HABAKKUK 2
2
Npugü le Habakkuk Jo Kenikeshü
1Ale tha pen kehü binjwe ki külo-o Npugü le ale kenyo keshü jo kenio ano nyu zolo tse tiyo lo nyu khishü tiyo nriti.
2Npugü le hihontse kenishü: “Ale khipe nhikeshü tsü lope nnyon pon gen thulo, tsüno gwengwa nrikeshü ka swülo nrün genyu. 3Tsü lope thu ntse, tsüle thyüpen kelo gwenkho mvu zun kethyü genyu. Ai ale khipe nhikeshü tsü ketsin thyüpenla nrün gwenkho le whütse ryüjü laso. Tsüle nyajü ryükejü hontse, ai khwen tse, tsüle thyüla tsen tsüti, tson-o ntsü la loho. 4Lo jolo le higü: ‘Gwakemvu nyu le rhün loho, ai kemitsin nyu le rhün loti, anyugun le Sunggigü ka joketsin sen kehü genyu.’ ”
Kemitsin kemvu nyu Genyu Thyülo Tiso
5Kenya le nseme lahü. Tha nchvukehü nyule ketekho lo sunlo mvu, kesi hontse anyugun le rünyula hümvu. Tsügenyu anyugun le senye dan nkhen pe anyugun hon thyü nini lohü. 6Mele lolo kela dan le anyugun lokela dan ge anyugun nyunta lo a-nyun nrao hihontse zoti, “Hagun le hagun hon kemvu khilo hü, ai hagun we thyülo tiso! Dithen laki hagun le hagun pu pvü kebin nyu no thokeshü nyu nnya bin lomon?”
7Ai hagun le tsü shalo kemvu ka, hagun meso kvukelonyu le tepu pvüo mele tenge hagun no akechwi pe tsülo tseti. Shwikerüchün nyu le ryülo hagun le ndün ti. Anyugun le hagun hon khilo ti! 8Hagun le senye kechon kenya khilo, ai rhün kelonyu le hagun le me dukeshvu lo thagwakemvu thyüpe kazü lo tsünyu nyida dan ntsun kethyü genyu hagun nke lati.
9Nwe thyüloso! Nle nron thyüo khikelo pe nkami no nnyalo laso, kenthyü kendon lo kenshvu nyu nka ntsenlo titse bin aila! 10Ai nle rhikebin le kejokepvü senryüo nkami gen shü laso; senye kechon nkekela genyu kenke senryüo n npvü ngen shü laso. 11Kabon gen tso dan-e nrao hagun ntsun bin, lo katsen dan ki-e tsükhwen le chwiryü.
12N we thyü loso! Nle serikemvu gen nnyida bin zenlo, lo me dushvuo tsü thyülo. 13Nle a-so kvulokela senye dan le kenjün thyü laso, lo anyugun le thyükela aphu mah kenyü nyu ndi laso. Kekvutsin Npugü le hi thyüshü. 14Ai kazü gü we zü le zida kesüthyü kebin hontse Npugü zankechwi thakesha pe sübin ti.
15N we thyü loso! Nnyunkenthün nyu nkazon nyu kemeni lo no kejopvü la, nle anyugun thyüpe zü tsüo nzeü kebin hontse kezekego. 16Tsühontse nko kerühvu sunka kekeja pe nje loti. Nle n npvü zu tsüo kezekego ti. Npugü le nno nnpvü shaja honpen tsü, lo nkerühvu kelu pe kejokepvü thyü lati. 17Nle Lebanon chün güla; tsügenyu ndushe lati. Nle tsünyu tehenthyü dan boshvu, tsügenyu nyukhu dan le nthyü pe nshvu shüti. Tsü le thyüti, kechamvule nle me boshvu lo thatho gwakemvu thyüpe kazünyu temi dan lo nyida dan ntsun kethyü genyu.
18Teromen kezü sen mvulo keshvu a-kon nyule bin la? Tsüle temi le thyükelo gwenzin, lo tsüle kenku nti ame thame pe nka zolo hümvu. Jo zolokemvu men nme le a-thyükeshü gü le a-tenyenlo kegwa nyu thyü lola! 19N we thyü loso! Nle tesen pen nme ka, “Chon solo!” nmvue tso thün nme ka, “Soryü lo!” tson hü nyo. Teromen kezü nmele tha pe nteshalo gwa le? Tsü le rakagi lo suna pe jela bin logwa, ai a-gen kerhün ndi.
20Npugü le a-kershvuka kenshün gü nyu bin; kazü nyu temi lihigü-e a-mhundyü nyu matse binlo.
Atualmente Selecionado:
HABAKKUK 2: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.