Tio 10

Uvaʼs itxajt quBʼaal Jesuus kabʼlaval inqʼa vinaq, inqʼa nikich itxhus tibʼ s-kʼatza tiʼ ibʼen siapoostol

Kuxh 3.13-19; Luk 6.12-16

1Yaʼne isaʼ tzaan Jesuus kabʼlaval inqʼa vinaq, inqʼa nikich itxhus tibʼ s-kʼatza. Tul taqʼ Jesuus tiqleʼm tiʼ itukil el inqʼa demoonio t-taanima inqʼa xaol, atz tiʼ ibʼant bʼaʼn inqʼa yaabʼ uvaʼ kamxh yaabʼilil, atz kʼuxh kamxh txhoʼmil nikich motx bʼanon. 2Echetz ibʼij kabʼlaval inqʼa vinaq, inqʼa nikich itxhus tibʼ kʼatz Jesuus, inqʼa bʼen siapoostol s-eche: Aʼetz Simoon nik ixeʼtebʼe, uvaʼ toksa Jesuus ibʼij s-Luʼ; Lixh, uvaʼ antxh titzʼin Luʼ; Jakoovo, vikʼaol Sevedeeo; Xhun, u titzʼin Jakoovo, 3Piʼl, Tuʼl, Maxh, Tio, u mololich puaq; Jakoovo, vikʼaol Alfeeo; Leveeo, uvaʼ nikich talax s-Tadeeo; 4Simoon, uvaʼ atich ok xoʼl inqʼa bʼanol txhʼaʼo tiʼ vitenam; Juudas, u aj Karioote, uvaʼ oksan Jesuus tiqʼabʼ inqʼa iqʼesal.{*}#10.4 Eche u yol tiʼ Simoon, tan atich ok Simoon xoʼl inqʼa bʼanol txhʼaʼo tiʼ vitenam. Tan aʼ kʼaqichaq taʼn uvaʼ laʼich eleʼl vitenam jaqʼ ibʼekʼbʼal Rooma. Tul antxh vaʼl tij imam Israeel laʼich bʼanon iqʼesalil s-tiibʼa nikich motx taleʼ.

Uvaʼs itxhaqt bʼen quBʼaal Jesuus kabʼlaval inqʼa nikich itxhus tibʼ s-kʼatza tiʼ bʼen talt inqʼa bʼaʼnla txhaq yol tiʼ ibʼant quBʼaal Tiuxh iqʼesalil t-taanima inqʼa xaol

Kuxh 6.7-13; Luk 9.1-6

5Toqnaʼqichetz itxhaq vet bʼen Jesuus kabʼlaval inqʼa nikich itxhus tibʼ s-kʼatza, tul ech tal bʼen Jesuus s-tiʼ s-eche: —Yeʼl ex laʼ pal ex t-inqʼa tenam, inqʼa jit qumol s-tijaq imam Israeel. Atz yeʼlat ex laʼ paloʼk ex t-inqʼa tenam tuulbʼal Samaaria. 6Pet taʼnxh laʼ motx palk ex xoʼl inqʼa qumol s-tijaq imam Israeel, inqʼa eche itzʼeqx ka karneʼl tiʼ imol bʼanel taʼn.

7Tul ech u yol bʼen epaxsa s-eche: «Xeʼtiy vet vibʼant quBʼaal Tiuxh, uvaʼ tu amlikaʼ, viqʼesalil xoʼl inqʼa xaol,» chaq ex.

8Tul bʼen ebʼan bʼaʼn kaqaayil inqʼa yaabʼ, kʼuxh inqʼa qʼajchil nik ibʼan vitxhiʼoʼl t-yaabʼil. Atz bʼen etitzʼeʼvsa inqʼa kamnaʼq. Atz bʼen etuki el inqʼa demoonio t-taanima inqʼa xaol. Poro oy kuxh bʼen ebʼanvat inqʼa xaol bʼaʼn, tan oy kuxh qat taqʼvat quBʼaal Tiuxh u bʼaʼnil sete. 9Atz jitoq laʼ etiqʼo epuaq, kʼuxh ooro, atz kʼuxh plaata; atz jitoq koovre laʼ etiqʼo vatz ekʼalubʼal. 10Atz jitoq invaʼq txʼuʼy laʼ ebʼaq bʼen viʼ etxhelebʼ s-laʼ ebʼenaʼ, atz jitoq vaʼtoʼq etoksaʼm, atz jitoq tzumtoʼq exaʼp. Atz jitoq invaʼq bʼaara laʼ etiqʼo. Tan tij toq ilbʼeloq ex. Tan ech etatin, eche invaʼq u xaol uvaʼ, aʼ ikʼulel uvaʼ, aʼ laʼ txʼaʼonk viʼ u taqʼon.

