Matai 4

Ku Yesu kiakituthiathingale

(Maruku 1.12-13; Luka 4.1-13)

1Ala pacungulu, ku Yesu kiaililuku ki Siri mwa ubulane calragulragu, si kikituthiathingale ki Akema. 2Sa maka masupatelenga ku vaiyane si maungu ku talaisane, ku Yesu la kasilrawnga. 3Ku Akema kaiyanganai mucucubungu si iya kai iniane, “Alaiyasi ka amanisu ku Lalake ki Twaumase, drekasa kai ki lalrenege lani apange!”

4Ku Yesu la tubalre iya kai, “Amia kai ku Sisiu, ‘Ku panianianiake ki umawmase kai lri satalu ki akaneane sikakathane, sataluta ku taiyane ki Twaumase ku vaga patueelre.’ ”

5Ku Akema la iilukunga ki Yesu mwa Alrivilrivi ka cekele, si paacegecege iniane ikai talrugulrugane ki abebeelengenga ka daane ki Twaumase, 6si iya kai iniane: “Kikai amanisu kudra Lalake ki Twaumase, twaladha kai ituku mulebe; asi lwiyane amia kai ku Sisiu:

Ku Twaumase lri pasikai muswane si kawriva ki sasiakawluini;

lai arakai ku alrima lini tapai muswane,

ku kaika aupungupungane ki lrenege kwi drapalesu si kadula.”

7Ku Yesu la tubalre iya kai, “Ai ku Sisiu amia kai, ‘Madha kituthiathiathingale ki Tamatama ka Twaumasesu.’ ”

8Ku bibiilrilinga ku Akema la ililuku ki Yesu mwa ki abeelenge ka lregelrege, la padrele iniane patuelre sanaka kuni ikawmasane si kudra ngiradhekanane lini. 9Ku Akema la iya kai, “Alaiyasi pidrurusu si sukubu nakwane, kikai sanaka maneemane patueelre lri baadhaku muswane.”

10Ku Yesu la tubalre iya kai, “Satange, katwasa! Kai Sisiu amia kai, ‘Sukuba ki Tamatama ka Twaumasesu, kathane ku apasikaiyane usakene iniane.’ ”

11Lakamani, ku Akema ala kidaili ki Yesu, ku sasiakawlu belenge la kainganai marasikai iniane.

Ku Yesu pathagili dindu ikai Galrilri

(Maruku 1.14-15; Luka 4.14-15)

12Ku Yesu la kilalra ku Yuhani ala ka kiaemengenga ikai takiememengane, la katwase kiulrau mwa Galrilri. 13Kwi lasu kai yakaikai Nazarethe, wamwalringa ikaikai Kaperenawme. Kwini cekele yatalikai Zibulungu si Napetali, wadeethe ki baiyu Galrilri. 14Kikai ngiamianga kudra vaga ki Isaiya ka yuginsia, amia kai:

15Ikai Zibulungu si Napetali,

ku ngwababiabila ki laveke ku kadadalranane, ki talikaiyane kavai ki kadravane Yuredange,

sakamaelanane ka Galrilri!

16Ku yakai kadradridrimitane ku umawmase

lri drele ku maadrau ku ledra;

ku kiakabungu ki apacadhane ku umawmase

yakai ku ledra kulri paledra liniane.

17Twalai kwini pathagili, ku Yesu peaelaela ku vaga iya kai, “Ngitatupela! Asi lwiyane lri padaalrunga si kela ku kuni subelebelenge.”

Ku Yesu wadawlu ki tasupate ka taratukakange

(Maruku 1.16-20; Luka 5.1-11)

18Ku Yesu la dadadavace tarababiabiabila ki baiyu Galrilri, la drele ku tadrusa ku taratukakange ka lamataka, ka Simune (ku drumane ku naganeini sia Pitiru) si agini ka Anederiu, yacengecenge ikai ki baiyu ararai tukakange. 19Ku Yesu la iya kai liniane, “Bwala tupapalraili! Lanu kamaninga ku taratukakange ki umawmase.” 20Kwi lalasu la makakaai cilri ku arai lini, si katwase tupapalranga ki Yesu.

21Ku Yesu la arwacucubungu dadavace, la dreelenga ku tadrusa ka lamataka ka lalake ki Zibidi ka Yakubu si agini ka Yuhani; kwi lalasu taelre ki tama lini ibelenge ki varukuru pudriadriadringai ku arai. Ku Yesu la dawlu liniane, 22kwini lalasu la makakaai cilri ku varukuru lini, si kipusau ki tama lini, si tupapalranga ki Yesu.

Tabulrwane si tapawdringadhane ki Yesu

(Luka 6.17-19)

23Ku Yesu la dadavace salraelre ki swa Galrilri, la ikai druanga ki lararubwane ki swa Yuda bulru ki laumawmase, si pelaelaela ku hukuingi ki kuni belenge, la pawdringadringai sanaka caemane. 24Ku takimatikaiyane ku naganeini salraelrenga Siria, ngwalai kikai kwi swa kai kwini ku laumawmase la mailuku ku la makaelaela ku la kiapucaemane, ku la kiapadradresedresenge ku makaelaela ku akwalriane ku umawmase: Ku la kiaikai ki aidridringane, ku mwabebeke, ku malrunai ku drapale, wailuku makanaelre kainganai pucucubungu iniane, ku Yesu la pawdringai liniane makanaelre. 25Kudra la takaalra ku laumawmase yai twalai Galrilri si Dikapulrise si Yerusalrime si Yuda, si balrealreanane kadravane Yuredange kaiyanganai tupapalra iniane.

Atualmente Selecionado:

Matai 4: NDV

Destaque

Copiar