Ntuṅwa 2
2
Mpeho mṅazi yaitilwa.
1Mushi wa milongo mishano ukitimiza, woshe wa kiṅwe hantu haṅwe. 2Ne kuholawa vuzo kwe lwingu, viya ni ja mpeho yekunta na nguvu, jizamema muja nyumbai moshe, waikalemo. 3Kuzalawila nyimi zepangana, viyani zamoto, zizawaikaila kila muntu. 4Woshe wazagisa mpeho ṅazi, wazaandiila kulonga na vilosi viγeni, kila sa Mpehongwa ivyomshungula kubilikila. 5Miya kuja Yelusalemu kuikala Wayuda wemwogoha Mulungu waandukewo mwe mbali zoshe kimu shi. 6Lushe jiya vuzo jikiiviγwa, wantu wangi wazaunganana, wazaatukwa ni matumbo, hambu kila muntu azawaiva waja, wakilonga kilosi chakwe ṅwenye. 7Wazashentuka, wazamaka angwe: Kaulai! Awa woshe welonga siwo Wagalileya? 8Lushe ishwi tiiva zeze kila muntu kilongele chakwe ṅwenye, avyelwecho nacho? 9lshwi Wapalito na Wamediya na Waelami na ishwi teikala Mesopotamiya na Yudeya na Kapadokiya na Ponto na Asiya 10na Fuligiya na Pamufiliya na Egiputa na lwazu lwa Libiya lweolela na Kilene na ishwi Waloma teikala uγeni kunu, ishwi Wayuda na wahina, 11Wakaleta na Waalabu, toshe tiyawaiva, wakibilikila na vilosi vyetu viya vikulu, Mulungu aγosholevyo! 12Woshe wazashentuka, wazaaγilwa, wazaγambilana kila muntu na ṅwiyae: Inu mbuli neihite kwa bontokela hi? 13Miya kuṅwe wazabela angwe: Watetengeziγwa ni mpombe!
Petelo abilikila kuti Yesu ni Kilisito.
14Petelo azainuka haṅwe na waja weyae kumi na muṅwe, azainula kanwa chakwe, azawabilikila angwe: Inywi waγoshi wa Kiyuda na inywi nyoshe mweikala Yelusalemu, inu mbuli shuti mwitaile, mteγeleze mbuli zangu! 15Hambu awa nkawatengele, sa muvyofanyanya, hambu ivi lushe ni saa ntatu za makelo, 16miya aha habontoka viya vyalongwavyo ni mteγanyi Yoweli akiγamba: 17Kangwe ni Mulungu: Mishi ija ya shilikiza nezeniitiile wantu woshe mpeho yangu, wana wenyu wa kiγoshi na wa kivyele nezewabilikile mbuli za uteγanyi, wabwanga wa kwenyu nezewaone sozi, hata waγundu wa kwenyu nezewaloshiγwe vivyoho. 18Wabwanga wangu na wandele wangu ne ndiwo niitiile mpeho yangu mishi ija, ne ndiwo wabilikile mbuli za uteγanyi. 19Nezenigwishe vilozo mwe lwingu ulanga na vimaka uko shi, vye mpome, vye moto, vye moshi moshi. 20Zuwa jiγalamuke lwiza, ṅwezi uγalamuke mpome, kushizati kulawile uja mushi mkulu wa Zumbe weafiziγwa. 21Kangi aho kila, ndiye nezeakemele zina ja Zumbe, atahona. Inywi waγoshi wa Kiisilayeli, 22ivai izi mbuli: Yesu ywa Nazaleti azatailikana kwenyu, kuti aanduka kwa Mulungu, kwa viya vye nguvu na viya vilozo na viya vimaka, aγosholevyo, kangi ni Mulungu ṅwenye aviγosholeye naye he mesho yenyu, sa muvyotaila wenye. 23Uyu Mulungu azamfanyanyiza aho kale ndimayakwe na kumshengela mhaka kwaviya, avyotaila mbuli zoshe; kwa ivyoho muzamγuwa mkimwinkwa ni mikono ya wahambanyi, muzamkontela mwe muti, muzamkoma. 24Miya Mulungu azamfufula, akiusha milumilwe ya kifa, hambu nkavidahikane, yuja akitoziγwa ndicho. 