Legic 16
16
Anutu niŋkinʒéŋ wammima ewa déŋ wamma keckec.
1(Dawidiac legic ʒéra.) Anutu, demiŋ menénna, ni néŋgacma guac muru hazua. 2Ni Yawe guac yomuhuc ʒézua; Gi imi nuac Miŋ Kewuna. Nuac ségiségina imi tosara qahac, néŋ gi sac kecʒaŋ.
3Baeciguc météré ic kecʒu imi mocʒoŋ eeginaguc. Nuac ségiségi imi mocʒoŋ ionac muru hezac. 4Anutu méŋac muru sese hai énécmianʒu ionac imi yéwéri toroqe énécmiyu emmac. Sac muluac sokoc ieneŋ hai énécmianʒu imi ni ménda haimaŋ. Waŋu imuac qara acguc ménda ʒéwa kua tasénaiguc emmac.
5Yawenéŋ nuac mératéc buŋa ʒéma sokocna kuaya qeqeya. Gi nuac buŋa héŋgaleŋ waŋanʒaŋ. 6Qaŋaŋ sililic hainénʒaŋ imi baec hiabia, méra téc nuaru imi hiabia téŋgéŋ.
7Ac pakeŋ waŋnéŋanʒac Yawe i simiŋ héimima ʒéhiaru mimaŋ. Siŋia séc nuac wéiwécnanéŋ ac pakeŋ waŋnéŋanʒac. 8Ni nalé séc Yawe wésénaiguc opocma aŋgétima kecanʒua. Waŋu inéŋ nuac méra héinaiguc keru ni keŋqe haqe qahac kecmaŋ. 9Imuac nuac ewa qerinanéŋ ségiségi waŋu nuac qeri uŋananéŋ#16:9 Hebiraio aciguc; edamuna. ségiségi waŋu nuac séwina acguc bénʒéŋ heanʒac.
10Miŋ Kewuac ic téréya ménda waina houmac. Imuac niŋac gi nuac kekec uŋana imi humuc ic ionac baec saŋgeŋaiguc ménda waina hemac. 11Geŋ imi kekecac héna nézéna hémmaŋ. Guac wéségaiguc imi ségiséginéŋ sécgéma hezac. Guac méra héigaiguc#16:11 Méra héiyaiguc; Imuac niŋgic kuhaguc ʒéma eeyaguc waŋec. imi ségiségi hémbénaŋanéŋ heanʒac.
Atualmente Selecionado:
Legic 16: KGF
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2012, Wycliffe Bible Translators, Inc. All rights reserved.