Matthieu 9

Koli so mbage ti tere ti lo abuba

(Marc 2.1-12; Luc 5.17-26)

1Jésus ako na ya ti ngo, lo fâ ngu si lo kiri na gbata ti lo. 2Ambeni zo amu mbeni koli so mbage ti tere ti lo abuba si aga na lo na Jésus. Koli ni ayeke lango na ndö ti kelekpa. Jésus abaa mabe ti azo ni si lo tene na koli so mbage ti tere ti lo abuba so, lo tene: “Kanga be ti mo, molenge ti mbi! A zi siokpari ti mo awe!” 3 Tongaso ambeni wafango-ndia atene na popo ti ala: “Koli so ayeke zonga Nzapa!” 4Jésus ahinga tënë ti be ti ala si lo hunda ala, lo tene: “Ngbanga ti nyen si be ti ala ayeke sioni tongaso? 5Titene zo atene: ‘A zi siokpari ti mo awe’, wala titene zo atene: ‘Londo, mo tambula’, so wa laa ayeke ngangu pepe?” 6Titene ala hinga so *Molenge ti Zo ayeke na ngangu ti zi siokpari ti azo na ndö ti sese so, Jésus atene na koli so mbage ti tere ti lo abuba so, atene: “Londo, mu kelekpa ti mo, mo gue na da ti mo!” 7Koli ni alondo si lo gue na da ti lo. 8So azo ni abaa ye so, mbeto asara ala. Ala gonda Nzapa ndali ti so lo mu ngangu na azo ti sara aye tongaso.

Jésus airi Matthieu

(Marc 2.13-17; Luc 5.27-32)

9So Jésus alondo na ndo so ti hon, lo baa mbeni koli so iri ti lo Matthieu; lo yeke duti na ndo so azo ayeke futa lapo daa. Jésus atene na lo: “Mu peko ti mbi!” Matthieu alondo si lo mu peko ti Jésus. 10Na ndembe so Jésus na adisiple ti lo ayeke te kobe na da ti Matthieu, gba ti azo ti rongo nginza ti lapo na ambeni zo ti siokpari aga; ala kue abongbi na Jésus na tere ti kobe ni. 11 So *afarizien abaa ye ni tongaso, ala tene na adisiple ti lo: “Ngbanga ti nyen si zo so ayeke fa ye na ala ayeke te kobe na azo ti rongo nginza ti lapo nga na azo ti siokpari so?” 12So Jésus ama tënë ti ala, lo tene na ala: “Azo so ayeke na nzoni tere ayeke na nzara ti gue na wanganga pepe, me azo so ayeke na kobela laa ayeke na nzara ti gue na wanganga. 13 Ala gue, agi ti hinga nda ti tënë so atene: ‘Mbi ye si zo abaa mawa ti amba ti lo, me mbi ke tënë ti *sandaga ti anyama.’ Mbi ga ti iri azo ti mbirimbiri pepe, me mbi ga ti iri azo ti siokpari.”

Tënë ti kengo kobe ti sambela

(Marc 2.18-22; Luc 5.33-39)

14Adisiple ti Jean-Baptiste aga nduru na tere ti Jésus si ala hunda lo, atene: “E na *afarizien, e yeke ke kobe ti sambela. Ngbanga ti nyen si adisiple ti mo ayeke ke kobe pepe so?” 15Jésus akiri tënë na ala: “Azo so a tisa ala na matanga ti mungo tere ti koli na wali, fade ala lingbi ti duti na vundu na ndembe so koli ni ade na popo ti ala? Oko pepe! Me ambeni lango ayeke ga so fade a yeke mu koli ni na popo ti ala, a hon na lo; na ngoi ni so laa fade ala yeke ke kobe.

16“Zo alingbi ti mu fini yanga ti bongo ti fu na le ti ka ti ngbene bongo pepe. Tongaso pepe, fade fini yanga ti bongo ni ayeke suru ngbene bongo ni si le ti ka ni aga kota ahon ndoni. 17Zo alingbi nga ti tuku fini vin na ya ti ngbene bozo ti poro pepe. Tongaso pepe, fade bozo ni ayeke sungba, vin ni atuku na sese si bozo ni abuba. Me ayeke nzoni ti tuku fini vin na ya ti fini bozo si fade aye ni use kue angba nzoni.”

