RIPHUTNA 13
13
Abrama neh Lota an inṭhen
1Abrama khah Aigupta rama rithoka khan a suak a, a nupui neh ai nei murdi neh khan Kanan sim ramah khan a fe tâk a, Lota khom a fe sa a. 2Abrama khan berahei, sialhei, kêlhei, sumhei, rângkachakhei a nei tam tak tak a. 3Sim rama rithoka khan Bethel khua dênin a fe thiai mai a. Bethel neh Ai khua kâra matona om mun a lei khuarna, 4mâichâm a lei indingna mun ngêi khah a tlung tâk a. Khanchu, kha munah khan Abrama khan Pumapa chubai a ûn tâk a.
5Lota khom khan berahei, kêlhei, sialhei a nei intam a; khabanah, insungkuahei neh isomhei khom a nei a. 6An ruaika munka om rangin ramin dai khâi mak a: an ran nei khah a tam tak tak sikin munkan om thei khâi mak a. 7Abrama ran enkoltuhei neh Lota ran enkoltuhei kârah khan ringo rikhalnahei a hong suak tâk a. Kha lâiah khan Kanan mihei neh Periz mihei khah, kha ramah khan an la om a.
8Khanchu, Abrama khan Lota ziangah, “Parfâkah ei nit a, nangmah neh keima kârah hoinona omno riseh, nê somhei neh ke somhei kârah khom ringo rikhalna om no riseh. 9Ram rizat tak a om a; khasikin, tho inṭhen ei ta, ni nuamna tiang tak ram khah rithlang inla, nangmah voitiang pangah ni fen chu keimah changtiang pangah fêng ki ta; a nit, nangmah changtiang pangah ni fen chu keimah voitiang pangah fêng ki ti,” a ti a.
10Khanchu, Lota khan a thlîr vêl a, Jordan Phâizôl murdi kha Zoar idênin Pumapa rikul angka dôr, Aigupta ram angkana ram iṭha, tui tamna ram a nit iti a mu a.Pumapa khan Sodom neh Gomora khua â siat ma khah a nit.#Riph.2:10. 11Khanchu, Lota khan Jordan Phâizôl murdi khah ama omna rangin arthlang a; sua tiangah khan arthon tâk a. Khangkah khan kha mi pasal inikahei khah an înṭhen a nit.
12Abrama chu Kanan ramah khan a om a; Lota chu phâizôl khopui lâia Sodom khua kôla khan mun a khuar tâk a. 13Sodom mihei khah Pumapa mitmun natinsat taka sia neh insual an nit a.
Abraman Hebron a pan
14Lota a om inran nungah khan Pumapa khan Abrama ziangah, “Thlîr inla, ni omna rithoka khan mâr tiang hei, sim tiang hei, sak tiang hei, thlang tiang hei en roh; 15ni ram mu phâk murdi hih nangmah neh ner chihein kumkhuaka nin dong rangin nang kî pêk rang a nit. #TS.7:3. 16Ner chihei chu rinênga ṭiai dôra tamin siam ki ta, iṭiai tep zoi zât ino ai nit angkan ner chihei khom tep zoi zât loi nîng an ti. 17Thoi inla, ram hih a dung a khang rifang suak inla, en roh; an rêngkan nang kî pêk rang a nit,” a ti a. 18Khanchu, Abrama khan a puan in khah a thon a, Hebrona om Mamre#13:18 Mamre hih miriam riming nîng a ti. Hebron mun riming khatkah inin â lang. Hi munah hin Elon (Saso) nam dang pathian biakna mun a om sa ngir. Abrahaman hi munah hin ithlân ram archôk. saso kung kôlah khan om mun a va khuar tâk a, kha munah khan Pumapa rang mâichâm a siam tâk a.
Atualmente Selecionado:
RIPHUTNA 13: BIATBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The Bible Society of India
© 2014, Used by permission. All rights reserved. More