11Poro jabʼistexh tenam, atz kʼuxh inqʼa xaol, inqʼa jeqlel t-vitz, uvaʼ laʼ aqʼbʼ ex s-xoʼl, tul bʼaxa tzij laʼ etabʼi inuqul oq uvaʼ laʼ ikʼul ex u xaol tibʼaʼnil t-totzotz. Tul tzitzi laʼ atink vet ex. Laʼ naletz opoon u qʼij tiʼ etel bʼen, yaʼne laʼ el vet bʼen ex xeʼ u xaol. 12Laʼetz okaʼp vet ex t-totzotz u xaol, tul laʼ etaqʼ bʼaʼnil ikʼuul. 13Tan oq ayaʼlxh ikʼuul u xaol setiʼ uvaʼ laʼ kʼulun ex t-totzotz, tul laʼ ikʼul inqʼa bʼaʼnil uvaʼ laʼ ejaq te quBʼaal Tiuxh s-tiibʼa. Pet oq yeʼ laʼ ikʼul ex u xaol tibʼaʼnil, tul yeʼlat vibʼaʼnil quBʼaal Tiuxh laʼ ikʼula. Pet aʼetz ex laʼ kʼulun vibʼaʼnil quBʼaal Tiuxh. 14Atz jabʼiste invaʼq otzotz, atz invaʼq tenam uvaʼ yeʼ laʼ kʼuluxik ex, atzoq yeʼ laʼ saʼax tabʼil u yol uvaʼ iqʼomal etaʼn, tul yeketz laʼ qʼaʼv ex. Tul laʼ etichu ka inqʼa poqoq tetoq vatz inqʼa xaol, tetxhlal uvaʼ, aʼ u kʼaxkʼo tul s-tiibʼa tiʼ yeʼ tabʼit inqʼa bʼaʼnla txhaq yol uvaʼ iqʼomal etaʼn.#Vibʼanoʼm inqʼa Apoostol 13.51 15Toqetz val sete: Laʼ taqʼ quBʼaal Tiuxh u kʼaxkʼo tiibʼa inqʼa xaol, inqʼa yeʼ nik kʼulviin viyolbʼal quBʼaal Tiuxh. Tul ech laʼ taqʼt quBʼaal Tiuxh u kʼaxkʼo, eche uvaʼ taqʼt tiibʼa u tenam Sodooma tuchʼ u tenam Gomoora s-naʼya. Tul palnaʼq u kʼaxkʼo laʼ taqʼ quBʼaal Tiuxh tiibʼa inqʼa yeʼ nik kʼulviin viyolbʼal quBʼaal Tiuxh s-txheel viʼ uvaʼ taqʼ tiibʼa kaʼvaʼl u tenam.#Jeenesis 19.24-28

Uvaʼs talt quBʼaal Jesuus uvaʼ tetxhal laʼich pal kabʼlaval inqʼa nikich itxhus tibʼ kʼatz quBʼaal Jesuus t-inqʼa itzaʼlal

16Pet abʼivaq etileʼ. Tan toq intxhaq bʼen ex xoʼl inqʼa xaol, ex inqʼa bʼaʼnil nik etxhokeʼ, atz bʼaʼnil iqʼomal etaʼn, eche karneʼl uvaʼ yeʼxhkam txhiʼtxhoil iqʼomal taʼn. Pet laʼetz opoon vet ex xoʼl inqʼa xaol, tul at xaol uvaʼ toq kʼaxbʼisan ex. Tan echaq tatin, eche xoʼ uvaʼ tzaoq kuxh txhibʼ s-vatz. Pet aʼ laʼ ebʼana uvaʼ laʼ exee etibʼ, eche kan uvaʼ nal kuxh nik itzʼeq tibʼ. Pet aʼ kuxh laʼ ebʼan tiʼ talax viyolbʼal quBʼaal Tiuxh uvaʼ yeʼxhabʼil laʼ ekʼaxbʼisa, eche invaʼq txoo u paraamuxh uvaʼ yeʼ laʼ kʼulelani. 17Tul yeʼl ex laʼ kuxh ebʼutxh etibʼ tiʼ talax viyolbʼal quBʼaal Tiuxh te inqʼa kalabʼaq iqʼesal uqʼeʼybʼal. Tan ant kuxh inqʼae laʼ oksan ex vatz inqʼa aqʼolaq kuʼ yol tinuqul, tiʼ uvaʼ, ex niman vetz. Atz ant kuxh inqʼae laʼ tzʼuʼman ex t-inqʼa kʼulbʼal ibʼ. 18Tul tiʼ kuxh ipaxsal vinyolbʼal, tul laʼ bʼen xotxhoxoq ex vatz inqʼa iqʼesal, atz vatz inqʼa mam iqʼesal. Aloq jitetz loqʼ koq kuxh laʼ opoon ex s-vatz s-eche, pet aʼ vet laʼ etal kam inqʼa qat etila, atz inqʼa qat etabʼi inbʼantaʼ.

