Lin 9
9
Lapan Ipu Poromis Ile tan Noah
1Lapan iduwe puko-on ile tan Noah pe nedun su pe ipe ihpah, “Otpo nedu’ oduu hala sulo-on, ile pe yaya’ oduu hasarpat hala lokpoi ndre mandra-an. 2Pe oduu we mada’ oduu kise ta su ka-an, nenka-an pe ni. Su we hoso pahndran oduu pe honnoh taduu.
3“Oduu kawe otyo-on yohou ndre sulo-on, kile ndre ndrodan mbrulei pe mbrwen kei. Yu uduwe ndre sulo-on ana’ oduu odo yo-on. 4Tapake otyo-on sengin yohou ndrai mapwi idu eriy ti kolwii. Odosa ndrai ti ihpa ndre ndramat moren. 5Ipe ye homou kepwi homou ndramat kimet, eri we kikun pede-en. Iy ka-an kehe ndre keti ndramat kimet, eri we kimet yi.
6“Yu Lapan. Yu uhnan ndramat eri
ihpa ke ndre Yu.
Ile pe uh si lau ndre kepwi homou ndramat kimet,
eri sa ndramat we hapwi iy kimet yi.
7“Otpo nedu’ oduu kile sulo-on pe odohor kile pule-en lokpoi ndre mandra-an.”
8Petngendrei ipe ile tan Noah pe nedun su yi ihpa, 9“Yu mahkele kah kude penuw ndrodan oduu pe su yaya’ oduu, 10ndrodan ka-an pe nenka-an yi ndre hondroh ise pwoi odo ndrol ndrodan oduu tih. 11Nolwo-on penuw Todo ti kurti: Yu upwe ndre ndrokene ihpa ndre Yu we kundrahnan wo kinsulmu-en lokpoi pwi yi. Yu we kundrahnan sa ndramat ndrodan ka-an pe nenka-an handrimat odo wo ideh pwi yi.
12“Ta penuw Todo kurti ile ndrodan oduu ndramat pe su ka-an pe nenka-an yi, pe we kindrito pe kindrito, kenon ndre lokpoi kinum. Ile pe kile kalmene-en poromis Todo kudu, eri 13Yu we kuduwe ka-uh kayeh Todo ki-in lon kohut. Iy erti kalmene-en ta penuw Todo ndroda lokpoi. 14Uh Yu kusorohe parar kile kohut pe ka-uh kayeh kihir, 15eri we Yu kudawonon poromis Todo ile tadam pe su ka-an, ihpa ndre Yu we kundretawe wo kideh pe kihyan sane ndre sulo-on more’ su ti pwi yi. 16Uh Yu kundroni ka-uh kayeh ki-in lon kohut, eri Yu we kudawonon ta penuw ndre Yu undrahnan. Ta penuw ndre we kinto pe kinto idu lengo pe lengan sane more’ su hodo lokpoi. 17Ka-uh kayeh erti ile kalmene-en poromis ndre Yu ko umpo ile ta su sane ndre sulo-on ngoho’ su idu ta su.”
Noah pe Nedun Su Kamal
18Su nedun Noah kamal ndre ho-us ndrol ndrodan iy ti Siem, Jafet pe Ham. Ham nedun ti Kenan. 19Sa ndramat ndre sulo-on odo lokpoi ti hehir odo ke ta su nedun Noah ndre tulmuu.
20Noah ti ndramat odo tehe sane pe iy ti iyin munen odo tehe padan wain ile langah. (Mbrwen wain ti henelisen ihhir ile wain.) 21Petsih eri iy iying wain ile hudut pe wain ipuhnen iy. Iy ilmetir ile lon emwen pelei odoke iy indretawonon iy pwi pe ndrihin iturup. 22Ham indroni taman inemetir kolowen ke pwi, pe iy ilninen ile tan tinton horu. 23Siem pe Jafet hartakuni kolau iyin ngondru’ horu, pe herlila ile ndruwe’ horu ile um pelei, pe horsorohe tama’ horu. Horu mada’ horu inna munen pwi, kihne herndroni tama’ horu inemetir ndrihin ke pwi. 24Noah ile huyen ti pe isehtunon homosa ndre nedun omur, Ham, ipu ile tadan, 25eri pe iy isamtan Kenan (nedun Ham kamal) ihpah,
“O saleu,
Kenan kile ke hono-on marai ke porah
tan tinton su.”
26Pe Noah ipe yi ihpah,
“Titsori rangan Petngendrei.
Iy Lapan ta Siem.
Kenan we kile hono-on maryan Siem.
27Lapan we kihnan yayan Jafet kihur kile sulo-on.
Pe hodo ndroda su yayan Siem.
Pe yayan Kenan su ti we hala hono-on marya’ su
yayan Jafet.”
28Idu ndruwen nor ti pe Noah imin krismas puken tulnget-pe-limngeh (350) yi. 29Krismas tadan ile ndre puken ansangat-pe-limngeh (950) pe iy imet.
Atualmente Selecionado:
Lin 9: KTM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc. All rights reserved.
