A’NPHUTNA 8
8
Tuishânglen A’nchaina
1Pathen in Noah leh rakōng shunga ka-om ranhring rakip hei kha mahngi mak hei, ama’n thli inkhat amanhrânga khava khan tuishânglen kha tlâksuk inphut joa kae. 2Ralei thōia tuikapût akhâm jo. Chungvân tinga tuilen kot inkam jo, khōtui tlâk mak jo. 3Kanikhō 150 shunga tui kha jâ-jâma katlâk suk jo. 4Thla 7 tlukna ni 17 tluk ning rakōng kha Ararat inti tlâng chunga inhnga jo. 5Tuikalen kha khanga katlâk suk a thla 10 tlukna ahma inkei kani ning tlânghmor inshâng kha le’nlâr jo.
6Ni 40 kahnunga Noah khan kotte inkhat amahlânga, 7khana va-âk inkhat amasōa atirsōt. Va kha hong inlemak jo, kachanga tuilen kha akhenga atlâksuk mak kârseng kajōng lelea leika-om. 8Khava kâra, tuilen kha akatlasuk jo mo ti aka-en sik a vaṭhu inkhat atirsōt, 9tâk tuilen khan ram rakip alakachûmsō jâra vaṭhu khan chōngna sik hmun hmumak a rakōnga hong inlea Noah’n akutbân azera vaṭhu kha asura athōn manhlut nôk jo. 10Ama’n ni 7 ahngâksō kahnunga vaṭhu kha atirsōt nôk. 11Khōhlei ting hin olive bō kahring ather inkhat abeia aheitlena ahnenga hong inle. Khana inphut Noah khan tuishânglen kha katlasuk jo ti kha amanhret jo. 12Khana ni 7 ahngâksa nôk a, khava sōa vaṭhu kha vōi khat atir nôk; tuna chunga chu vaṭhu kha hong inlemak jo.
13Noah akum 601 atluk pha ahma kakei thla a kani hma inkeipen ning tuishânglen kha katlâk suk pet jo. Rakōng phuchung makhuna kha Noah’n amahlânga asîr aven akimve heia a-en lelea ralei kachâr kha ahmu jo. 14Thla hni tlukna kani 27 ning raleichung kha kachâr pet jo.
15Pathen in Noah hneng, 16“Ra-kōnga inphut nanuhmei nasahei leh annuhmei heirakip heisōk jo ruh. 17Va leh sha rakip ṭhōisōt heiroh, raleichung anhlōsōa sa leh te anneia anpung theina sik masō hei roh,” ati. 18Khava jâra Noah’n rakōnga inphut anuhmei, asahei khana anmani nuhmeihei leh inṭhōia kasōksōt jo hei. 19Rakōng shunga sha leh vahei kha anruprup a abân bâna heikasōk hei.
Noah’n Inthoina Atlo
20Noah’n Rōngpu hneng maichâm inkhat aleisyem. Ama’n inthoina a’ntheng sha leh vahei kakip a inkha-khat ahei choisōt a maichâma apum a aro mankhut hei. 21Inthoina marim khan Rōngpu malung kha katlâi joa abinga, “Mihringhei tloset jâra avea ralei hi hâksêr mak jo ning; ansinlaia inphut anmandonna hei kha ṭhaphung mak ti hi kamanhret. Ke’n tuna katlo kapōa ahei tik a’m akahring hei hi suk manram mak jo ning. 22Vânhnōi ralei a-om kârseng avor pha alōk pha ka-om sik. Akalum leh akadai, sûr leh ṭhe, sûn leh jân ka-om ṭhak sik jo,” ati.
Atualmente Selecionado:
A’NPHUTNA 8: KOMRBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