Tul echat kuxh uvaʼe laʼ etal te inqʼa iqʼesal, inqʼa jit tij imam Israeel. 19Laʼetz ok vet ex tiqʼabʼ inqʼa iqʼesal, tul yeʼl ex laʼ xoʼv ex tiʼ kam laʼ etala, atz jitoq laʼ el etaanima tiʼ kam laʼ etule talax inqʼa yol. Tan nal kuxh laʼ taqʼ viTiuxhil Tiuxh sete kam laʼ etala. 20Tan jit vet exe laʼ txhulin veyol tiʼ kam uvaʼ laʼ etala, pet aʼ vet viTiuxhil Tiuxh laʼ yolon tetziʼ.

21Tan laʼ ibʼana uvaʼ at inqʼa niman vetz laʼ xotxhox taʼn titzʼin tatzik tiʼ vinnimaleʼ. Tan at atzika laʼ alon iyatzʼax el u itzʼina. Tul at bʼaala laʼ alon iyatzʼax el vikʼaol. Atz maq antxh inqʼa kʼaol meʼala laʼ motx xeʼti, tul laʼ motx tal iyatzʼax el itxutx ibʼaal. 22Tul nimal kuxh xaol laʼ txhiʼkʼuulan ex tiʼ vinnimaleʼ. Pet jaʼletz ex, uvaʼ laʼ ekotxʼ evatz tiʼ vinnimaleʼ tetxhal itzoqp u qʼij esaq vatz txʼavaʼ, aʼetz exe inqʼa laʼ bʼen ekol etibʼ kʼatz quBʼaal Tiuxh. 23Oqetz yeʼ laʼ kʼulviil ex tiʼ talax vinyolbʼal t-invaʼl tenam, tul laʼ etaqʼ ka u tenam uvaʼe. Atz tikʼ laʼ bʼen ex t-invaʼte. Pet toq val sete uvaʼ yeʼnaq oleʼvoq ex tiʼ ipaxsal vinyolbʼal tuulbʼal Israeel, tul laʼ ul in inpaqte, in, u Kʼaola uvaʼ qat bʼen s-alam aanima.

24Tul yeʼ etitzʼa, ex inqʼa nik intxhus ex, uvaʼ laʼ kʼulux ex tibʼaʼnil. Tan yeʼlat in qat kʼulux in, in u Txhusunal. Tul yeʼ etitzʼa, ex inqʼa bʼanol vaqʼon, uvaʼ laʼ kʼulux ex tibʼaʼnil. Tan yeʼlat in qat kʼulux in, in u Bʼaal etaqʼon. 25Tul yeʼ etitzʼa, ex inqʼa nik intxhus ex, uvaʼ laʼ oksal ex s-tuul. Tan yeʼlat in qat oksal in s-tuul, in u Txhusul etetz. Tul jit aʼ etxʼebʼ uvaʼ laʼ oksal ex s-tuul, ex inqʼa vaqʼonvil. Tan yeʼlat in qat oksal in s-tuul, in u Bʼaal etaqʼon. Tan at inqʼa xaol qat alon s-viʼ uvaʼ: «Velsevuue, viqʼesal inqʼa demoonio, nik aqʼon tiqleʼm,» chich eʼl in, in, uvaʼ ech vatin, eche tatin u bʼaala t-totzotz; ¡aʼetz kol yeʼ laʼ alaxik setiʼ!, ex inqʼa ech etatin sinkʼatza, eche tatin nitxaʼ t-totzotz.#Tio 9.34; 12.24; Kuxh 3.22; Luk 11.15

