Mateo 19

Jesús kjuako kuènté ti tꞌitjíhi kícho chojni

(Mr. 10:1-12; Lc. 16:18)

1A̱ndá ti ó kjuixin nixja chꞌin Jesús kaín tíha, ndá sákjuixin chꞌan Galilea la kjuíji chꞌan Judea tóhe ti nda̱río Jordán. 2La itsjé chojni chréhe̱ sin chꞌan. La ntiha kjuínchekito̱he chꞌan jína kaín ti chojni níhi.

3A̱ndá iso ti sin fariseo mé kóchjina sin, kjuanchankí sin nkehe kixin tsotsjehe sin nkexrín tsjate̱he chꞌin Jesús, mé ndáchro sin:

―¿Á siín kjuachaxin tsjáke̱he̱ ijnko chojni ti ichjién kjónté chóntahya ijie̱ ní? ―ichro sin.

4 # Gn. 1:27; 5:2. *Ndá kjuáte̱he chꞌin Jesús, ndáchro:

―¿Á kjui̱nchekuáxinhñara ti xroon itén Díos ndáchro kixin ti nkexro kjuíchꞌéna kaín chojni siín chjasintajni ti xránkíxixín, la ti nkexro a mé “kjuíchꞌéna chꞌan chojnindoa la ko chojnichjin”? 5#Gn. 2:24.*La ko ndáchro xroon: “Ti chojnindoa la tsíto̱he itꞌé la ko ìñé la tsákja ti ichjién, la yóí sin tsꞌóna sin éxi nkoko̱a chojni.” 6Méxra̱ í jehya yaá sin. Náhí. Kꞌóna sin nkoko̱a chojni la Díos kjuajon kjuachaxin kixin kónkojié sin, la chrókꞌuíto̱ehya kícho sin ―ichro chꞌan.

7 # Dt. 24:1-4; Mt. 5:31. *Ndá ti sin fariseo mé kjuanchankí sin:

―¿Ndá nkexrín kixin Moisés la kꞌue̱to̱an kixin tsꞌóna ijnko xroon tsákja ti chojni ichjin ndá jína tsꞌitjíhi kícho sin? ―ichro ti sin fariseo.

8Ndá ndáchro chꞌin Jesús:

―Kixin jahara la imá icha a̱sánra, ndá xi̱kaha Moisés kjuajon kjuachaxin kixin tsꞌóna ti xroon tsꞌitjíexín kichuara, kjánchó ti xránkíxixín la xi̱kahña kóhen. 9#Mt. 5:32; 1Co. 7:10, 11.*Méxra̱ ndáxrja̱n kixin ti nkojín nkexro tsjáke̱he̱ ti ichjién kjónté kjuasinhña tjan ijie̱, chóntahya tjan íjnko chojnindoa, la ti nkexro la tjasin ijie̱. La ko kja̱xin ti ijnko nkexro tsákja ijnko chojnichjin tsíkítsinkehe la kja̱xin ijie̱ tíha.

10Landá ti sin kꞌuájiko chꞌin Jesús ndáchro sin:

―Ti tjajo̱nko kícho sin la ícha jína chrókóte̱ehya sin.

11Ndá ndáchro chꞌin Jesús:

―Tsjéhya chojni tienxín ti nkehe i. Jehó ti nkexro kjuajon Díos kjuachaxin kixin tsienxín. 12Kixin siín chojni la tsíko̱kjiéxién xitjahya tsochónta ichjién. Íso sin la xrokjuahya tsákja kícho sin kixin chojni tsíkjinchekjia̱nkíhi sin, la ko íso sin la takjahya kícho sin kixin tjinkaon Díos kixin jehó sin tsꞌejó sin sichꞌehe sin chꞌan ixra̱. Ti sin tsjacha tsitekaon tíhi la xi̱kaha chrókuitekaon sin.

Jesús kjuíncheñao chájan

(Mr. 10:13-16; Lc. 18:15-17)

13Ndá kjui̱ka̱o sin iso xjan kixin tsjakꞌetja chꞌin Jesús itja la sincheñao chꞌan xjan. A̱ndá ti sin kꞌuájiko chꞌan mé kónínkakohen sin ti nkexro kjui̱ka̱o ti xjan. 14Ndá chꞌin Jesús ndáchro:

―Ti̱to̱héra tso̱chjina xjan ti itjén janhan la tꞌínkakuénhñara xjan kixin ti kjuachaxin kuènté nkaya nka̱jní la yóhe̱ éxi ti xjan i ―ichro chꞌan.

15Ndá ti ó kjuixin kjuakꞌetja tja chꞌan ti xjan la sákjuí chꞌan.

Ijnko ndasoá rico

(Mr. 10:17-31; Lc. 18:18-30)

16A̱ndá ijnko chꞌin ndasoá sákjuitsjehe ti chꞌin Jesús la kjuanchankí ndáchro:

―Maestro, jaha ijnko nkexro jína. ¿Xá nkehe chrókjuíchꞌeni ndá chrókꞌuitjani ti kjuachón nkochríxín? ―ichro chꞌan.

