Sirak JAKU PEMUKA
JAKU PEMUKA
Bup Penemu Dalam Jesus, Anak lelaki Sirak, ti mega dikumbai Eklesiastikus, ditulis dalam jaku Hebrew ulih orang siku benama Josua (tauka Jesus) lalu disalin ngagai jaku Gerika ulih uchu lelaki iya. Bup tu nusi pasal penemu asal bansa Judah sereta ngeringka adat pengarap sida ngena jalai nunjukka Allah Taala amat meri ngagai sida penemu ti betul. Mayuh penemu pasal pengarap, pemanah pendiau enggau utai ti patut dikereja disimpan dalam bup tu, bisi sekeda panjai lalu bisi mega pandak ngena jaku dalam.
Isi
Muji Penemu Dalam (Bagi I) 1.1-23.27
a. Pengawa, Upah, enggau Lalau ti Manah 1.1-16.23
b. Penemu Allah Taala enggau Saut Mensia 16.24-23.27
Muji Penemu Dalam (Bagi II) 24.1-50.21
a. Penemu Dalam enggau Perangai ti Manah 24.1-32.13
b. Penemu Allah Taala, Sembah enggau Pengawa Mensia 32.14-42.14
c. Mulia Allah Taala dalam dunya ti digaga Iya 42.15-43.33
d. Muji Bala Aki Ini Kelia 44.1-50.21
Penutup enggau Tambah 50.22-51.30
Jaku Pemuka
Penerang Bup Adat Moses, Bup Bala Nabi enggau bup-bup bukai ti ditulis ke dudi agi ari nya, nusi mayuh cherita meri ajar ti manah ngagai kitai. Israel patut dipuji laban udah meri ajar enggau penemu nya ke kitai. Tang nya enda chukup enti semina macha lalu bulih pemereti ke diri empu aja. Sebarang orang ke ngumbai pelajar nya beguna patut nulung orang bukai ngena penemu ti disebut enggau ditulis iya empu. Nya alai aki aku Jesus angkun ati belajarka Bup Adat, Bup bala Nabi, enggau bup bukai enggi aki ini kitai kelia. Udah iya nemu amat dia iya deka nulis bup pasal ajar ti manah enggau penemu ti dalam. Tuju iya ngambika orang ke deka belajar sama bulih pemandai dalam semua utai nya awakka majak mujur laban idup ngasika Adat.
Nyadi bup tu patut dibacha enggau jimat sereta enggau ati tebuka. Lalu besabar ati ba sekeda salin ti enda chukup manah, taja aku udah enggau naka ulih sereta tusah nyalinka iya. Utai ti keterubah ditulis dalam jaku Hebrew tentu bisi lain reti enti disalin ngagai jaku bansa bukai. Utai nya endang amat, ukai semina bup tu aja, baka Bup Adat, Bup Nabi enggau bup bukai. Salin sigi mayuh enda sebaka enggau iya ti asal.
Aku datai di menua Ejip dalam taun ketiga puluh lapan maya Rajah Euergetes merintah menua nya. Aku diau dia numbas iya pengelama. Lebuh aku dia, aku bisi peluang belajar lalu bisi ati deka nyalinka bup tu. Aku keran deka ngena semua pengerajin enggau pengelandik aku nembuka iya ngambika bisi dikena semua bala sida ke diau di menua orang, bala sida ke bisi ati deka belajar enggau bala sida ke bisi perangai ti manah ke deka diau nitihka Adat Moses.
Atualmente Selecionado:
Sirak JAKU PEMUKA: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia