Lin 11
11
Tawa Odo Babel
1Idu ndruwen wo ideh ti pe ndramat hondrohor hanna sulo-on, odoke nolwo-o’ su ti mapwi handrai kopwi. 2Su hala wuron rai ea pe hamandro hodo lok sehir mandra-an pe malahan ise Babilonia.
3Su hopunou ihpah, “Tidu titakun poi palat pe tidapisii. Kinum pe titulmwi poi erti kihir pidikis.” Pat sulo-on hondroto lok kurti pwi, ile pe su hopo pidikis ile tumwe um. Su hentawe kolta ile lengan pidikis pe indrotowei inehndrepit. 4Inum pe su hapa ihpah, “Tidu kah tidahnan sih taon, pe tidehtong sih tawa elwe-en kile ndre parar eleng. Kile pe ranga’ tidu kihnding, pe titsarpat kile pule-en lokpoi ndresih kolwii.”
5Odoke Lapan ise pwoi pe isendre-et taon pe tawa ndre sa ndramat henehtong kurtih. 6Lapan ipe ihpah, “Su ke hokor pe nolwo-o’ su ke handrai, ile pe su hompo sane kutih. Omur ti su we hanon hopo sane ndre sulo-on kile reh ta su. 7Atsa. Tidu titla pwoi pe titsopelwen nolwo-o’ su kidut, kile pe su homou kihrungi homou kolwii.”
8Ile pe Lapan ihnan su hatpar hala hemir hemir, pe su hasarpat hala lokpoi ndre mandra-an, pe su hendrendrumwi marai odo taon ti pwi. 9Lok kuti rangan ile Babel,#11.9 Babel: Ile nolou Hibru eri Babel ti ihpa ndre nolou handrai ile ke lo handrai. odosa Lapan isopelwen nolwo-on taha ndramat ndre sulo-on, pe ihnan ndramat hasarpat hala pule-en lokpoi ndresih.
Tatili-iy Ta Siem Isto ndre Abram
10Iy kuti tatili-iy ta Siem. Krismas ruweh odo ndruwen wo ideh ti, Siem krismas tadan ihir puken sangat, pe iy nedun homou kamal rangan Arpaksat. 11Inum ti pe Siem imin lokpoi krismas puken limnget (500) yi, pe iy nedun kamal pe pedih se yi. Inum pe iy imet.
12Arpaksat krismas tadan ile ndre tulngeh-pe-limweh (35) pe iy nedun kamal homou rangan Selah. 13Inum ti pe Arpaksat imin lokpoi iyenon ndre krismas puken hangat-pe-toloh (403) yi, pe iy nedun kamal pe pedih se yi. Inum pe iy imet.
14Selah krismas tadan ile ndre tulngeh pe iy nedun kamal homou rangan Eber. 15Inum pe Selah imin lokpoi krismas hangat-pe-toloh (403) yi, pe iy nedun kamal pe pedih se yi. Inum pe iy imet.
16Eber krismas tadan ile ndre tulngeh-pe-hahuu, (34) pe iy nedun kamal homou rangan Peleg. 17Inum pe Eber imin yi, iyenon ndre krismas hangat-pe-tulngeh (430) pe iy nedun kamal pe pedih se yi. Inum pe iy imet.
18Peleg krismas tadan ile ndre tulngeh pe iy nedun kamal homou rangan Reu. 19Inum pe Peleg imin yi, iyenon ndre krismas runget-pe-ndrosih (209) pe iy nedun kamal pe pedih se yi. Inum pe iy imet.
20Reu krismas tadan ile ndre tulngeh-pe-ruweh (32) pe iy nedun kamal homou rangan Seruk. 21Inum pe Reu imin yi, iyenon ndre krismas runget-pe-ondrotoloh (207) pe iy nedun kamal pe pedih se yi. Inum pe iy imet.
22Seruk krismas tadan ile ndre tulngeh, pe iy nedun kamal homou rangan Nahor. 23Inum pe Seruk imin yi, iyenon ndre krismas runget (200) pe iy nedun kamal pe pedih se yi. Inum pe iy imet.
24Nahor krismas tadan ile ndre rungeh-pe-ndrosih (29) pe iy nedun kamal homou rangan Terah. 25Inum pe Nahor imin yi, iyenon ndre krismas sangat-sungoh-pe-ndrosih (119) pe iy nedun kamal pe pedih se yi. Inum pe iy imet.
26Terah imin krismas ihndre ndrotulngeh oh, pe iy ipu nedun. Iy nedun ndre tulmuu kamal. Homou rangan Abram, homou Nahor, pe homou Haran.
Su Nedun Terah
27Tatili-iy tan Terah ti ihpah: Terah ti nedun tulmuu kamal: Abram, Nahor, pe Haran. Haran ti nedun Lot. 28Haran imet odo lonen ndre Ur ilso Babilonia idu taman ti mapwi imin. 29Abram horu Nahor harasou. Mbrulun Abram ti rangan Sarai, pe mbrulun Nahor ti Milkah. Milkah horu Iskah ti tama’ horu Haran. 30Sarai ti indranon kindripo nedun pwi.
31Terah ikuni su lewen pe hatlang odo Ur odo Babilonia (Kaldia), pe su halla hala wuron Kenan. Su ndre ho-us Terah ti Abram pe mbrulun Sarai, pe nedun Haran ndre Lot. Abram ti taman Terah, pe Lot eri papon ti Terah. Su hendrihir Kenan mapwi, pe hamandro hodo taon sih rangan Harran.
32Terah, krismas tadan ile ndre puken runget-pe-limweh (205), pe iy imet imin Harran.
Atualmente Selecionado:
Lin 11: KTM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc. All rights reserved.
