Penemu-Dalam Solomon 6
6
Tanggungjawab orang ke bekuasa
1Nya alai, kita ke raja, kita ke bekuasa di seluruh dunya, dinga jaku aku tu, lalu belajar ari nya. 2Kita megai mayuh menua lalu sumbung laban mayuh rayat di baruh kuasa kita, 3#Rom 13.1. tang kuasa nya diberi Tuhan ti Pemadu Tinggi ngagai nuan. Iya deka meresa utai ti udah dikereja nuan enggau pengawa ti deka diatur nuan. 4Nuan megai kuasa ngarika Allah Taala enggau perintah Iya, lalu enti nuan enda megai enggau lurus, enti nuan enda nitihka undang-undang, enti nuan enda diau nitih ke peneka Allah Taala, 5nuan deka ngenyit merinsa lalu ngasaika ukum ti pedis amat. Ukum sigi berat agi ke sida ke megai kuasa. 6Orang biasa nyangka bulih pengampun ke penyalah sida ulih pengasih, tang orang ke megai kuasa deka nerima ukum ti berat agi. 7Tuhan ti bekuasa atas semua enda takutka sapa-sapa, enda milih pemesai pangkat orang nya. Iya empu ngaga semua mensia, orang pemesai enggau orang biasa sebaka magang, lalu Iya meri utai sebaka ngagai semua mensia. 8Tang Iya deka ngakim orang ke bekuasa lebih terit agi. 9Utai tu sigi diungkup ke kita raja besai. Kebuah aku nulis jaku tu ngambika kita nemu jalai ngereja utai ti betul, lalu nyeliahka utai ti salah. 10Semua utai tu endang pekara ti kudus, lalu enti nuan ngereja iya enggau jalai ti kudus, nuan empu deka dikumbai kudus. Enti nuan udah belajarka utai tu, nuan ulih ngenanka diri empu ba maya Pechara Besai. 11Nya alai, awakka ajar aku tu nyadika pesaka enggau pengelantang nuan, lalu nuan deka bulih pelajar ti betul.
Guna Penemu-dalam
12Penemu-dalam semampai tampak manchar, lalu enda nemu kelabur. Barang sapa rinduka iya, lalu ngiga iya tetap tetemuka iya. 13Iya jampat ditemu orang ti sigi keran ke iya. 14Angkat tumu pagi, lalu giga iya, lalu nuan deka nadai penanggul; nuan deka tetemuka iya duduk di mua pintu nuan. 15Pegai teguh Penemu-dalam, lalu nuan deka meretika semua utai enggau penuh. Enti nuan ngiga iya nuan deka diau dalam pemaik. 16Penemu-dalam sigi ngiga orang ke patut nerima iya, lalu iya deka tetemuka nuan dini-dini endur nuan. Iya sigi mentas lalu semampai enggau nuan dalam semua runding nuan. 17Penemu-dalam bepun ari maya nuan amat deka belajar. Reti keran ke Penemu-dalam, iya nya, nuan rinduka iya. 18Rinduka iya, reti nya, nitihka adat iya, lalu nuan tetap deka bulih pengidup ti meruan. 19Pengidup ti meruan deka mai nuan semak ngagai Allah Taala. 20Pengeran ati ke Penemu-dalam ulih nyediaka nuan megai kuasa perintah. 21Nya alai, enti kita ke bekuasa megai mayuh menua, sayauka penuduk raja kita enggau tanda kuasa kita, kita patut bebasaka penemu-dalam ngambika kita ulih megai kuasa belama-lama.
Solomon deka magi Penemu-dalam iya
22Aku deka madah ngagai kita reti Penemu-dalam, lalu baka ni penyadi iya. Aku enda ngelalaika utai. Aku berengkah ari pun jerita, lalu madahka penemu pasal iya enggau terang. Aku enda ngelaungka semua utai ti amat bendar. 23Aku nadai ati kepapas ketegal deka nyaga penemu aku ti tau ngasuh aku enda nusi semua utai. Penemu-dalam nadai kaul enggau runding ti baka nya. 24Endang amat baka nya - laban enti mayuh agi orang ke pintar, tentu lantang agi dunya tu endur diau. Raja ke mereti tau dikarap laban iya ulih meri pengelikun ke rayat iya. 25Nya alai, pelajarka utai ti deka diajar aku ngagai kita, lalu kita deka bulih penguntung ari nya.
Atualmente Selecionado:
Penemu-Dalam Solomon 6: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia