Mateo 10

Midsug̵ù ni Jesus kes Menge Epustul

(Mateo 10:1-4; Marcos 3:13-19; Lucas 6:12-16)

1Ne midtig̵um ni Jesus diyà te kandin is menge sepulù wey zezuwa he sumusundan din, ne mibeg̵ayan din sikandan te g̵ehem wey zan meulii is edlelungen te mezaat he mulin-ulin, wey zan daan mevewii is minsan hengkey he zaru wey ebpenggezamen te menge etew. 2Iyan heini menge ngazan te sepulù wey zezuwa he sumusundan he migeraran ni Jesus he epustul, he ke và dà egkeg̵iya, menge sug̵ù din: iyan lavew kandan si Simon he migeraran ni Jesus ki Pedro; ne zutun daan si Andres he hazi ni Pedro wey is menge anak ni Sibidiyu he si Santiago wey si Juan is hazi ni Santiago. 3Ne zutun daan si Felipe, si Bartolomeo, si Tomas, si Mateo he iyan kes menunukut te vuhis wey si Santiago he anak ni Alpiyu. Duen daan si Tediyu, 4wey si Simon is sevaha he sakup te upakat he Kenenista wey si Hudas kes tigKeriyuti he iyan mibpalad ki Jesus diyà te menge Hudiyu.

Is Menge Telaan ni Jesus Duen te Menge Epustul

(Mateo 10:5-15; Marcos 6:7-13; Lucas 9:1-6)

5Impehipanew ni Jesus heini is sepulù wey zezuwa. Ke sikandin te, “Kenè kew hendiyà te menge inged te menge etew he kenà Hudiyu wey ziyà te menge inged te Semarya. 6Diyè kew zà penudtul te menge zuma tew he kevuwazan ni Israyil. Iring sikandan te menge kerehidu he nengetazin. 7Ipesavut niw kandan he meg̵aan en edhadì te menusiyà is Megbevayà. 8Bewii niw is egkengezeruwan, benhawa niw is ebpatey, bewii niw is menge it-iten wey is ebpenlelungen te mezaat he mulin-ulin. Sikan is nezawat niw he ziyà ebpuun te Megbevayà ne wazè din peveyazi keniyu, ne kenè niw zaan peveyazi zuen te edtevangan niw. 9Kenè kew med-uwit te vulawan wey selapì wey minsan menge sintabus. 10Kenè kew zaan med-uwit te sundang. Is ed-ilisan he sepatus wey kumbalà wey minsan tuked, ne kenè kew med-uwit. Su is sulug̵uen, ibeg̵ey ziyà te kandin is kinahanglan din.

11Ne emun ebpekeuma kew ziyà te inged he zekelà wey minsan deisek he inged, ne pen-ahaa niw is etew he egkesuat he edawat keniyu,” ke si Jesus. “Ne ziyè kew pemenahik te valey zin. Ne zutun kew zà uliulì taman te ked-awè niw zutun te inged. 12Ne emun ebpemenahik kew ziyà te sengevaley, ne penubtuvazi niw is ed-ubpà dutun te, ‘Tuvazi kew te Megbevayà,’ 13su wey metuvazi sikandan te Megbevayà emun edewaten kew zan. Ne emun kenè kew zan igalewg̵alew, maambe en, su kenà sikandan edleusan edtuvazi te Megbevayà. 14Ne ke zuen inged he wazà dutun egalewg̵alew keniyu, wey ke wazà ebpemineg te ibpesavut niw kandan, ewai niw sikandan wey tektaka niw is menge eliyavuk diyà te menge paa niw he tuus diyà te kandan he edsilutan sikandan te Megbevayà. 15Kenè niw lipati heini he lavew pa is idsilut te Megbevayà dutun te inged emun egkeuma keuzemà is andew te kedsilut, kenà te silut din dengan diyà te menge lalung he etew he meg̵inged diyà te inged he Suduma wey te inged he Gumura.

Is Egkehitavù he Pesipala

(Mateo 10:16-25; Marcos 13:9-13; Lucas 21:12-17)

16Pemineg kew; edsug̵uen ku en sikiyu ziyà te menge etew he kumekaid. Iyan, sikiyu, kenè kew mulà ebpekekaid. Iring kew te menge kerehidu ne sikandan iring te menge erimaung. Kinahanglan he med-andam kew, iyan, kenè kew mebpesipala te minsan hentei. 17Andam kew su edekepen kew zan, ne ed-uwiten kew zan diyà te hukmanan, ne ebug̵elen kew zan diyà te menge simbahan dan. 18Ebpeg̵esen kew zan he mekeetuvang te menge gubirnedur wey menge hadì tenged te kedtuu niw kedì wey niw ikewali is Meupiya he Tudtulanen diyà te kandan wey ziyà daan te menge etew he kenà menge Hudiyu. 19Ne emun ed-uwiten kew zan diyà te hukmanan, kenè niw ikeseeng ke hengkey is egkeg̵iyen niw wey ke hengkey is paag̵i te kegkag̵i niw, su wey niw en egketuenan ke ziyè kew en te etuvangan dan su zutun ibeg̵ey keniyu is hustu he egkeg̵iyen niw. 20Su is egkeg̵iyen niw zutun, ne kenà menge lalag he ebpuun te keniyu he isip, kekenà, diyà ebpuun te Wag̵as he Mulin-ulin he midsug̵ù te Amey tew he Megbevayà. Ne heini is Wag̵as he Mulin-ulin, iyan ebekà te menge vebè niw.

21Su zutun he timpu zuen menge etew he ibpehimetayan dan is menge suled dan. Ne zuen daan menge amey he ibpehimetayan dan is menge anak dan. Ne zuen menge etew he egkuntedahan dan wey ibpehimetayan dan is menge lukes dan. 22Egkuntedahan kew te langun tenged te sumusundan ku sikiyu. Iyan, sikan is edhamen te kedtuu zin kedì taman te ketepusan dutun te menge kemeresayan, ebeg̵ayan te untung he wazè din pidtemanan. 23Ne emun ebpesipelahan kew zan diyà te sengeinged, pelag̵uy kew pehendiyà te sevaha he inged. Ne venar is egkeg̵iyen ku keniyu he te kenè niw pa egkepasad is ebpeveelan ku keniyu ziyà te langun he menge inged te nasud he Israyil ne edlikù e en is Kakey te Menusiyà.

24Sikan is ebpepenurù, kenè din isipa he lavew sikandin he edtehuzen kenà te ebpenurù kandin. Ne iring din ded is sulug̵uen su kenà sikandin egketahud he lavew te egalen din. 25Umba, siak is egalen niw wey ebpenurù keniyu, kinahanglan he egkeiringan a keniyu. Su siak is egalen niw, emun egngezanan a te menge etew ki Endedaman, wey pe be kenà tuwas pa he mezaat is igngazan dan keniyu te menge sakup ku?

Is Ereg he Igkahandek te Etew

(Mateo 10:26-31; Lucas 12:2-7)

26Iyan, kenè kew mahandek te menge etew su is ulaula zan he edtembunan dan, ebpekelepew zed su is minsan hengkey he kenè dan egkeg̵iyen, ibpemeg̵awag̵awa. 27Is menge lalag ku he iyan kew zà nekezineg, ipenudtul niw ziyà te minsan hentei. Is idnaasnaas ku keniyu, isangyew niw ziyà te langun he menge etew. 28Kenè kew mahandek te menge etew zà duen su iyan dà egkepatey zan is lawa niw; ne kenè dan egkepatey is gimukud niw. Iyan ikehandek niw is Megbevayà su egkepatey zin is lawa wey minsan is gimukud niw pinaag̵i te Impirnu. 29Egkepemasa ta is dezuwa he zezeisey he tagbis te sengesintabus dà su utew minus is bali zan. Ne minsan pa zutun wazà minsan sevaha kandan he ebpatey ne egkeulug diyà te tanà emun kenà egkesuatan te Amey tew he Megbevayà. 30Iyan, sikiyu, edlavew pa is ked-elimahi zin keniyu su minsan is menge bulvul te ulu niw, mibilang din en. 31Umba kenè kew mahandek su lavew kew pa he mahal ziyà te kandin, kenà te utew mezakel he menge tagbis.

Is Ed-engkenen ni Jesus

(Mateo 10:32-33; Lucas 12:8,9)

32Sikan is egkag̵i ziyà te menge etew he iyan a egalen din, ed-engkenen ku zaan sikandin diyà te etuvangan te Amey ku he ziyà te langit. 33Iyan, sikan is egkag̵i ziyà te menge etew he kenà a iyan egalen din, kenè ku zaan sikandin ed-engkenen diyà te etuvangan te Amey ku he ziyà te langit.

Is Kesamuk

(Mateo 10:34-36; Lucas 12:49-53)

34Kenè niw isipa he midhendini a te kelibutan su wey wazè en kesamuk te menusiyà. Wazà a medhendini wey zuen kelinew su tenged te kedhendini ku ebpekunkuntedahà is menusiyà. 35Su tenged te kedhendini ku, egkuntedahan is maama te anak din he maama. Ne egkuntedahan is bahi te anak din he vahi. Ne egkuntedahan daan is bahi te ambey zin. 36Ne iyan egkekuntada te etew is menge megeget he kezuzumahi zin.

Is Hustu he Sumusundan ni Jesus

(Mateo 10:37-39; Lucas 14:26,27)

37Ke zuen etew he iyan mahal ziyà te g̵ehinawa zin is amey zin wey iney zin kenà siak, kenà dait sikandin he egngezanan he sumusundan ku. Ne ke iyan mahal ziyà te g̵ehinawa zin is anak din kenà siak, kenà daan sikandin dait he egngezanan he sumusundan ku. 38Minsan hentei he kenà edsundan kedì ne kenè din edtiangen is krus din, he ke và dà egkeg̵iya, kenè din edtumanen is menge sug̵ù ku su kela ke iyan ibpatey zin, kenà dait sikandin he egngezanan he sumusundan ku. 39Sikan is egkenug̵unan din is untung din dini te kelibutan, nasì egkeawà diyà te kandin is untung din. Iyan, sikan is edtumanen din is menge sug̵ù ku, minsan ke iyan ibpatey zin, ebeg̵ayan sikandin te untung he wazà din pidtemanan.

40Is etew he edawat keniyu, edawat daan kediey; ne is edawat kediey, edawat daan te Megbevayà he midsugù kedì. 41Ke zuen etew he edawat te ebpeneuven te Megbevayà tenged te Megbevayà is ebpenaub dutun te midawat din, ebpekeambit haazà is etew te suhul te Megbevayà dutun te ebpeneuven din. Ne ke zuen etew he edawat te metazeng he etew tenged te metazeng is ulaula zutun te etew, ebpekeambit sikandin te suhul te Megbevayà dutun te metazeng he etew. 42Ne kenè niw lipati he ke zuen etew he minsan sengetasa zà he wahig is ibpeinum din te minsan hentei he sumusundan ku, ne iyan ibpeinuma zin dutun is tenged te sumusundan ku haazà is ebpekeinum, ne kenà egkehimu he kenà sikandin edsuhulan te Megbevayà. Ne minsan ke utew minus is pid-etawan dutun te sumusundan he ibpeinum din, kenà egkehimu he kenà sikandin edsuhulan.”

Atualmente Selecionado:

Mateo 10: mbbNT

Destaque

Copiar