LUK 24

Jisu Le Rhünni Keso

(Mt 28:1-10; Mk 16:1-8; Jn 20:1-10)

1Lo Sabbath jon keri nyü tsangben chwiryü nyeka tenunyu tsüdan le tharünkenyi ndo pe bin kenjü dan tsü sen-o sika ki ryü. 2Lo tsükatsü anyugun le tso lope sika kakhin thyü kenjü tsü le keto kela hyulo. 3Tson-o anyugun le sika nyu tsü yü ntsin, Npugü Jisu min tsüle tsünyu bin mvu kela hyulo. 4Lo anyugun le tha tsühontse kethyü tsü rüchün pe anyugun rhokedyü thyü bin ntsin, hire, temi mihvu le phinya kenchwü kenshwen sen-o anyugun khoka kebinhyulo. 5Tsüselo anyugun le nshvuo anyugun mhun pvü nkhün tsüla ntsin, temi tsühvu le anyugun ka, “Hagun le nyuthyüo kesinyu rhüniso kela gü fü hü nla? 6A-le hika ndi laso, ai a-le rhünniso laso. Hagun le a-le Galil nyu bin kehü ka hagun ka, ‘Temi Nyugü le meno a-ten pe kemunyu ben nyu shü lati. 7Tson-o krus ge meno a-hüla ti; ai a-le jonshen nyü rhünniso lati,’ tson kethyü hagun ka zokeshü jo tsü rüchünlo nye.”

8Tsüselo anyugun le a-le anyugun ka kezo jo tsü rüchünlo, 9njüo sika nyu rani gü jo tsü aphu pe tseryü nmeche dan ka lo kechanyu aphu kae zoshü. 10Lo tenunyu tsüdan tsüle Magdalin Maria, lo Jona lo Jakob au jvü Maria; lo tsüdan kemvu tenunyu kechanyu dan-e gü apostel nyu dan ka zo küshü. 11Ai apostel nyu dan le tenunyu dan jo tsü le jo kenrun nme letse kethyü rüchün-o tsüdan jo tenyen mvula. 12Ai Pitor le solo njüo tin gü sika nyu nkhüntsü gü nrishü ntsin linen phi le kebin nti hyulo; tson-o tha tsüdan rüchün pe a-dun thyüla njüo a-kaki nigun la.

Ema Ki Kegun Hvu

(Mk 16:12-13)

13Tsükatsü hire, mihvu le Ema tsekethyü Jerusalem nyeki furlong ja hentsero ki gunzhü. 14Lo tsükatsü au le tsügwünkho ka tha thyükela dan zokezen gunzhü. 15Lo au kenthon-o khinyunyu ka tha ketso kebin ka Jisu le au khonni gü au zen kethenlo la. 16Ai au no a-shamvulo nrün genyu au yhütyü thyü kecha thyüla. 17Lo tsükatsü Jisu le au ka, “Hai le tsonne nyu kera kehü tsüle nyu rüla zohü nla?” tson-o au ketso shü.

Tsüselo au le au mhun gwakemvu thyüo nma tse tinla. 18Lo au nme zan le Kleopa, tsügü le a-ka, “Njwen-o Jerusalem nyu ryü kebin nyu dan nyu hijonka thyü kela tsü rüla shakemvu le n nti se hile.”

19Tsüselo a-le au ka, “Nyu rüla letse?” tson-o ketsoni.

Lo au le a-ka, “Nazaretnyu Jisu, sidyükeshanyu nme, Sunggigü lo temi aphu mhundyü ka a-jo lo a-tho-e ndun thyü sa kethyü nyu nme rüla le. 20Lo peshükeda ju lo a-rünyi nyu pelünyu ju le a-ten pe me ben nyu shüo meno a-dushvula lotsela, tson-o meno krus ge a-hüla. 21Ai a-le Israel nyu rhinhilo titse kethyü gü ado tse kethyü agun le a-tenyen ryü le. Lo agun le kezo tsü ntimvule a-dushvu kela le nthu jonshen thyü laso. 22Lo agun lüginyu tenunyu dan me-e lonyü sika nyu gun-o niryüo anyugun jo genyu agun no agun dunthyü sa lale. 23Tsüdan le gü ai a-mi hyulo mvuo rani ryüo anyugun le tsangge lokethyünyu hyu letse zo-o, a-le rhünni sola sele tse kethyü pe tenunyu dan ka zo letse kethyü shalo. 24Lo agun ko peha le gü tenunyu ju le agun dan nyu kezo hontse kethyü hyushü letse zo bin nyo; tsüdan-e Jisu hyumvu letse kethyü zo,” tson zoshü.

25Tsonshü ntsin a-le au ka, “Hire, kepin nyu, sidyükeshanyu le zo kenjü tsü aphu hagun nyun le tsüe tenyenlo tsensa kehü dan! 26Khrista le tsühontse kenjünthyüo a-zan le gonlo zü mvu ole?” 27Tsüselo a-le Mosa lo sidyükeshanyu rüla zo teri so-o ketsin lesü nyu a-rüla thu kenjü tsü zo petsü sape au hishü.

