Matius Uram 3
3
Yohanes ninyi me dongoramunyi uram
3:1-12
1A talak ara ninyi si Yohanes ninyi me dongoramunyi kuramwe. Anyi bira Yudea mutuk aryi kuboka ninyi kun kum mutuk yandoka Er Imtamnyi Uram lak etereramwe. 2Ati, Yohanes biryi ato eboka etereramwe, “Er Imtamnyi bira iya Weik Sienyi kururci, sun dam yandoka arukdeibkwamasir ati, sunci sun malyi kundarur dinyi taklobdarur!” eboka etereramwe. 3Er Imtamnyi Uram ebdeibmaca bobaramunyi si Yesaya biryi minob ura kerek sekeiamwe to, Yohanes biryi sirya kunubdeibmou. Ara, Yesaya biryi Yohanes biti ato eboka minob kerek sekdeiamwe,
“Ninyi tentok ara ninyi kun kum mutuk kurandiryi uram weik dobkwande, ‘Nun Nai Iya Erebdobnyi sun dam yankwamasir ati, sunci sun kanya asi kiknibminikdamunci, bisik yaboka Ersi kibdobdarur!’ Ninyi kun kum mutuk aryi kuboka uram weik dobkwandanyi bira ato eboka lak eterebkwande.” (Yesaya 40:3)
Ato eboka Yesaya biryi minob ura kerek sekeiamwe to, Yohanes biryi kunurdeiriramwe.
4Ura, Yohanes er ongon aling ara bisam unta otong aryi kiknin aling ongoramwe ba, er sabya ara sapi kala aryi kiknin sabya deiriramwe. Ba, er yiramwe yina ara kwising ab bai kwiryi me ab yibde kuramwe. 5Ura, Yohanes biryi ninyi kun kum mutuk kuramuryok, Er Imtamnyi Uram lak etereramwe ba, sun Yerusalem sien atei kuramnyi nang ab, Yudea mutuk atei nang nirya ab, Yordan me katum dam kuramnyi atei nang ab aryi, “Yohanes eterena uram kekebtibyi,” tenen er dam yangaramnyi. 6A nang ara Yohanes dam yan ura, sunci sun malyi kuramnyi to lak eramnyi ura, Yohanes biryi sunsi me si Yordan aryi me dongoramwe.
7Me dongoramuryok, asing dinmou uca, Musa kerek sengna dirniliramnyi nang si Farisi nang ab, “Sun din nang ara aminda kam kum bukokwaming,” eramnyi nang si Saduki nang ab ilinto ababyi yanmai asi asing eibmou. Ura, Yohanes biryi sunsi ato ebmou, “Se, sunda iya malyi kun nang kundarur! Kwatima tok aryi iniboka mabmaci ani, ninyi talyi yibarongnyi asi si torande to sunbabyi neiktoto kundarur nang. Ati, unanyi biryi sunsi eterebmasou uca, sunci, ‘Aminda aryi Er Imtamnyi biryi nunsi iya kum wenebkwansir,’ tenerandum do? 8Ati, sunci, ‘Er Imtamnyi biryi wenebsicei,’ tenen sun malyi tenendarur dinyi taklobmunci, Er Imtamnyi teleb tenesurur dinyi akwe kunubdarur. Ato kubmuncok, sunci Er Imtamnyi urasintam aryi du moun nang aryi kuramingnyi kikiman dinyi lak kibdandarur!” ebmou. 9Ato ebmou cok, ton ato ebmou, “Sunci sun kanyatam aryi, ‘Nunda nun abwe Abraham deibdoba aryi yaldangsunung nang kunub ati, aminda ara Er Imtamnyi biryi iya wenebkwande tum ara nunda kum wenebkwansir,’ tenen kum! Niryi sunsi diboka ebkwinsin, Er Imtamnyi biryi yuk nang asi kiknibdeiboka tikeibte. Ara, nun Nai biryi, ‘Abraham biryi teleb kuramwe to du moun nang asi kiknibdeibkwan,’ tenebte ura, Erci ilil tenen dinyi kiknibtiryok, anda keil aryi kuboka Abraham mabwe nermabwe kibdeibkwamote! 10Sun tukwetam aryi kuboka wa in nang ara du moun kum co asi ya aryi kweboka uk dongoraming. Ura, Er Imtamnyi bibabyi neiktoto kurur. Erci sun du moun kum nang ati, ‘Wenebkwan,’ tenerandiryok, ya kala ya kiknibde burande. Ati, unanyi-unaner ara du mousin kum nang asi nun Nai biryi weneboka uk buk ilinto angmaci dam asi dongobkwande.
