Génesis 3

Adán tén han Eva megkalyaheykekxa Dios

1Yéwa axta aqsa ekteme ekmowána ekpeywa kalyexanchesha mók, neyseksa m'a aqsok nawha'ák ektáha axta Dios apkelane. Entáhak axta elmaxneyeyncha'a kelán'a s'e:

—¿Naqsóya Dios meltémo kóltók xama enxoho yámet ekyexna élámha nak se'e yókxexma ektaqmalma nak?

2Entáhak axta kelán'a eyátegmowágko s'e:

—Egwanchek antók yámet ekyexna negmakókxa enxoho antók, 3eyke mogwanchek antók ekyexna m'a yámet émha nak neyseksók yókxexma ektaqmalma. Ẽltennássek axta negko'o Dios mogwanchek antók, tén han ampaknegwomhok ekyexna xa yámet nak, ótsapok héxta nentawa enxoho.

4Tén axta yéwa ektáha eyáneya kelán'a s'e:

—Wanchek amya'a, megkóletsepe'. 5Apya'ásegkok Dios kéltawa enxoho kéxegke xa yámet ekyexna nak, kólya'ásegwók sa' aqsok ektaqmela, tén han aqsok ekmaso, keñe sa' kólhágwakxohok ma'a Dios.

6Wet'ak axta ektaqmela agko' kelán'a m'a yámet ekyexna, makawók axta katwok, makawók axta han kaxek ekyekpelchágwayam. Nakxeyk axta xama ekyexna tén axta ektawa, keñe axta han ekmésa m'a atáwa', aptókek axta han ma'a. 7Yetlókok axta han élyekpelchágwayam, kelya'ásegwokmek axta ekháncha'a meyke apáwa. Keñe axta élánegko éláhakkasamáxche higo áwa'.

8Apleg'ak axta énxet, tén han aptáwa' apweynchámeyncha'a Dios Wesse' egegkok yókxexma ektaqmalma, cham'a ekweykenxal'a kaxchahámha taxnám, tén axta ényahágko élyexánegkessekmo neyseksa yámet élaqnéyak axta m'a yókxexma ektaqmalma. 9Apwóneyha axta eyke Dios Wesse' egegkok ma'a énxet. Aptáhak axta apkelmaxneyeyncha'a s'e:

—¿Háxko apmahágkaxa?

10Aptáhak axta énxet apchátegmowágko s'e:

—Ekleg'ak xeyk apweynchámeyncha'a yókxexma ektaqmalma, eyekak xeyke, hakte méko ko'o apáwa, cháxa keñamak sekyexanma nak.

11Keñe axta Dios aptáha apkelmaxneyeyncha'a s'e:

—¿Yaqsa éltennasa exchep aptáha meyke apáwa? ¿Aptókek enxél'a yámet ekyexna sekmasma axta etwok?

12Aptáhak axta énxet apchátegmowágko s'e:

—Kelán'a segkésso axta exchep yaqwayam atnehek sekxegexma, exchek segkésso ko'o m'a yámet ekyexna keñe sektawa.

13Keñe axta Dios Wesse' egegkok aptáha apkelmaxneyeyncha'a kelán'a s'e:

—¿Yaqsa ektáha ektáha nak xa ektáha nak?

Entáhak axta kelán'a eyátegmowágko s'e:

—Yéwa exchek ko'o élyexancháseyha, sektawa m'a yámet ekyexna nak.

14Aptáhak axta Dios Wesse' egegkok apcháneya yéwa s'e:

Ektaqnómaxche sa'

katnehek xeye',

megkaxók sa' ma'a

ekyókxoho aqsok

nawha'ák nak,

eñama élane xa.

Katekxeyagkok sa'

kaxwók awokmo'

xapop kaxog,

xapop sa' nahan

chá'a katwok.

15Énmexma sa' kaxwók

xeye' atnéssesek kelán'a,

kawakxohok sa' han

ma'a étkok nak xeye',

kalenmexek sa' ma'a

atawán'ák nak kelán'a,

katchágkasek sa'

chá'a akqátek,

tén sa' xeye'

kateyxchesek chá'a apáhak.

16Keñe axta kelán'a aptáha apcháneya s'e:

Kañegkohok sa'

chá'a exche'

neyseksa ekteme lóso',

tén han ma'a

ektáha enxoho

chá'a naqláwa.

Kámenyéhok sa'

chá'a atáwa',

yának sa' eyke

kalyahakxohok

chá'a exche' m'a.

17Keñe axta énxet aptáha apcháneya s'e:

Ekmaso sa' kaxwók

katnehek keso náxop,

eñama apsexnánémap xép,

apkelyahákxoho ekpeywa aptáwa',

aptawa m'a yámet ekyexna

sekmasma axta etwok,

yetlo aptamheykha ekyentaxno sa'

chá'a kaxwók xép etekkesek apto,

neyseksa apha makham.

18Katyapok sa'

kaxwók am'ák xapop,

tén han pegke,

etwok sa' nahan chá'a

m'a eñama nak naxma.

19Katyapok sa' chá'a

apyemes ekpayhakxa

nápat étak apto,

ekwokmoho aptamhákxo

makham xapop,

apkeñamakxa axta apkelánamap,

hakte xapop xeyep,

xapop sa' han etnekxa'.

20Apteméssessek axta han ekwesey Eva aptáwa' m'a énxet, hakte cháxa ektáha egken apyókxoho énxet'ák xa. 21Apkelánessek axta Dios Wesse' egegkok aqsok nawha'ák émpe'ék énxet, tén han aptáwa' yaqwayam kalántaxnekxa', 22keñe axta aptáha s'e: “Eghágweykxók kaxwók negko'o énxet, apya'ásegkok kaxwók aqsok ektaqmela, tén han aqsok ekmaso, móghók sa' etwok ma'a yámet ekyexna ekyennaqtéssamo nak egnények, hakte aptókek agkok ma'a, megyetsepek chá'a.”

23Axta keñamak aptekkessama Dios Wesse' egegkok énxet ma'a yókxexma ektaqmalma nak Edén, apkeltamho etneykha xapop, apkeñamakxa axta apkelánamap. 24Apkelhéssekmek axta han apkelásenneykha ekha nak apxempenák ma'a ekpayho nak ekteyapmakxa ekhem ma'a yókxexma ektaqmalma, natámen axta aptekkesso énxet, appekkenwokmek axta han xama sókwenaqte élyenma, ekweynchámeykencha'a axta chá'a m'a ekyókxoho kañe', yaqwayam enxoho chá'a méko kammok ma'a émhakxa nak yámet ekyennaqtéssamo nak egnények.

Atualmente Selecionado:

Génesis 3: ENXBI

Destaque

Copiar