Uvaʼs itxhust quBʼaal Jesuus inqʼa nikich itxhus tibʼ s-kʼatza, tiʼ uvaʼ yeʼ laʼ motx xoʼv te inqʼa laʼ motx ojqeʼlan

Luk 12.2-9

26Yeʼletz ex laʼ xoʼv ex te kam uvaʼ laʼ tulbʼe ex inqʼa xaol, tan aʼ isaʼ quBʼaal Tiuxh uvaʼ tetxhal laʼ eluʼl viyolbʼal vatz qʼij saq. Tan yeʼl invaʼq inqʼa yol uvaʼ nik valeʼ uvaʼ saʼ koq kuxh muqux ka, tul yeʼ koq saʼ alax eluʼl inuqul. Atz yeʼl invaʼq inqʼa inyol uvaʼ saʼ koq kuxh muqux ka, tul yeʼ koq laʼ aqʼax ootzaqiloq. 27Tan kamxh inqʼa qat intxhus sete, uvaʼ in kuxh setuchʼ, eche laʼ iyolon kaʼvoʼq xaol s-aqʼbʼal, tul aʼetz uvaʼe, bʼen etal vet el inuqul, eche laʼ iyolon vet kaʼvoʼq xaol s-qʼiil. Atz kamxh inqʼa qat val sete uvaʼ, in kuxh setuchʼ, eche laʼ ijast vaʼq xaol iyol te invaʼt imol, tul aʼetz uvaʼe, laʼ epaxsa el, eche iqʼeqʼlet el xaol yol viʼ totzotz.

28Yeʼletz ex laʼ xoʼv ex, kʼuxh laʼ iyatzʼeʼl ex u xaol, tan yeʼl paqul laʼ oleʼv tiʼ iyatzʼax el vetaanxelal. Pet aʼ laʼ xoʼvik ex te u quBʼaal Tiuxh uvaʼ at tiqleʼm tiʼ iyatzʼax el vetaanxelal tuchʼ vetxhiʼoʼl, tul laʼ taqʼ bʼen tu xamal. 29Aloq yeʼl ex laʼ xoʼv ex, tan at etxʼaqaʼm kʼatz quBʼaal Tiuxh. Tan aʼl at itxaʼk tzaqatz tzʼichin vatz quBʼaal Tiuxh, kʼuxh tira bʼiil txhan ijaʼmil tzaqatz tzʼichin vatz inqʼa xaol. Tan tira tootzaql quBʼaal Tiuxh inqʼa kam s-kaqaayil, atz kʼuxh viqʼiil vikam invaʼq u tal tzʼichin. Tan xeemal taʼn quBʼaal Tiuxh. 30Tul aʼetz koq ex, tan tootzaql quBʼaal Tiuxh kam uvaʼ laʼ palk ex. Atz tootzaqle jatvaʼl tatxhul xiʼl eviʼ. 31Echetz yeʼl ex laʼ xoʼv ex te kam inqʼa laʼ ulbʼel ex. Tan sibʼ etiqleʼm vatz quBʼaal Tiuxh viʼ inqʼa talaq tzʼichin.

32Tul yeʼl ex laʼ xoʼv ex tiʼ etalt etibʼ s-niman vetz. Tan oq yeʼ laʼ xoʼv ex, tul echatetz kuxh laʼ valt exe s-niman vetz vatz vinBʼaal uvaʼ tu amlikaʼ. 33Pet oqetz aʼ laʼ etal vet vatz inqʼa xaol uvaʼ jit vet ex niman vetz, tul echatetz kuxh laʼ vale vatz vinBʼaal tu amlikaʼ, uvaʼ yeʼ vootzaql ex.#2 Timoteeo 2.12

Uvaʼs talt quBʼaal Jesuus kam uvaʼ ul ibʼan vatz u txʼavaʼ

Luk 12.49-53; 14.26-27

34Tul yeʼ etitzʼa uvaʼ bʼaʼnil ul voksa xoʼl inqʼa xaol tzitza vatz u txʼavaʼ, tiʼ ul valt inqʼa bʼaʼnla txhaq yol. Pet aʼl toq tok ixoʼl inqʼa xaol s-vatzaq, tetxhal laʼ nal alax iyatzʼaxaq el inqʼa niman vetz, poro s-viʼ kuxhtuʼ. 35Tan, tiʼ uvaʼ qat ul in vatz u txʼavaʼ, tul at niman vetz laʼ ixvali.