11Niryi sun kankan aryi, ‘Nun malyi kun dinyi taklobkwayeb,’ eboka lak erdarandum nang asi me dongoransin ara me sirik umbura aryi dongoransin. Ba, aminda yankwandanyi bira nisi bisibkaboka iya mikibnyi kurur. Anyi bira yandoka Er Imtamnyi Kanya Roh Kudus bisi kareboka sun kanya dam asi dongobkwansir. Tonda, sun kanya dam aryi malyi tenen dinyi Erci kum daneibkwande. Ara, uk buk arande aryi co ab maning ab kum daneirande to, Erda aminda yankwandanyi biryi Roh Kudus biriman aryi sunsi bitabdeiboka sun kanya dam aryi kuboka malyi kun dinyi asi kum daneibkwansir. Erda aminda yankwandanyi bira iya mikibnyi kurur bok, nira tukwetam bunanyi bitonyi kunun. Nira tukwetam bunanyi bitonyi kunun ati, niryi Erda Erebdobnyi biti, ‘Dibnilibkwan,’ tenen er yan karuk borbatinyi ababyi ukubman kum kubnute. 12A yankwandanyi bira wibdeiboka sun Er Imtamnyi Uram kunubde ban nang ton sun Er Imtamnyi Uram kunubde ban kum nang asi yuk-yuk kibdeiboka bokeibkwande. Gandum du wimkabongna nang ara du wimna keica kikniboka taleramingiryok, gandum du yuk wibdeiboka alib kala ato dinyi yuk tam deiriraming. Ura, du teleb dongoanci dinyi asi gandum du deirin ai dongoraming. Ba, alib kala ato dinyi asi uk dongoraming. Ura, aminda yankwandanyi bibabyi neiktoto du wimdeirinanyi bitonyi kubkwande. Erda sun du moun nang asi bulubdeiboka lebkwandiryok, sun du moun kum uca alib kala ato nang asi yuk tam deiboka tangana kum uk buk angmaci ai dongorbinkwande.” Ato eboka Yohanes biryi nun Du Yesus aminda yankwamunyi biti etereramwe.
Yohanes biryi Yesus bisi me dongobmou uram
3:13-17
13A kuramnyi talak ara Er Yesus Galilea mutuk aryi kuboka me Yordan kwan katum dam yanmou. Ati, Erci, “Yohanes biryi Nisi me dongobkwanurur,” tenen yanmou. 14Ato tenebmouci, yanmou bok, Yohanes biryi ato eboka tatabmou, “Nai, Kanda malyi dinyi kununa kumnyi kurum deyok aryi, Kanci unato ati, ‘Me dongobnurum,’ eboka moloryanirim do? Nira malyi kunanyi kunun ati, Kanci nisi me dongobnutum ara kikiman kubte,” ebmou. 15Uca, Er Yesus biryi Yohanes bisi ato ebmou, “Kanci tatab ena kum uca Nisi me dongobnurum. Niryi Er Imtamnyi biryi teleb tenesurur to nirya asi kunubkwan ati, kanci Nisi me dongobnurum,” ebmou. Uca, Yohanes biryi kunuboka Yesus bisi me dongobmou. 16Sirya me dongobmou ura, Er Yesus me kwan umbura aryi anmalakoka anabkabmouci, me katum dam tingyibau. Tingyibau talak aryok Erci diramwe uca, imtam bublan kukmou. Asi, Er Imtamnyi Kanya Roh Kudus ara maka emnanyi ato dandoka Er deici tam langlang eryuryanmou. 17Ura, Er Imtamnyi biryi imtam aryi kuboka uram ton ebmou asi kekebmai. Ati, Er Imtamnyi biryi Yesus biti ato ebmou, “Anyi bira Nira Imtamnyi Er Mi ara Ni boukwe weik kimnounyi kurur. Ersi Ni Kanya teleb kunurur,” ebmou.
Atualmente Selecionado:
Matius Uram 3: MTG
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
@LAI 2007 (New Testament), @LAI2022 (Old and New Testament)
