བཀོད་པ 8
8
ཆུ་ལོག་གི་མཐའ་མ།
1དཀོན་མཆོག་གིས་ནོ་ཨ་དང་གྲུའི་ནང་ཡོད་པའི་སེམས་ཅན་ཐམས་ཅད་ལ་བརྗེད་གནང་མེད་པ་དང་། ཁོང་གིས་རླུང་ཞིག་རྒྱུག་བཅུག་པ་དང་ཆུ་ཉུང་དུ་འགྲོ་བར་འགོ་ཚུགས་སོ། 2སའི་གཏིང་དུ་ཡོད་པའི་ཆུ་མིག་རྣམས་སྐམ་པ་དང་། ནམ་མཁའི་ཆུའི་སྒོ་ཚང་མ་བརྒྱབ་ནས་ཆར་པ་ཆད་དོ། 3ཉི་མ་ ༡༥༠ བར་དུ་ཆུ་དལ་པོར་འཇོམས་སོ། 4ཟླ་བ་བདུན་པའི་ཚེས་བཅུ་བདུན་གྱི་ཉིན་ཨ་ར་རད་བྱ་བའི་རིའི་སྟེང་གྲུ་དེ་འགགས་སོ། 5ཆུ་དེ་འཇོམས་པ་དང་ཟླ་བ་བཅུ་པའི་ཉིན་དང་པོར་གངས་རིའི་རྩེ་མཐོ་པོ་རྣམས་མཐོང་ངོ་།
6ཉི་མ་བཞི་བཅུའི་རྗེས་སུ་ནོ་ཨས་སྒེ་ཁུང་ཕྱེས་ཏེ། 7ཕོ་རོག་ཞིག་སློད་དེ་དེ་ནི་ཚུར་མ་ལོག་གོ འོན་ཀྱང་ཆུ་ཚང་མ་སྐམ་བར་ཕྱོགས་བཞིར་ཕན་ཚུན་འཕུར་ནས་བསྡད་དོ། 8དེའི་བར་ལ་ཆུ་རྣམས་སྐམ་ཡོད་མེད་བལྟ་བར་འང་གུ་གཅིག་བཏང་ནས། 9འོན་ཀྱང་ད་དུང་ཡང་ས་ཐམས་ཅད་ཆུས་ཁེངས་ཡོད་པས། འང་གུ་དེ་ལ་བསྡད་ས་མ་ཐོབ་པའི་རྐྱེན་གྱིས་གྲུའི་ནང་ལོག་ནས་ཡོང་ཞིང་། ནོ་ཨས་འང་གུ་བཟུང་སྟེ་གྲུའི་ནང་བཞག་གོ 10ཉི་མ་བདུན་སྒུག་པའི་རྗེས་སུ་འང་གུ་དེ་ཕྱི་རོལ་དུ་ཡང་སྐྱར་བཏང་བས། 11འང་གུ་དེ་ཁ་སྐྱུར་པོའི་ཤིང་གི་ལོ་མ་སོས་པ་ཞིག་མཆུ་ལྟོར་འཁུར་ནས་དགོང་དྲོ་ནོ་ཨའི་རྩར་ལོག་ཡོང་ངོ་། ནོ་ཨས་ཆུ་ཉུང་དུ་ཕྱིན་པ་ཤེས་སོ། 12དེ་ནས་སླར་ཡང་ཉི་མ་བདུན་སྒུག་པའི་རྗེས་སུ་འང་གུ་དེ་ཡང་ཐེང་ཅིག་བཏང་བས། ད་ལན་འང་གུ་དེ་ཕྱིར་ལོག་ནས་མ་ཡོང་ངོ་།
13ནོ་ཨ་ལོ་ ༦༠༡ ལོན་པའི་ཟླ་བ་དང་པོའི་ཚེས་དང་པོའི་ཉིན་ཆུ་སྐམ་ཡོད་པས། ནོ་ཨས་གྲུའི་ཐོག་ཕྱེས་ཤིང་ཕྱོགས་བཞིར་ས་སྐམ་བཞིནཡོད་པ་མཐོང་ངོ་། 14ཟླ་བ་གཉིས་པའི་ཚེས་ཉེར་བདུན་གྱི་ཉིན་ས་ནི་ཆ་ཚང་བསྐམས་སོ།