28Lo au le gunti tse kebin rünyi gü tilo güzhü ntsin, a-le tsonda gü zen nphazhü la; 29tsügenyu au le a-khin tenge tseo, “Nle ayi zen-o bin tinla nye; tsang-e zün güzhü laso lo tsangkeben jon kechon gü le güla sele.” Tsügenyu a-ko au zen yügü tsünyu bin tinla. 30Tson-o a-le au zen tyütsü titseo bin kelo ka a-le tensü khi senlo njüo Sunggigü shwen shüo boshwen pe au tsüshü. 31Tsüselo au yhütyü le ntsen chwiryülo, tson-o au le a-shalo; tsonlo ntsin au no a-hyu sinmvula. 32Tsügenyu au le au npvü kenthon-o, “A-le tsonne nyu nnyi nthon ketseka a-le ketsin lesü tsin pe nnyi hi kebin ka tsü nnyi nyun nyenbün pvü hü mvu ole?” tson sola.

33Tsüselo au le tsügwünkho katsü Jerusalem nyu raniryü ntsin, tseryü nmeche ju lo npvünyu ju le gü kequen kebin hyulo. 34Lo anyugun le, “Npugü le rhünni sola ketsin machi! Lo Simon ko no a-hyu le!”

35Tsüselo au ko tsonne nyu thyükela tsü lo a-le tensü boshwen pe au tsü keshü ka au le a-sha kelo rüla pe anyugun ka zoshü.

Senthyükelonyu dan No Jisu Kehyu

(Mt 28:16-20; Mk 16:14-18; Jn 20:19-23; Apo 1:6-8)

36Tson-o anyugun le jo tsühontse kethyü kenthon kebin katsü Jisu le yüryü anyugun dan nyu binlo njüo, “Hagun kegwa gü thyülo nye!” tsonshü.

37Ai anyugun le tsüle kapu nme hyula sele tseo nshvu pe ketetsin thyü sola. 38Tsüselo Jisu le anyugun ka, “Hagun le nyuthyüo hagun nyun nshen hü nla? Lo nyuthyüo tenyenkemvu nyun pvü hü nla? 39Ale le, hagun le a pha lo aben nrilo re; a kesüo ashwi salo. Kapu le a-thyü lo a-ru ndi, ai hagun le a-kehyu we awe tsüdan tsü bin kü.”

40Tson-o a-le jo tsü zokeshü sika a-le a-ben lo a-pha pe anyugun hishü. 41Ai anyugun le anyugun shekerhün pvüo tenyenlo hola ntsin, a-le anyugun ka, “Hagun le ketyüketsü peha sen hü le?” tson-o ketsoshü. 42Tsüselo anyugun le tsehü keshvu pvü kehü sime lope a-tsüshü, 43tsüselo a-le tsü khilo njüo anyugun mhundyü ka tsü khityü pe anyugun hishü.

44Tson-o a-le anyugun ka, “Mosa jvü nyu lo sidyükeshanyu lesü nyu lo Lü lesü nyu a rüla thu pe bin kenjü tsü, aphu thyü penlo mvulo shvu tsekethyü ale hagun zen kebin ka hagun ka zokeshü ajo le hile nye.”

45Tson-o a-le anyugun no ketsin lesü shalo nrün genyu anyugunnyun khinshye shü. 46Tson-o a-le anyugun ka, “Khrista le kenjünthyüo tsüsiki jonshen nyü rhünniso lati, 47lo Jerusalem nyu bin zenlo njüo temi kebin aphu mhundyü nyu nyunkelukelo lo kemu jülo lotse kethyü a-zan nyu zope hiti. 48Tsonkethyü thu njü, lo hagun le jo tsüdan jünkezonyu sele nye. 49Lo hire, Ale Apvü le khishü titse kethyü gü nipe hagun ki shüti; ai hagun le tsangge kekvu hyulo kemvuthen rünyi nyida (Jerusalem) nyu bin tse nye!” tsonshü.

Jisu Zen-o Tsangge Kükela

(Mk 16:19-20; Apo 1:9-11)

50Tsüselo a-le anyugun zen-o Bethani kentsun denzin gü, a-ben hvu shwenshüo jochü pe anyugun tsü. 51Lo a-le jochü pe anyugun tsü kebin ka, a-le anyugun zen kekhola; tson-o a-zen-o tsangge küla. 52Tsükatsü anyugun le a-rüshvushüo, anyugun shekerhün thyü sen-o Jerusalem nyu gunla. 53Tson-o anyugun le Kershvuka nyu tsü Sunggigü rüshvuo A-shwen zin bin tinla.

Atualmente Selecionado:

LUK 24: REGSBSI

Destaque

Copiar