hyulo bin so, terotho nyue tsonchülo bin laso, nyun le ketyünyue nshün nilo bin laso, a-nyetin gwakemvunyue mekhwen nyülo bin laso, lo jolokegwa zope kendinyu hishü bin laso. 6Lo temi ligü higüe thakon nme kae a ge a-pha nsü kemvugü le jochü kepvü tsin; tsonshü nye!”

7Tsüsika temi tsüdan le tinla ntsin Jisu le Johan rüla zope temi dan hio, “Hagun le tehen nyu nyu nri titseo chwi la? tsangkenbu no whün kenulo kegwa nbo nme le? 8Le hagun le nyu shwi titse gunla? Temi phinya kegwagwa sen kehünyu le? Hire, temi a-phinya a-ni kensen ben kehünyu le rajanyu ka nyu bin hünyo. 9Ai hagun le nyu nri titse chwi la? Sidyükeshanyu nme nri titse ole? Ele, Ale hagun ka zotsentsü shüti, lo tsüntimvule sidyükeshanyu nyeki gonkvu kethyü nme. 10A-rüla nduka thu kenjü le: ‘Hire, nmhun kehyu mhundyü Ale a lilonyu nme nishü ti; lo a-le nmhundyü ntson ndoshü ti,’ tsonkeshü gü tsü le a-le le. 11Ale hagun ka zo tsentsü shüti, Tenunyu ge yhun keryü dan nyu Johan Baptist gü nyeki keda nme-e yhun soryü mvu; ai Sunggigü keda nyu keshen güe a-nye ki gon. 12Lo Johan Baptist gü keyhun ka ryüo ntsoka keti mele tsangge keda fü tserütsera bin laso, lo fü tserütsera kehünyu le khipe a-hon thyülo lotse bin laso. 13Kechamvule Johan le ryü kemvuthen sidyükeshanyu aphu lo tejvü gü nyue sidyükesha jo zo ryüo ti kethyü genyu. 14Hagun ko jo tsü tenyen lo nyü yatselo ryü titse kehü gü Elia tsüle Johan le nye. 15A-nyetin le bin-o nyü kehünyu no nyülo chi!

16“Ale ntso ntsenyünyu hipe nyu zen kendyü shüti la? Ntsenyu le hakethyü bin nyu binlo njüo, a-pvü ka, 17‘Agun le kheli khun pe ha hishüe, hale dathyülo mvu laso; agun le chüshüe, hale chü lomvu laso; tson kehünyu gwünzin.’ 18Tsühontse Johan le ryüo tyütsü mvu laryü mele a-le, ‘Tero gwakemvu kipon hü nle,’ tsonla. 19Temi Nyugü le ryüo tyütsü laryü, mele, ‘Hire, tha ketyünyun lo vain zukhin, khajana keshvunyu lo kemunyu pvünyu nme!’ tson hünyo. Ai thakesha tsüle ketsin tsekethyü a-tho le tsinshü hünyo.”

Tenyenkemvu Rünyi dan

(Lk 10:13-15)

20Tsükatsü a-le kekvu tho kechon thyükeshü rünyi nyu mele me nyunkelulo mvu kela genyu tsüdan nkhinla. 21“Che, Korasin nwe thyülo tiso! Che, Betsaida nko thyülo tiso! Hai rünyi nyu tha keda thyükeshü ju nduka Tur lo Sidon nyu thyüshü yatselo, au le ron phi lo jonbü sen-o ndukanyu nyunkelu lo ti atale. 22Ai ale hagun ka zo tsentsü shüti, ‘Ketsokethyü jon nyü hagun nyeki Tur lo Sodom kenjün kethyü we rho kvuti.’ 23Lo nle Kapernaum, nthyü ketetso pe tsang thun titse bin nle? Nthyü ketsenyo pe Hades nyu shü lati; kechamvule n rünyi ka tha keda thyükeshü dan Sodom nyu thyükeshü we, a-le nthu keti binlo nrün atale. 24Ai ale hagun ka zoshü ti, ‘Temi rüla ketso sokeryü nyü njün nyeki Sodom kazü nyu kebin dan we a-kenjün kethyü rho kvu ti.’ ”

A kiryüo Rüyülo

(Lk 10:21-22)

25Tsügwünkho ka Jisu le zo-o, “Hei, A pvü, tsang lo kazü Npugü, Nle thakeshanyu lo kekokepe nyu mhundyü nyu jo hidan kebu njüo nyuhonyu dan tesha keshü genyu Ale nshwen hünyo. 26Ketsin, Apvü nyhühyu ka we honkethyü le nkendo genyu.

27“Apvü le tha aphu khipe aben nyu shü laso; lo Apvü kemvu we temi nme-e Nyugü shahü mvu; tsühontse Nyugü npvü tsin pe me hishü kemvu we temi nme-e Apvü sha hümvu.

28“Hagun kenjünthyü lo hagun khvü kensu nyu aki ryülo; lo ale kebwen pe hagun tsüti. 29Hagun agunda kekhen pvülo, lo aka thashalo; kechamvule ale ajvü gwa, lo ale ketekho kemvu genyu, tsonlo yatselo hagun le nyunkebwen hyulo ti. 30Tsüntimvule agunda kekhen le pvü nne lo akhvü-e nshen.”

Atualmente Selecionado:

MATHI 11: REGSBSI

Destaque

Copiar