MALAKI 2
2
1Kekvutsin Npugü le püshükedanyu dan ka zohü, “Johokeshü higü hile hagun genyu: 2Hagun tho nyu arühvu mvu loshvu. Hagun le ajo nyümvu yatselo ale shochün senryü hagun ge shü ti. Hagun le keche hyukelo dan ge ale shochün pe shüti. Ale shochün pe tsüdan ge shü laso, hagun le a johokeshü rüchün ntsun shü kemvu genyu. 3Ale shaja pe hagun nyenyu tsüti lo hagun le pe rora kethyü senru dan vüpe hagun mhun nyen shüo methu vüthun nyu hagun süshwi lati. 4Tsüsiki nyu hagun le ale johokeshü hipe hagun tsütse sha loti, tson-o ale püshükedanyu lo Levi tsipwen zen kejozenkelo tsüno nrho la loho.
5“Kejozenkelo nyu ale kerhün lo kebwe pe anyugun tsüti tse zoshwishü kenjü hontse ale pe anyugun tsüshü, anyugun no a rühvu hü nrün genyu. Tsü gwünkho ka anyugun le arühvu lo a nshvu hü. 6Anyugun le njükemvu zo mvu le nyu le njüyo pe senthyü hü. Anyugun le azen kengü gwao yhun, anyugun le nyu le njüyo tsü kethyü ntimvu, ai temi kechon chepe no gwa kemvu tho khela. 7Sunggigü shaketsin kethyü pe senkethyü tsü le püshükedanyu tho. Temi dan no anyugun ki gü akendo shalo mvuloshvu, anyugun le Kekvutsin Npugü jolonyu genyu.
8“Ai ntsoka we hagun püshükedanyu dan le tson kenjü gü nyu ranitin laso. Hagun senkethyü le temi kechon tsontsin pe thyü zü bin laso. Hagun le ale hagun zen kejozenkelo gü borho laso. 9Tsügenyu ale Israel nyu thyüpe no hagun ntsü lati, hagun le a kendo zen mvu, lo hagun le me senkethyü ka aphu so ketun mvukela genyu.”
Temi dan le Sunggigü Mhundyünyu Ketsinthyümvu Kela
10Ngun aphu pvü le nme mvu ole? Ngun aphu nyhunkeshü Sunggigü le nme mvu ole? Tsonlo nyuthyüo ngun le khinyunyu ka ngun joshwikeshü borho, lo Sunggigü le ngun pvübon nyu zen kejozen kelo gü nkhin hü nla? 11Juda temi le Sunggigü ka anyugun zoshwishü kenjü borho lao Jerusalem lo kazü gü aphu nyu kenrin tho thyü laso. Anyugun le Npugü le so kehü Kershvuka gü nrhu la. Pechenyu dan le sinrünyi teromen rüshvu kehünyu tenunyu lo. 12Npugü no hihontse thyü kehünyu Israel nyu dan nyu khishwi lao, ngun senye le kerüshvu senryü Kekvutsin Npugü ketsü nyu thatho thyü sin nya lalo.
13Hagun le thyü kehü kecha nme le hi. Hagun le yhüphuche, chü, lo chechü pe Npugü kershvubin gü ntsen, a-le hagun le senryü a-ketsü kerüshvu dan lomvu kela genyu. 14A-le nyuthyüo tsü losin mvu layo tse hagun le ketso. Tsüle hagun le selo ka lokelo hagun nu ka joshwikeshü gü borho kela genyu. A-le n nizin gi, nle a-ge jo ketsin senhüti tse Sunggigü mhundyü nyu njoshü shüo borho laso. 15Sunggigü le hai thyü pe min nme lo kapu nme thyüshü mvu ole? Hinyu a-kerüchün nyu le bin la? Tsüle hai nyenyu Sunggigü temi ketsin no bin lo nrün genyu. Tsügenyu hagun nme-e a-nu zenkejoshü kebin borho mvu titse ndolo. 16“Ale kekhe kela tsü nrhi,” tse Israel nyu Npugü Sunggigü le zo. “Hagun le hagun nunyu ge rigwa kemvu tsü hontse kethyü tsü ale nrhi le. Hagun nunyu ge joketsin sen ti tse zoshwikeshü tsü borho mvu titse ndolo.”
Jokera Jon Gü Kho Nnikela
17Hagun kekenthon genyu Npugü le a hokeli laso. “Dihontse ngun genyu hokeli la ola?” tse hagun le ketso hü. Hagun le zo bin hü, “Kekvutsin Npugü le gwakemvu thyü kehünyu aphu gwa letse rüchün; a-le tsüdan shwi a-kenyü hü nle, nmvue kenjü Sunggigü le diki bin nla?” tse ketso bin hü nyo.
Atualmente Selecionado:
MALAKI 2: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.