25Hambu Dawidi azamfanyanya uyu akiγamba: Hoshe hoshe naiṅwolela Zumbe; akiγoloka kulume kwangu, senivuwe! 26Kwa inu mbuli moyo wangu waona nyemi, lulimi lwangu lwatowa zumo, hata ṅwili wangu waikala mpolele kwa mbuli ya kialilo changu. 27Hambu nkuasha mpeho zangu kuzimu, nkuleka, yuja uyemkundisha akibanika. 28Wanionyesha sila ya nkalamo, waniiγusha na nyemi ye he cheni chako. 29Inywi waγoshi, wanduγu wangu, lekai, nimiγambile na kulaviliza mbuli ya baba yetu Dawidi kuti: Yuja azafa, azazikwa, mbila yakwe i kunu kwetu mpaka unu mushi wa lelo. 30Miya kwa kuti ni mteγanyi, azataila, kuti Mulungu azamunka kilaγa na kukilisha akiγamba: Waja wavyelwewo ndiye nezekuoneke ndiye aikale mwe kiti chakwe. 31Akiviona aho kale azalonga ziya mbuli na kuteγanya ufufuki wa Kilisito kuti: Nkaashiγwa kuzimu, kuti: Ṅwili wakwe nkaubanika. 32Uyu Yesu Mulungu azamfufula, kangi ishwi toshe ti waona wa inu mbuli. 33Lushe akibinda kuinulwa na kulume kwa Mulungu, azashungulwa ni ishe, abontole uja msuhi wa mpeho mṅazi, ne ahoitila viya inywi muvyoona na muvyoiva. 34Hambu Dawidi nkakwezile na mwe lwingu, miya ṅwenye azalonga kuγamba: Zumbe azamlonga Zumbe ywangu: 35Ikala kulume kwangu, mpaka ndiho nezeniike wankulu wako shi he milundi yako! 36Lushe chengo kigima cha Isilayeli chitailishe kuti: Yuja Yesu, mumkonteleye mwe muti, ne Mulungu amγalusheye Zumbe na Kilisito.
Kwabatizwa wantu 3000.
37Wakiviiva, vizaingila mwe myoyo yawe, wazamγamba Petelo na ziya ntuṅwa ntuhu: Waγoshi, wanduγu wetu, tiγoshole vivihi? 38Petelo azawati: Hitulai ntongonyezi zenyu! Kila ṅwenyu abatizwe mwe zina ja Yesu Kilisito, masa yenyu yaushiγwe, mdaheinkwa Mpeho mṅazi kwa mbazi du! 39Hambu uja msuhi wamitala inywi na wana wenyu na woshe we hale, ndiwo Zumbe, Mulungu ywetu, nezeaitange na kwakwe. 40Azawabilikila mbuli nyingi ntuhu, azawahimila kuγamba: Kundai kuvunilwa mwe inu mbali yeγangwa: Siyo! 41Waja wahokelewo mbuli yakwe wazabatizwa; wagezilwewo mwe bumbangwa uja mushi wazaγelemuka makulija matatu.
Kuivana kwa waṅazi.
42Wazakihima kufuziγwa ni ntuṅwa, wazaangilana na kubendwilana migate na kuvika. 43Woshe wazaingilwa ni woγa mwe myoyo yawe, hambu vimaka na vilozo vingi vizaγosholwa ni ntuṅwa. 44Miya woshe waandiilewo kutozesha wazaangilana haṅwe, kangi vyawe vyoshe wazaviγamba kuti: Ni vya bumbangwa. 45Kitende chawe na viya, wavyona navyo, wazavitaγa, wazavipangila woshe, kila muntu sa avyokakosa. 46Kwa kuti ne wai moyo muṅwe, nkawadizile kuunganana kila mushi mwe vikilongwa, hata kwe nyumba zawe wazabendwilana migate, 47wazaja nkande zawe na nyemi na myoyo yeṅala; ivyoho wazamtogola Mulungu, kangi wazakundwa ni wantu woshe. Zumbe azakuza jiya bumba akiingiza kila mushi wekunda kuvunilwa.
Atualmente Selecionado:
Ntuṅwa 2: KISHNT05
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
New Testament in Kishambala © Bible Society of Tanzania, 2005.