17Ndá chꞌin Jesús kjuáte̱he, ndáchro:

―¿Nkekuènté ndáchrua kixin janhan la jína? Jehó nkoko̱a nkexro mé jína, tíha mé Díos. A̱ndá ti tjinkaoan tsochonta ti kjuachón nkochríxín la titekaoan ti nkehe kꞌue̱to̱an Díos ―ichro chꞌin Jesús.

18 # Ex. 20:13; Dt. 5:17; Ex. 20:14; Dt. 5:18; Ex. 20:15; Dt. 5:19; Ex. 20:16; Dt. 5:20. *Ndá ndáchro ti chꞌin ndasoá:

―¿Nkexéhe tíha?

Ndá ndáchro chꞌin Jesús:

―Chrokꞌoñáhñara chojni, chrókjuacheéhyara kichuara, chrókueéhyara, chrókjui̱chꞌénehñara kjuachꞌia ijnko chojni, 19#Ex. 20:12; Dt. 5:16; Lv. 19:18.*chróchontehéra kjuasàya ti itꞌára la ko ìnára la ko chrótjue̱héra kichuara éxi tju̱éxinra a̱sánra ―ichro chꞌin Jesús.

20Ndá ndáchro ti chꞌin ndasoá:

―Kaín tíha la kjuínchexiteyáni ndesi kꞌuánkíni. ¿Xá nkehe ti na̱xa̱ tꞌitjáña? ―ichro chꞌan.

21Ndá chꞌin Jesús ndáchro:

―Ti tjinkaoan chaxín jína si̱nchexiteyá la sátjia, nchekjia kaín ti nkehe chonta, la ncheki̱to̱nhén ti sin nóa. Ndá kaín ti nkehe tjete mé tsochonta nkaya nka̱jní. A̱ndá ti ó tsjixin, ndá tsjihá, la chréhé ti janhan ―ichro chꞌin Jesús.

22Ndá ti ó kuíhin ti chꞌin ndasoá xi̱kaha, la imá kꞌuává chꞌan sákjuí chꞌan kixin imá itsjé nkehe tjete chónta chꞌan.

23Ndá chꞌin Jesús chenka chꞌan ti sin kꞌuájiko chꞌan, ndáchro chꞌan:

―Chaxín ndáxrja̱n kixin ti chojni chónta itsjé nkehe tjete la imá ixra̱ tsꞌixehen ti tꞌe̱to̱axín Díos itjen nkaya nka̱jní. 24Ínaá ndáxrja̱n kixin a̱ntsí xra̱hya chrókꞌuatsínka ijnko kokamello ti tjexrja ijnko ntachika, ke ijnko nkexro chónta itsjé nkehe chrókꞌuixehen ti itjen Díos tꞌe̱to̱an.

25Ndá ti sin kꞌuájiko chꞌan ti ó kuíhin sin xi̱kaha la imá chrákon sin, la kjuanchankíhi kícho sin, ndáchro sin:

―Ti xi̱kaha la, ¿xá nkexro tsjacha tsaá? ―ichro sin.

26Ndá komá chꞌin Jesús ti jehe sin la ndáchro chꞌan:

―Ti chojni ó la tsjachahya sinchexiteyá tíhi. Kjánchó Díos la jína sichꞌe kaín nkehe, kixin Díos la kohya nkehe ixra̱ ―ichro chꞌan.

27Ndá ndáchro chꞌin Pedro:

―Ìnchéni, kaíni la kuíto̱heni kaín ti nkehe chóntani ndá chréhe̱ni ti jaha. A̱ndá, ¿nkehe tsꞌáyéhe̱ni? ―ichro chꞌan.

28 # Mt. 25:31; Lc. 22:30. *Ndá kjuáte̱he chꞌin Jesús ndáchro:

―Chaxín ndáxrja̱n kixin ti ó itsi ti ña̱o tso̱ni̱xin kaín nkehe, la ti Xje̱en Díos kꞌóna Chojni tsjakꞌe ti trono la tsochónta kjuachaxin ijié la kja̱xinra chréhéra ti janhan la tsꞌejotja̱xira teyó trono la si̱nchekito̱exínra iji̱é kaín ti sin tsíkꞌaxrjeníxin ti teyó xje̱en chꞌin Israel. 29La ko kaín ti nkexro kuíto̱he ndo̱e, la ko kícho o̱ itꞌé o̱ ìñé o̱ ichjién, xje̱en o̱ no̱nte̱e kixin chréhe̱ ti janhan, la a̱ntsí tsꞌáyéhe̱ sin la ko kja̱xin tsochónta sin ti kjuachón nkochríxín. 30#Mt. 20:16; Lc. 13:30.*A̱ndá itsjé ti sin imá tjetoan ijie, la ti ña̱o a la kanhñó tsꞌe̱to̱an sin. A̱ndá itsjé ti sin kanhñó tjetoan ijie la ti ña̱o a la imá tsꞌe̱to̱an sin.

Atualmente Selecionado:

Mateo 19: poeNTplus

Destaque

Copiar