Yohana 20

Yesu afufuka.

1-8.

1Mhitu wa hosi wa juma Maliya Magadalene azahita makelokelo kwe mbila, kukena lwiza; akibula azaona, kuti jiya iwe jiiushiγwe he mbila. 2Ne ahofikahita na kuγuluka kwa Simoni Petelo na kwa yuja mhina, Yesu amkundisheye, awati: Wazamwinula Zumbe mwe ija mbila, nkatitaila, wamwikileho. 3Petelo na yuja mhina mtuhu wazalawa, wazahita kwe mbila. 4Awa waili wazaγuluka makiṅwe; yuja mhina mtuhu azamhota Petelo na kuγuluka, azalongola kuhula kwe mbila, 5akishungila azaona ziya shuke, ziiikonyiγwe, miya nkaingile. 6Simoni Petelo azashilikiza kuhula, azaingila mwe mbila, azaona ziya shuke, 7ziikiγwe, kangi uja mhaluma, akantiγwewo nawo mutwi, nkauikiγwe haṅwe na ziya shuke, miya uikonyiγwe, uiikiγwe hantu hakwe nkandai. 8Hatayuja mhina mtuhu alongoleye kubula kwe mbila, azaingila yohena, azaviona, azatozesha. 9Hambu nkawazati wataile uja ugondengwa wa kuγamba: Shuti afufuke kwa wafilewo. 10Waja wahina wazauya na kwawe.

Maliya Magadalene. Petelo na Yohana.

11Maliya aiγoloke se he mbila, alila. Aho akilila azashungila mwe mbila, 12azaona walau waili wazwikilewo shuke zeṅala, waiikale, muṅwe haja he mutwi, muṅwe haja he milundi, ndiho kimba cha Yesu chiikiγwe. 13Waja wamuti: Mlala, ulilai? Awati: Kwa kuti wazamwinula Zumbe ywangu, kangi sitaila, wamwikileho. 14Akilonga ivyoho azahituka na nyuma, azamwona Yesu, aiγoloke, kangi nkataile, kuti ni Yesu. 15Yesu amuti: Mlala, ulilai? Umlonda ndai? Yuja azafanyanya kuti: Ni mγolokezi ywa mγunda, amγamba: Zumbe, ati iwe uzamwinula, niγambila, umwikileho, nikamwinule imi! 16Yesu amuti: Maliya! Yuja azahituka, amlonga Kiebuleyo angwe: Labuni!, ni kuγamba: Mfuzi. 17Yesu amuti: Ushenidowe! Hambu sizati nikwele kwa Tate. Miya hita kwa wanduγu wangu, uwaγambile kuti: Nakwela kwa Tate na kwa ishe ywenyu, kwa Mulungu ywangu na kwa Mulungu ywenyu! 18Maliya Magadalene azahita, azaviukwila waja wahina angwe: Nizamwona Zumbe, kangi azaniγambila visiku.

Yesu awalawila wahina.

19-23.

19Lwa ṅwiyaγulo uja mushi wa bosi wa sikunkulu wahina wazaunganana, miya nyuvi ziizuγalwe muja, walimo, kwa mbuli ya woγa na Wayuda. Aho Yesu azaiza, azaγoloka gati, azawati: Mpeho na inywi! 20Akilonga ivyoho azawaonyesha maγasa na luja lubazu lwakwe. Waja wahina wakimwona Zumbe wazatamilwa. 21Yesu azawati vituhu: Mpeho na inywi! Sa Tate anitumilevyo, ne imi nami nivyomituma. 22Akibinda kulonga ivyoho azawavuzila angwe: Hokelai Mpeho mṅazi! 23Ndiwo muwaushilize uhuza, ne wazauushiliziγwa; ndiwo mshewauushilize, ne nkawauushiliziγwa.

Toma.

24-36.

24Waja kumi na waili ṅwiyae ywawe muṅwe ni Toma mweitangwa Mpasha, ne aishi haṅwe nawo, Yesu akiiza. 25Waja wahina watuhu wazamuti: Tizamwona Zumbe! Miya azawati: Nikisheona nkozu za misumali mwe maγasa yakwe, nikishegela chala changu mwe izo nkozu za misumali, nikishegela mkono wangu haja he luja lubazu lwakwe, senitozeshe! 26Mishi mnane ikizinka, wahina wakwe wazaunganaha vituhu mwe ija nyumba, hata Toma a haṅwe nawo; nyuvi ziizuγalwe vivyoho, ne Yesu ahoiza, azaγoloka gati angwe: Mpeho na inywi! 27Vikibinda azamγamba Toma: Lete chala chako na kunu, uolele maγasa yangu! Lete mkono wako, uugele mwe lubazu lwangu! Usheγaluke muntu ashiyetozesha, uγaluke muntu mwetozesha! 28Toma azahitula angwe: Zumbe ywangu na Mulungu ywangu! 29Yesu amuti: Kwa kuti uzaniona, ne uhotozesha. We nyemi ni waja wetozesha na kusheona!

30Ntangilo nyingi ntuhu Yesu azaziγoshola, wahina wakwe waiolele, zishigondiγwezo mwe ichi kitabu. 31Izi zigondiγwe, kangwe mtozeshe kuti: Yesu ni Kilisito, ṅwana Mulungu, kangwe kuja kutozesha kwenyu mwonele nako nkalamo ye mwe zina jakwe.

Atualmente Selecionado:

Yohana 20: KISHNT05

Destaque

Copiar