Tan laʼ ok ixoʼl u kʼaola

uvaʼ jit niman vetz,

tuchʼ vibʼaal u niman vetz.

Atz laʼ ok ixoʼl u ala

uvaʼ jit niman vetz,

tuchʼ vitxutx, u niman vetz.

Atz laʼ ok ixoʼl u alibʼa

uvaʼ jit niman vetz,

tuchʼ vitxutx vitzumel, u niman vetz.

36Tan ant kuxh laʼ txhejk

uvaʼ laʼ txhiʼkʼuulan

inqʼa niman vetz

xoʼl titzʼin tatzik uvaʼ

ant kuxh atil tu otzotz.#Mikeeas 7.6

37Tan jabʼil uvaʼ, aʼ laʼ toksa s-tuul vitxhiʼkʼuulal taʼn vitxutx ibʼaal tiʼ vinnimaleʼ, tul aʼetz uvaʼe, yeʼ laʼ txʼolon ipal tuul kam uvaʼ nik palk in. Atz jabʼil uvaʼ, aʼ laʼ toksa s-tuul itxhiʼkʼuulal taʼn inqʼa ikʼaol imeʼal tiʼ vinnimaleʼ, tul aʼetz uvaʼe, yeʼ laʼ txʼolon ipal tuul kam uvaʼ nik palk in. 38Tan jabʼil uvaʼ yeʼ laʼ txʼolon ipal t-inqʼa kʼaxkʼo, kʼuxh tetxhal ijaʼ vatz kurus tiʼ itxhʼuyeʼv s-viʼ, atz tiʼ innimaleʼ, tul aʼetz uvaʼe, jit ikʼulel laʼ alax s-niman vetz taʼn quBʼaal Tiuxh. 39Tan jabʼil uvaʼ yeʼ laʼ tal vet tibʼ s-niman vetz tiʼ kuxh uvaʼ laʼ ikol u qʼij isaq tzitza vatz u txʼavaʼ, tul aʼetz uvaʼe, laʼ tzʼeqon u qʼij isaq tu amlikaʼ. Pet jabʼil uvaʼ laʼ tal tibʼ s-niman vetz, tul kʼuxh aʼ laʼ itzʼeq u qʼij isaq tzitza vatz u txʼavaʼ, tan aʼetz uvaʼe, at qʼij isaq tu amlikaʼ laʼ ibʼana.

Uvaʼs itxhusun quBʼaal Jesuus, tiʼ uvaʼ tetxhal laʼ aqʼax itxʼaqaʼm jabʼil uvaʼ laʼ kʼulun inqʼa paxsan tetz inqʼa bʼaʼnla txhaq yol tiʼ Jesuus

Kuxh 9.41

40Jabʼil u xaol uvaʼ laʼ kʼulun ex tibʼaʼnil, tul inetze nik ikʼul in tibʼaʼnil. Atz jabʼil uvaʼ nik kʼulun in tibʼaʼnil, tul aʼetz vinBʼaale nik ikʼuleʼ uvaʼ txhaqon tzaan in. 41Jabʼiletz uvaʼ laʼ kʼulun ex, ex inqʼa nik qʼexsan inqʼa bʼaʼnla txhaq yol, tul kam u txʼaqaʼm laʼ ekʼula, tul echat kuxh uvaʼe laʼ ikʼul uvaʼ laʼ kʼulun ex. Jabʼiletz uvaʼ laʼ kʼulun ex, tiʼ uvaʼ nik ibʼen s-te uvaʼ, aʼ u jik nik ebʼaneʼ, tul echat kuxh vitxʼaqaʼm laʼ ikʼula, eche u txʼaqaʼm uvaʼ laʼ ekʼula. 42Jabʼiletz uvaʼ laʼ lotxhon ex tiʼ taqʼt inbʼeeq etajaʼ kʼuxh kamxh aʼil, tiʼ uvaʼ ex niman vetz, tul toq val sete uvaʼ, tetxhal laʼ ikʼul itxʼaqaʼm s-tiʼ, —xeʼt Jesuus te kabʼlaval inqʼa nikich itxhus tibʼ s-kʼatza.

Atualmente Selecionado:

Tio 10: ixlC

Destaque

Copiar