Molenge ti mbeni makonzi ti azuife na wali so andu bongo ti Jésus

(Marc 5.21-43; Luc 8.40-56)

18So Jésus angba ti tene tënë so na ala, mbeni makonzi ti azuife aga nduru na tere ti lo; lo kuku na gbe ti Jésus si lo tene na lo: “Molenge ti mbi ti wali akui gi fafadeso. Mo ga, mo zia maboko ti mo na ndö ti lo si fade lo kiri na fini.” 19Tongaso, Jésus na adisiple ti lo alondo si ala mu peko ti koli so.

20Andaa mbeni wali ayeke daa, mene ayeke ga na tere ti lo mingi mingi, asara ngu baleoko na use awe. Lo ga nduru na Jésus na mbage ti peko si lo ndu yanga ti bongo ti Jésus. 21Wali so atene na be ti lo: “Tongana mbi ndu gi bongo ti lo, fade kobela ti mbi so ayeke kai.” 22Jésus abi le ti lo na peko, lo baa wali so si lo tene na lo: “Molenge ti mbi, de be ti mo! Mabe ti mo asoo mo awe.” Gi na ndembe ni so, kobela ti wali ni akai.

23So Jésus asi na da ti makonzi ni, lo baa azo ti hurungo *ngoli nga na azo so ayeke toto kuâ ni. 24Lo tene na ala: “Ala kue asigigi! Molenge-wali so akui pepe, me lo yeke lango langongo!” Azo ni kue ahe Jésus na ngia. 25So ala tumba azo ni kue na gigi awe, Jésus ali na ya ti da ni; lo gbu maboko ti molenge-wali ni si molenge-wali ni azingo. 26Tënë ti ye so amu ya ti sese ni kue.

Jésus asara si awaziba use abaa ndo

27So Jésus alondo na ndo so ti hon, awaziba use amu peko ti lo; ala yeke dekongo, atene: “Molenge ti David, baa mawa ti e!”

28So Jésus ali na ya ti da awe, awaziba so aga nduru na tere ti lo; lo hunda ala, lo tene: “Ala ma na be biani so mbi lingbi ti sara ye so?” Ala kiri tënë na lo: “*Kota Gbia, mo lingbi ti sara ni.” 29Tongaso Jésus andu le ti ala si lo tene: “Ayeke nzoni ye ni asi alingbi na mabe ti ala!” 30Gi na peko ti tënë so, le ti ala azi. Jésus agboto mê ti ala ngangu, lo tene: “Ala tene tënë ni na zo oko pepe!” 31Me so ala sigigi awe, ala to nda ti tene tënë ti Jésus na ya ti sese ni kue.

Jésus asara si mbeni buburu atene tënë

32Na ndembe so Jésus na adisiple ti lo asigigi ti hon, azo aga na mbeni koli na lo; lo yeke buburu, ngbanga ti so mbeni sioni yingo ayeke na ya ti lo. 33So Jésus atumba sioni yingo ni awe, buburu ni ato nda ti tene tënë. Be ti gba ti azo ni ado si ala tene: “Ade e baa mara ti ye tongaso na kodro ti Israel laoko pepe!” 34 Me *afarizien atene: “Makonzi ti asioni yingo laa ayeke mu na lo ngangu ti tumba ayingo so!”

Jésus abaa mawa ti azo

35 Jésus atambula na ya ti agbata kue, na akete kodro; lo fa ye na ya ti ada ti sambelango Nzapa ti azo ni, lo fa Nzoni Tënë ti *Kodro-gbia ti yayu, lo kai kobela na tere ti azo si ala so mbage ti tere ti ala abuba, lo sara si aga nzoni. 36 So lo baa gba ti azo so, mawa agbu be ti lo ndali ti so ngangu atia ala si be ti ala awoko kue; ala yeke tongana ataba so zo ti batango ala ayeke daa pepe. 37 Tongaso lo tene na adisiple ti lo: “Ala baa, kobe ti yaka ni ayeke mingi, me azo ti kua ni ayeke mingi pepe. 38Ayeke nzoni ala hunda na wa ti yaka ni titene lo tokua azo ti kua ti fâ ale ti kobe ti yaka ti lo ni.”

Atualmente Selecionado:

Matthieu 9: MNF2010

Destaque

Copiar