15དཀོན་མཆོག་གིས་ནོ་ཨ་ལ་གསུངས་པ། 16ད་ཁྱོད་རང་གི་ཆུང་མ་དང་ཁྱོད་ཀྱི་བུ་རྣམས་དང་དེ་ཚོའི་ཆུང་མ་བཅས་པ་ཚང་མ་གྲུ་ནས་ཕྱིར་ཐོན་ཞིག 17བྱ་བྱིའུ་ཐམས་ཅད་དང་སེམས་ཅན་རྣམས་ཁྱོད་ཚོ་མཉམ་དུ་ཕྱིར་རུ་འཁྲིད་ཅིག། གང་ལ་ཟེར་ན། དེ་རྣམས་འཕེལ་ནས་ས་གཞི་གང་བའི་ཕྱིར་རོ། 18དེ་ནས་ནོ་ཨ་དང་། ཁོའི་ཆུང་མ་དང་། ཁོའི་བུ་རྣམས་དང་དེ་ཚོའི་ཆུང་མ་རྣམས་དང་བཅས་པ་ཕྱི་རུ་ཐོན་ནོ། 19སེམས་ཅན་ཐམས་ཅད་དང་བྱ་བྱིའུ་ཚང་མ་རང་རང་གི་རིགས་བཞིན་དུ་གྲུ་ནས་ཕྱི་རུ་ཐོན་ནོ༎
ནོ་ཨས་དམར་མཆོད་ཕུལ་བ།
20ནོ་ཨས་གཙོ་བོ་དཀོན་མཆོག་ལ་མཆོད་ཁྲི་ཞིག་བཟོས་ནས། ཁོང་གིས་ཆོ་ག་ལྟར་སེམས་ཅན་དང་བྱ་བྱིའུ་འདྲ་མིན་གཙང་མ་ཁ་ཤས་ནས་རེ་རེ་བླངས་ཤིང་མཆོད་ཁྲིའི་ཁར་ཆ་ཚང་བསྲེག་ནས་དམར་མཆོད་ཕུལ་ལོ། 21དམར་མཆོད་དེའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་དགྱེས་ནས། ཁོང་རང་གི་རང་ཉིད་ལ་མིའི་རིགས་ཆུང་དུས་ནས་བསམ་པ་ངན་པ་ཡིན་པ་ངས་ཤེས་ཀྱི་ཡོད། ད་ནས་བཟུང་མི་ཡི་བྱས་པའི་ལས་ཀྱི་རྐྱེན་ས་གཞིར་ནམ་ཡང་དམོད་པ་མི་བཏང་ངོ་། ད་ལན་དང་འདྲ་བ་སྲོག་དང་ལྡན་པའི་རིགས་ཚང་མ་ངས་མེད་པར་མི་བཟོའོ། 22འཛམ་གླིང་འདི་ནམ་བར་གནས་རིང་། ས་བོན་བཏབ་ནས་སྟོན་ཐོག་རྔ་བའི་དུས་ཚོད་བྱུང་བར་འགྱུར། རྒྱུན་དུ་ཚ་གྲང་དང་། དབྱར་དགུན་དང་། ཉིན་དང་མཚན་མོ་ཡོང་བར་འགྱུར་རོ༎
Atualmente Selecionado:
བཀོད་པ 8: TOT11
Destaque
Compartilhar
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fpt.png&w=128&q=75)
Quer salvar seus destaques em todos os seus dispositivos? Cadastre-se ou faça o login
Tibetan Old Testament © Bible Society of Nepal, 2011.