Mat 7

Kupingula ayanu

(Lk 6:37-38,41-42)

1“Osapingula, kuti musapinguliwe. 2Pakuti vamupingulila, namwe Mulungu akakupingulileni navo, nipo muyeso wamuseŵenzesha kupingula ayanu, Mulungu akawuseŵenzeshe kupingula mwewo. 3Uwonela vinji kaswaswa kali mu linso mwa muyako, koma ulingililakolini cimuti cili mu linso mwako? 4Ungamuwuzye tyani mkwanu kuti, ‘Mkwasu, panama nikufumye kaswaswa kali mu linso mwako,’ koma muli cimuti mu linso mwako? 5Wewo wolipazya, tatika wafumya cimuti mu linso mwako, pamene apo uzeuwone luweme na kuti ufumye kaswaswa mu linso mwa mkwanu.

6“Osapa imbwa vinthu vituŵa, nipo osapozela nkhumba vinthu vodula, pakuti zingakandepo nowelela kukucenekani.”

Sengani, sakilani, konkhoshani

(Lk 11:9-15)

7“Sengani, nipo azeakupeni. Sakilani, nipo mufwane. Konkhoshani, nipo azeakuvulilenkoni. 8Pala munthu aliyense osenga, niye opokela, osakila niye ofwana, nipo okonkhosha niye ovuliliwa. 9Ni ŵani mwa mwewo, mwana wake akamusenga mkate, omupa mwala? 10Keno angamusenge saŵi, yeve omupa njoka? 11Tetyo, keno mwewo noyipa kwanu uku, muziŵa kupa ŵana ŵanu vitwalo viweme, nanji Atata ali Kululu angalekelenji kupa cawanzi ciweme kwa ŵala oŵasenga? 12Tetyo, vamupangwa ŵanthu kukucitilani, acitileni namwe. Ivi niye vakusambizya Matetulo ŵa Mose na aneneli.”

Kamulyango katontho

(Lk 13:24)

13“Loŵelani pa kamulyango kopatikizya. Pakuti mulyango ni ukulu nipo ni wosatamanisha kuloŵa wotwala ku cicenekeko, na kuti oloŵelapo ni anyinji. 14Koma kamulyango kopatikizya kotwala ku moyo, nipo njila yake ni itontho nayotamanisha kuloŵa, na kuti oloŵa ni atontho.”

Cimuti na vitwalo vake

(Lk 6:43-44)

15“Cenjelani nawo aneneli ŵa wenye, akuza mu mawonekelo ŵa mbelele, koma mkati mwawo ni mimbulu yolusa. 16Mukoŵaziŵa na vitwalo vawo. Kansi cimuti ca minga cingatwale mphesa? Keno mitula ingatwale nkhuyu? 17Cimuti ciweme cutwala vitwalo viweme, koma cimuti ciyipa cutwala vitwalo viyipa. 18Cimuti ciweme cingatwalelini vitwalo viyipa, nipo cimuti cotwala viyipa cingatwalelini vitwalo viweme, yayi. 19Cimuti ciliconse cisatwala vitwalo viweme cutendewa nopozewa pa mulilo. 20Tetyo, mukoŵaziŵila na vitwalo vawo.”

Nsiku ya cipingulo

(Lk 13:25-27)

21“Ni aliyenselini olaŵila kuti, ‘Asikulu, Asikulu,’ watiakaloŵe mu Ufumu wa Kululu, koma ŵala ocita kupangwa kwa Atata ali Kululu. 22Pa nsiku ya cipingulo anyinji akaniwuzye kuti ‘Asikulu, Asikulu, kansi tiliyoŵilizye mu zina yanu, nofumya viŵanda mu zina yanu, nocita vokanganisha mu zina yanu?’ 23Koma nikaŵawuzye kuti, ‘Nenzokuziŵanilini. Fumamponi apa, ŵanthu ocita viyipa.’”

Ŵanthu aŵili omanga mangʼanda

(Lk 6:47-49)

24“Munthu aliyense akumvwa malizu ŵangu noŵacita, akaŵe ngani wa nzelu emanga ngʼanda yake pa mwala. 25Mvula yelokwa, manzi esefukila, vimphepo venyata ngʼanda, koma iliyopone pakuti yemangiwa maziko pa mwala. 26Koma aliyense okumvwa malizu ŵangu nosaŵacita, akaŵe ngani munthu omanga ngʼanda pa misece. 27Mvula yelokwa, manzi esefukila, vimphepo venyata ngʼanda, na kuti yepona – nipo kupona kwake kwenze kuyipa.”

Ulamulilo wa Yesu

28Yesu pecisilizya kulaŵila ivi, winji wekatiwa mtima ngako, 29cikomo cakuti enzosambizya ngani wala ali na ulamulilo, osati ngani Asambizyi ŵa Matetulo.

Atualmente Selecionado:

Mat 7: GMN

Destaque

Copiar