Penemu-Dalam Solomon 13
13
Pemeli Nyembah Utai Ngapa
1Barang sapa enda nemu Allah Taala endang amat beli. Orang ke baka nya merening utai ti manah ngelingi sida, tang sida enda meda Allah Taala ti idup. Sida belajar pasal utai ti digaga Iya, tang sida mengkang enda ngelala Iya ti ngaga utai nya. 2Runding sida ke bukai, lalu ngumbai utai nya bekuasa di dunya, baka api tauka ribut, tauka kudi, tauka bintang, tauka ai ti deras, tauka bulan enggau mata panas di langit. 3Mensia gaga amat ati meda pemanah utai nya, lalu ngumbai utai nya petara, tang sida patut nemu semua utai nya bisi siku tuan, lalu tuan nya jauh besai kuasa ari semua utai nya, laban Iya ke ngaga pemanah semua utai nya ti digaga Iya. 4Laban orang alit ati meda kuasa enggau gaya pejalai utai nya, nya alai ari nya sida patut belajar lalu nemu Iya ti ngaga utai nya lebih jauh besai kuasa. 5Lebuh kitai nemu pemesai enggau pemanah utai ti digaga Iya, kitai mega belajar pasal Iya ti ngaga semua utai nya.
6Nyangka kitai tekelalu balat nyalah sida nya. Dalam semua nya, kada sida enda amat ngiga Allah Taala, tang enda ulih. 7Laban sida dikelinggi utai digaga Allah Taala, sida majak merening utai nya, dataika sida mutus ati ngumbai utai nya petara laban utai ti dipeda sida bangat tekelalu manah. 8Tang, taja pia, agi meh sida enda chukup kedalih. 9Enti sida bisi pikir enggau chukup pasal utai di bap langit, nama kebuah sida enda kala tetemuka Tuhan ti ngaga semua utai nya?
Pemeli Nyembah Engkeramba
10Tang orang ke pengabis merinsa, iya nya, orang ke arap ke utai ti enda idup, baka orang ke nyembah utai ti digaga jari mensia - utai nya baka patung jelu ti digaga manah-manah ari mas tauka pirak, tauka sekeda batu ti enda beguna digaga orang dulu kelia. 11Bisi tukang ke landik nyayat kayu ti manah, muai kulit iya, udah nya, bejimat ngena pengelandik jari iya, ngaga ari kayu nya utai ti tau diguna. 12Nyadi uras kayu nya digumpul ke kayu api kena iya manduk pemakai ti diempa iya duduk enggau ati lantang. 13Ari laluh kayu nya tadi nyangka tukang nya bisi tetemuka siti papung ti nadai guna - nyangka papung nya belingkuk liuk - lalu lebuh maya lantang iya belubah-lubah mupuk ngaga papung kayu nya baka gamal mensia. 14Tauka digaga baka gamal jelu ti nadai guna. Iya ngechat patung nya mirah enggau silik. 15Udah nya iya ngelekatka patung nya ba dinding mantang iya enggau paku lawang besi. 16Iya bejimat ngelekatka patung nya ngambika iya enda labuh, laban iya nemu utai nya semina patung engkeramba lalu begunaka tulung; iya enda ulih nulung diri empu. 17Tang iya enda malu besembiang ngagai patung engkeramba ti nadai seput nya, pasal pekara melaki-bini iya, pasal bala anak iya, enggau pasal reta tengkira iya. 18Engkeramba nya nadai pengering, tang orang nya besembiang minta pengerai ari engkeramba nya. Engkeramba nya ukai utai ti idup, tang orang nya besembiang minta umur panjai ari engkeramba nya. Engkeramba nya nadai peneleba, tang orang nya minta tulung ari utai nya. Engkeramba nya enda nemu bejalai, tang orang nya minta engkeramba nya ngasuh pejalai iya mujur. 19Jari engkeramba nya nadai kuasa, tang orang nya minta engkeramba nya nulung iya - baka pengawa dagang, ngiga duit enggau mayuh macham kereja iya ti bukai.
Atualmente Selecionado:
Penemu-Dalam Solomon 13: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia