Mat 3

Uŵilizyi wa Yohane Mbatizi

(Mk 1:1-8; Lk 3:1-18; Yh 1:19-28)

1Peciwela Yohane Mbatizi ewela, enzoŵilizya mu cipululu ca ku Yudeya 2kuti, “Lekani viyipa vanu, pakuti Ufumu wa Kululu uli pafupi.” 3#Ysa 40:3 Uyu niye elaŵiliwa na Mneneli Yesaya kuti,

“Lizu ya oŵilikizya mu cipululu kuti,

‘Wamyani njila yakuti akapitemo Leza.

Lungamikani njila yakuti azepitemo.’”

4Yohane enzovwala vovwala va usako wa ngamila, nipo enzomangila bande wa cikumba mu luwunda. Cakulya cake cenze zombe na uci wa mu sanga. 5Ŵanthu ofumila mu Yelusalemu na ku Yudeya konse na citwa conse ca Yolodani enzokuya kwake, 6yeve enzoŵabatiza mu mmana wa Yolodani akawulula macimo ŵawo.

7Koma peciwona ŵanthu anyinji ŵa mu cipani ca Afalisi na ca Asaduki akuza kuti yeve aŵabatize, yeve elaŵila kuti, “Mwewo ŵana ŵa njoka, ni ŵani ekucenjezyani kuti muwutuke cilango ca Mulungu cikuza? 8Citani nchito zowonesha vitwalo vakuti mwayaluka cendi mtima. 9Nipo mu mtima mwanu musayezye kuti, ‘Awusu wasu ni Abulahamu.’ Nukuwuzyani vyendi kuti Mulungu otwesha kuyalusha myala ili apa kuti iŵe ŵana ŵa Abulahamu. 10Lomba teti katemo kali kale pa nsinde pa vimiti, tetyo cimuti ciliconse cosatwala vitwalo viweme, azeacitende nocipoza pa mulilo.

11“Newo nukubatizani na manzi kuti muyaluke mtima#3:11 kuti muyaluke mtima keno kuwonesha kuti mwayaluka mtima . Koma alipo akuza pa vuli pangu wa mphamvu wopula newo. Mwakuti newo nine wosawamila kutakula nkhwaŵilo zake. Yeve azekubatizeni na Mzimu Mtuŵa na mulilo. 12Jeko ili mu manja kuti awamyile posansila tiligu yake. Tetyo, azeatile tiligu yake iyake mu cimphaka koma vosalila azeavishoke mu mulilo wosazimyika.”

Kubatiziwa kwa Yesu

(Mk 1:9-11; Lk 3:21-22)

13Yesu ewela ku mmana wa Yolodani kufuma ku Galileya kuti abatiziwe na Yohane. 14Yohane eyezya kukana nolaŵila kuti, “Newo nupangwika kubatiziwa na mwewo, muwela soti kwa newo?”

15Koma Yesu emuyasuka kuti, “Cileke ciŵe tetyo. Ni ciweme kuti ticite teti kukwanisha cilungamo conse.”

16Yesu pecingobatiziwa, efuma mu manzi. Pamene apo Kululu kwemuvulikila, nipo ewona Mzimu wa Mulungu owoneka ngani nkhunda oseluka nonkhala pa yeve. 17Tetyo, kwimvwika malizu ofumila Kululu olaŵila kuti, “Uyu ni Mwana wangu wotemweka. Nusangalala naye ngako.”

Atualmente Selecionado:

Mat 3: GMN

Destaque

Copiar