Penemu-Dalam Solomon 11
11
Penemu-Dalam Ngulu Bansa Israel Nengah Menua Puang
1Penemu-dalam mai pemujur ngagai orang Israel nengah siku nabi ti kudus. 2Sida bejalai nengah menua puang ti enda kala diwan mensia, lalu belangkau ba endur ti enda kala ditengah mensia. 3Sida ngelaban, lalu muru munsuh. 4Lebuh nembiak Nuan nyau aus, sida ngangauka Nuan, Tuhan, lalu Nuan meri sida ai ti pansut ari batu galang. 5Ukum ti ninggang orang Ejip ngidupka nembiak Nuan maya sida kena penusah.
Ukum Orang Ejip
6-8Ketegal bala munsuh nya ngasuh anak mit kita di bunuh, nya alai kita ngachau pun penatai ai sungai sida lalu ngamahka iya ngena darah.
Di menua puang Nuan ngelakka nembiak Nuan aus, ngambika sida ngasaika ukum ti udah dikena Nuan ngukum munsuh sida. Lalu udah nya, lebuh sida enda ngadang Nuan meri sida ai ti mayuh amat. 9Lebuh sida kena uji, taja pen tuju nya ngajar sida enggau pengasih, sida lalu meretika pemalat orang ke jai kena perinsa maya Nuan ngakim sida ngena pengeringat. 10Nuan nguji nembiak Nuan, baka apai ti nguji bala anak iya, kena ngajar sida. Tang Nuan ngakim munsuh sida baka raja ti terit meri ukum. 11Sida merinsa sekalika sida semak tauka jauh nembiak Nuan. 12Pemerinsa sida dua kali lipat; sida bedemuh lebuh sida ngingatka utai ti udah nyadi. 13Lebuh bala munsuh nyau nemu ukum sida nyadika penguntung ngagai nembiak Nuan, nya baru sida sedar pengawa nya endang datai ari Nuan, Tuhan. 14Orang Ejip enggai besangkut-paut enggau anak mit ke dibuai ba sungai dulu suba, tang ba penudi iya, sida alit ati meda iya. Orang lurus enda kala merinsa aus baka sida ke jai.
15Penyai sida nya ngasuh runding sida beli, nya alai sida nyembah ular enggau indu utai ti enda nemu berunding. Ketegal tu Nuan ngukum sida enggau bejuta-juta jelu ti jai. 16Nuan ngajar sida, ukum penyalah setipak enggau penyalah. 17Pemesai kuasa Nuan Tuhan ngaga dunya tu ari utai nadai. Enggau muntang Nuan ngukum sida nya ngena jugam enggau singa ngelaban sida. 18Enti Nuan deka, Nuan ulih ngaga jelu baru ti jai amat baka ti nemu ngesuhka api tauka negong, lalu ngesuhka asap, tauka merechika api ari mata iya. 19Nuan ulih ngaga jelu ti enda ibuh ngelaban lalu munuh sida, tang semina merening sida aja, sida takut amat lalu parai. 20Tang utai nya tau enda ibuh. Nuan ulih ngukum sida ngena pemetul adat Nuan, tauka ngena kuasa Nuan malu sida sampai parai. Tang chara Nuan endang manah, Nuan udah nyukat, ngitung lalu nimbang genap utai ti dikereja Nuan.
Allah Taala Besai Kuasa enggau Pengasih
21Nuan ulih ngayanka pemesai kuasa Nuan sebarang maya Nuan deka. Lalu nadai siku orang ulih ngelaban iya. 22Dipeda Nuan seluruh dunya tu baka leka pasir, enda chukup berat ngerungingka dachin, baka titik ambun ba tanah tumu pagi. 23Kuasa Nuan besai amat lalu ulih ngereja sebarang utai, tang Nuan bisi pengasih ngagai genap iku orang; Nuan enda ngira penyalah kami lalu meri kami peluang ngesal ati. 24Nuan rinduka genap utai; Nuan enda begedika sebarang utai ti digaga Nuan. Enti Nuan enggaika utai nya, tentu Nuan enda ngaga iya. 25Baka ni utai tau meruan lama enti Nuan enggaika utai nya? Baka ni iya tau tan enti Nuan enda ngasuh iya tan? 26O Tuhan, Nuan ke ngasuh semua utai nyadi laban iya endang enggi Nuan, lalu Nuan rinduka semua utai ti idup.
Atualmente Selecionado:
Penemu-Dalam Solomon 11: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia