GÉNESIS 4

Caín najan apyalhing Abel

1Enlhit aptava ilhnic nat acvisay Eva. Appatjetamquic nic nat aptava. Inlovsoc nic nat intomjac. Aptiyacmec nic nat ayitca apvisay Caín. Intomjac nic nat Eva: Acvitac coo sictamongvoyam apquinavo, Dios simquescama— nic nat intomjac. 2Natamin aptiyacmec nic nat ayitca apvisay Abel. Caín apyalhing nic nat Abel. Nipquesic apvitip nic nat Abel. Apquilcacjam amyip nic nat Caín.

3Acvoncaclhojo ilhnic nat intomjac. Lhama acnim nic nat intomjac apsantamo acyilhna Caín, actemaclha macmescama Dios. 4Apsantac nic nat najan Abel aptoscama nipquesic apquitcoc, actemaclha macmescama Dios. Apyispaquic nic nat Dios aptemaclha Abel najan actemaclha apmescama.#He 11.4. 5Am nic nat colcac apvalhoc Dios aptemaclha Caín najan actemaclha apmescama. Aplovquic nic nat Caín. Inyimtilhec nic nat apvalhoc.

6Aptomjac nic nat Dios apcanya Caín: —¿Soctomja aplova nac lhip? Inyimtilhe nac lhip apvalhoc. 7Apyiplovcasquic sat ancoc lhip actemaclha actamila, cotamilam sat najan apvalhoc. Am sat ancoc eyiplovcasac lhip actemaclha actamila, coytic sat meyascalhma apnaclha lhip yoyam cosilhnana. Iyimnac sat lhip yoyam mesilhnanacpeje— nic nat aptomjac.

8Nalhit acnim nic nat intomjac. Apquiltamjoc nic nat Caín eyantamac apyalhing Abel, yoyam etnejic aplhalhma. Apquilvoclhec nic nat amyip. Yejemoc nic nat aplova Caín. Apcajac nic nat apyalhing. Apquitsepquic nic nat Abel.#Mt 23.35; Lc 11.51; 1 Jn 3.12.

9Aptomjac nic nat Dios apcanya Caín: —¿Jalhcojo apyasa lhip apyalhing Abel?— nic nat aptomjac.

Apcatingmavoc nic nat Caín: —Paj coo oyasamcoc. ¿Pa ya otamilsic coo eyalhing?— nic nat aptomjac. 10Aptomjac nic nat Dios apcanya Caín:

—¿So aptomja lhquip qui? Acvitac coo em pac acyinquinomalhca lhip apyalhing. Lhip lhac apcajem. Incaymalhquic oyanmongsiclhac coo.#He 12.24. 11Apmapsom sat etnejic mataa lhip. Aptipsacpec lhip as amyip apcajemaclha lhip apyalhing. 12Elcaoc sat mataa lhip moc amyip. Metejec sat mataa acyilhna. Colhejec sat lhip apmaclha as nalhpop, mepqui aplovquiscama apyampay— nic nat aptomjac Dios.

13Apcatingmavoc nic nat Caín: —Avanjec sat cotnejic siclingaycamco acyanmongayclha sictemaclha, molinmalhalhquejec coo. 14Lhip Dios aptomja setipquiscama as amyip quilhvo nac jay. Oyacsic sat mocjay lhalhma anco, mepqui siclovquiscama sicyampay. Oyilhanmoc sat otac lhip. Jeyajic sat otjanyac poc enlhit— nic nat aptomjac.

15Aptomjac nic nat Dios apcanya: —Apmatnec sat ancoc lhip, siete sat otnejic sicyanmongsayclha enlhit aptomja apcajem lhip— nic nat aptomjac.

Appiquinquic nic nat Dios Apyimtalhnamo asoc monquinatquiscama apyimpejic Caín yoyam mematneje. 16Apyamyaclhec nic nat Caín amyip apmaclha Dios Apyimtalhnamo. Apvoclhec nic nat yoclhilhma Nod, nicja yoclhilhma Edén, acpayjo actiyapmaclha acnim.

Caín aptovana niptamin

17Appatjetamquic nic nat aptava Caín. Inlovsoc nic nat intomjac. Aptiyacmec nic nat ayitca apvisay Enoc. Apquillanac nic nat tingma apvanyam Caín. Apquiltimec nic nat apvisayo lhama apquitca Enoc. 18Enoc apquitca ilhnic nat Irad. Irad apquitca ilhnic nat Mehujael. Mehujael apquitca ilhnic nat Metusael. Metusael apquitca ilhnic nat Lamec. 19Anit apnatamcaa ilhnic nat Lamec. Lhama ilhnic nat acvisay Ada, moc nic nat acvisay Zila.

20Ada ayitca ilhnic nat Jabal. Jabal apquitquic nic nat apquilpaclheneycaoc carpa. Apquiltomja ilhnic nat apquiltamilquiscama apnatoscama. 21Jabal apyalhing nic nat Jubal. Jubal apquitquic nic nat apquiltomja apquilpayvascama arpa yatalhpong najan flauta yammamoc. 22Zila ayitca ilhnic nat Tubal-caín. Apquillanac nic nat asoc ningilmaycam tava apáoc, hierro najan bronce ilhnic nat tava apáoc. Tubal-caín apyalhing nic nat acvisay Naama.

23Aptomjac nic nat Lamec apquilanya apnatamcaa:

Lhiya Ada najan lhiya Zila, colaylhojo sicpayvam.

Ayajac alhta coo lhama enlhit.

Acyanmongsaclhec alhta seyimsascama.

Acyanmongsaclhec alhta seticpaycam.

24Yitnec alhta siete acyanmongayclha apmatnam Caín.

Setenta y siete sat cotnejic acyanmongayclha sicmatnam coo— nic nat aptomjac Lamec.

Poc apyalhing Caín

25Appatjetamquic nic nat mocjam aptava Adán. Aptiyacmec nic nat ayitca apvisay Set.

Intomjac nic nat inquin: —Emcasquic poc sictamongvoyam Dios, apyanmongayclha Abel apmatnam alhta— nic nat intomjac.

26Apvitac nic nat apquitca Set. Apquiltimec nic nat apvisay Enós. Apquiltimec nic nat siclhoc anco apquilmalhnancama enlhit. Apquillhenquic nic nat apvisay Dios Apyimtalhnamo.

Atualmente Selecionado:

GÉNESIS 4: ENHL

Destaque

Copiar