Penemu-Dalam Solomon 17
17
Penakut Nyerang Orang Ejip Malam Hari
1O Tuhan, pengawa Nuan ke ngakim sigi chukup manah amat, sereta mar diterangka; nya kebuah orang ke enda diajar pasal utai nya nyau limpang. 2Lebuh orang ke enda beradat berunding deka bekuasa atas bansa ti kudus sida empu ngurung diri sepemanjai malam dalam petang. Sida gali di rumah diri empu enda diibun Nuan belama iya. 3Sida ngumbai penyalah sida ulih dilalaika, nadai dikingatka, tang diatu sida takut amat, sereta charut runding, lalu takutka gamal utai ti baka antu. 4Indah teluk ti petang ti alai sida gali deh enda ulih muai penakut sida. Sida dikelingi munyi nyawa utai ti ngenakutka; gamal antu ti jai ayan di mua sida. 5Api nadai meh kuasa meri penampak ke sida, nyentukka bintang ti tampak enda meh ulih ngurangka pemalat pemetang nya. 6Semina api ti angat aja dia manchar ngagai sida, ukai ditungkun jari mensia, lalu laban sida balat takut, sida ngumbai utai ti dipeda sida di dunya tu lebih agi ngenakutka ari utai dalam runding sida. 7Penyarut ti datai ari pengawa engkeramat sida ngemaluka sida empu, lalu semua penemu ti ditemegahka sida nadai guna sekali. 8Sida ngumbai diri ulih muru semua penakut enggau penyakit ari dalam pikir sida, tang diatu sida empu nyau sakit laban penakut enggau nadai kebuah. 9Taja nadai utai ti ngemedis bisi udah nyadi, sida takut amat ninga resih ular enggau munyi jelu mansang ngagai sida. 10Nya kebuah sida parai, gegetar laban takut amat, sampai sida enda berani muka mata, tang enda mega sida ulih menjamka mata.
11Penyai nya endang penakut ti nyalah iya empu. Orang ke ngasai diri salah selalu bepikir ngumbai utai lebih jai ari utai ti bendar. 12Penakut nyadi ketegal orang puntan runding ti menyana. 13Lebuh nuan enda berapa berani bepangai ba penemu ti patut, nuan nyau ngalahka diri laban takut ketegal enda nemu utai.
14Semalam-malam sida nya enda tentu tinduk jenak, taja malam nadai kuasa ngalahka sida, laban malam datai ari dunya pemati ti nadai kuasa. 15Sida ngasaika diri digagai ayuk utai ti jai gamal, lalu gali enda kebut-kebut laban takutka utai ti enda disadang ti datai enggau ngenyit. 16Bisi orang ngenyit rebah lalu gali ditanchang enggau rantai penakut sida empu. 17Orang bumai, pengibun bedus enggau bala kuli bela kena tangkap utai ti enda ulih dikerari nya, lalu kena tanchang rantai ti enda dipeda dalam petang. 18-19Sida nyau tegepang takut laban bunyi ribut tauka bunyi nyawa burung belagu ba puchuk kayu, tauka bunyi auh ai sungai, tauka bunyi batu labuh begaring, tauka bunyi indu utai belanda enda dipeda sida, tauka bunyi nyawa jelu kampung ti mangah, tauka bunyi awuh nyawa di bukit. 20Dalam penampak siang hari, di semua endur bukai pengawa dunya bejalai baka selama nadai utai ngachau. 21Semina sida aja dibungkur pemetang, lalu dulu ngasaika pemetang ari pemarai ti nganti sida. Sida ngenusah diri empu, lalu penusah nya lebih berat ari pemetang.
Atualmente Selecionado:
Penemu-Dalam Solomon 17: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia