Mateo 16

Na fariseopi qataq na saduceopi iÿaxaataique da qai'ot ca n'anec mayi sa qaÿauanapega

(Marcos 8.11-13; Lucas 12.54-56)

1Na fariseopi qataq na saduceopi nqo'ona so Jesús da ÿauotaique da ÿauo'o ca ÿachigoxotchigui lasouaxashit naq'en somayi. Nachi qaiÿaxanot somayi, da yaqto' i'ot ca n'anec sa qaÿauanapega da chigoqo'ot naq'en na piguem. 2Qalaxayi somayi 'enapeco':

–Qami' da ivita yi avit, qalaq qoñiita': “Ÿoqta da no'on ca na'a'q qoyi'oxoñi, cha'ayi ÿataqta toc da avit.” 3Qaq da ña nte'etom, qalaq qoñiita': “Ÿoqta da qauem na na'a'q, cha'ayi ÿataqta toc da nala' lliguishiguem qataq napalgui.” ¡Qami' mayi qoñiitega da qami' llalqa ñi Dios! Ÿataqta qauaÿajñi da qau'axachi da lataxac na piguem. Qalaxayi qami' sa ishit da qauaÿajñi da qau'axachi cam naigui naua l'anqa'te naua souaqtaiguilo na'axa'te. 4Ne'ena shiÿaxauapi qauemaicpi qataq ÿalat ñi Dios, namayipi nagui iÿaxaataique da qai'ot ca n'anec mayi sa qaÿauanapega. Qalaxayi sa ishit da qoÿami', cha'ayi chaqsota som n'anec mayi huaigui co'ollaxa so Jonás mayi qoÿan.

Ime, nachi jec, ca'ai somayipi.

Ana ÿashiidaxachigui ana pan mayi huetaigui na fariseopi

(Marcos 8.14-21)

5Qaq soua lapaxaguenataqa so Jesús co'ollaq tadetague da le'ego aso lapel, nachi soomayi icoua'aisalo co'ollaxa da ÿachi' aca pan. 6Nachi so Jesús 'enapegalo soomayi, 'eeta':

–Maxatchaxa qome, qadvichiÿa'a ana ÿashiidaxachigui ana pan mayi huetaigui na fariseopi qataq na saduceopi.

7Nachi soua lapaxaguenataqa deuennataxaata'pe co'ollaxa, 'eetra':

–Peta'a souaxat da qomi' sa ishit da ñachoq aca pan.

8Nachi so Jesús co'ollaq maichi ÿaÿaten da lhuennataxa somayipi, nachi 'enapega, 'eeta':

–¿Tá'ainco' yi qoñiitega da qaca aca qayi'acoi pan? ¡Qami' ÿataqta qapi'olec da qadpi'iÿaxaqui! 9¿Ñaq 'eetalec peta'a da qaica ca qauaÿajñi, qataq sa ishit da tagui yi qadvilli soua cincole pan mayi sanoigui co'ollaxa so cinco mil shiÿaxauapi, qataq yi lcate' co'ollaxa soua nlaxatchiguilo so ñi'iÿoxot? 10Qataq ¿sa ishit peta'a da qantouñiita'aque soua sietole pan mayi sanoiguilo co'ollaxa so cuatro mil shiÿaxauapi, qataq yi lcate' co'ollaxa soua nlaxatchiguilo so ñi'iÿoxot? 11Qataq ÿoqta da sa ishit peta'a da qauaÿajñiiguet da aÿim sa ishit da shiitega aca yi'oqchigui pan can shiitegalo qami' da maxatchaxa qome da qadvichiÿa'a ana ÿashiidaxachigui ana pan mayi huetaigui na fariseopi qataq na saduceopi.

12Huaña, nachi soomayi ÿaÿate'n da so Jesús sa ishit da 'eetega da qaivita'a ana yi'oqchigui ÿashiidaxachigui ana pan, chaqdata da qaivita'alo naua lapaxaguenataxanaxaco nam fariseopi qataq nam saduceopi.

So Pedro i'axat so Jesús da nachiso so nta'a mayi nca'alaxaqui

(Marcos 8.27-30; Lucas 9.18-21)

13Qaq so Jesús co'ollaq ivita yi 'alhua Cesarea mayi ilotague' so Filipo, nachi inatta'pe soua lapaxaguenataqa, 'eeta':

–Na shiÿaxauapi nagui ¿chaq négue't ca ipettega na shiÿaxaua llalec?

14Nachi soomayi 'ena'po':

–Qomyi huo'o na 'eetega da nachi'am Juan mayi nachilaxanataxanaq, qataq huo'o na 'am 'eetega Elías, qataq huo'o na 'am 'eetega Jeremías, huo'otaq ca lÿa l'aqtaxanaxanec ñi Dios so hua'aupi.

15Nachi so Jesús 'enapeco':

–Qaq qami', ¿négue't ca qaupichiitega aÿim?

16Nachi so Simón Pedro 'enapeco':

–Qomyi nachi'am nta'a nca'alaxaqui mayi 'am llalec ñi Dios mayi sa ishit da ileu.

17Nachi so Jesús 'enapeco':

–'Am Simón mayi 'am llalec so Jonás, ÿataqta lta'adaic qome da 'adamaic, cha'ayi sa ishit da chochi shiÿaxaua ca 'am ÿaÿajnaxanaxanec de'eda, chaqñita ñi ita'a mayi neta'ague da piguem. 18Qaq aÿim 'am shinapega da 'am Pedro mayi 'am coma', qaq da ne'ena coma' aÿim so'oxootelec qome aca i'onaxanaxaqui. Qaq ivida'a qome da l'añaxac da nleuaxa ÿataqta sa ishit da nlaxajñi acamayi. 19Qaq aÿim qome 'am sami' aca lvinaqte da l'onataxanaxac ñi Dios mayi neta'ague da piguem. Qaq ca 'am 'auashiita ana 'alhua, qaq camayi nataq'en qaÿashiita da piguem. Qaq ca 'am sa ishit da 'auashin, qaq camayi nataq'en sa ishit da qaÿashin da piguem.

20Nachi so Jesús huaqattapeguelguete soua lapaxaguenataqa, da yaqto' sa ishit da huo'o ca da'aqtaxaadem da somayi nachiso so nta'a mayi nca'alaxaqui.

So Jesús i'axata'a da nalaataguec

(Marcos 8.31–9.1; Lucas 9.22-27)

21Qaq huaña, nachi so Jesús ÿataqta da'aqtaxaatema soua lapaxaguenataqa, 'eeta':

–Aÿim saigue da Jerusalén. Qaq huaña qome yimayi, nachi na nquedoxonecpi qataq na lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios, qataq nam dapaxaguenataxaatapeguec na lqataxacpi so Moisés, namayipi ÿataqta qalota qome naq'en da ñique'ejnaxac, qataq aÿim qaÿalauat. Qalaxayi qom mashi inoxoodeec caua tres na'axa'te, nachi qaltaq ñica'aleec.

22Nachi so Pedro iÿotauga somayi, nachi ÿataqta 'enapega, 'eeta':

–¡'Am ÿataxala', ñi Dios ÿataqta 'am ntelaqna'aguet qome de'eda, da yaqto' sa ishit da huo'o ca qouaigui!

23Qalaxayi so Jesús nachi nchimaxañi, nachi 'enapega so Pedro, 'eeta':

–¡'Am Satanás, aÿim qoca'ai! Cha'ayi 'am ÿataqta aÿim sa 'aualemaxat. 'Am sa ishit da qoneta'am da lhuennataxac ñi Dios, chaqnata nam shiÿaxauapi mayi qoneta'am.

24Nachi so Jesús 'enapegalo soua lapaxaguenataqa, 'eeta':

–Da huo'o ca nshitaique da aÿim quegue, qaq no'on da ÿalat 'enauac na maichi lhuennataxa, ime, qaq aÿim quegue, nai'ctaxa da daqat da nachaalataxac. 25Cha'ayi ca nshitaique da maichi nca'alaxateec da nachaalataxac, qaq camayi daqat. Qalaxayi cam 'ico' ÿaqataqchit da nachaalataxac souaxat aÿim, qaq nachica ca qanca'alaxateec. 26Cha'ayi ¿négue't cam ÿachigoxotaigui ca shiÿaxaua da huo'otaq imatta't 'enauac nam huetalec ana 'alhua, qaq da nachaalataxac daqat? huo'otaq ¿chaq négue'to' ca deshiitenaxana da ñi'iguelaxajla't da nachaalataxac? 27Cha'ayi ne'ena shiÿaxaua llalec, qom ñi'iguelaq, nachi nactaigui da lli'oxoyic ñi lta'a qataq nam lamaxashic piguem l'ecpi. Huaña, nachi ishiiten ñi 'oonolec cam l'onataxanaxac. 28Qaq ÿataqta 'eesa de'eda qami' shinapegalo da huo'o nagui na ÿalectauo da sa ishit qome da ileu qom saxanaxa da ilogui na shiÿaxaua llalec qom mashi ñi'iguelaq da nactaigui da l'onataxanaxac da nta'a.

Atualmente Selecionado:

Mateo 16: TBSNT

Destaque

Copiar