Matthieu 15

Sarango ye na lege ti ndia ti akotara

(Marc 7.1-13)

1 *Afarizien na awafango-ndia alondo na Jérusalem, aga na tere ti Jésus si ala hunda lo, atene: 2 “Ngbanga ti nyen si adisiple ti mo ake tënë ti ndia ti akotara so? Kozo titene ala te kobe, ala yeke sukula maboko ti ala pepe.” 3Jésus akiri tënë na ala, atene: “Ka ala, ngbanga ti nyen si ala ke yanga ti Nzapa ti sara gi ye ti akotara ti ala so? 4 Nzapa atene: ‘Mo ne babâ na mama ti mo.’ Lo kiri lo tene: ‘Zo so atene sioni tënë na tere ti babâ ti lo wala mama ti lo, lo lingbi na kuâ.’ 5Me ti ala, ala tene: ‘Zo so atene na babâ wala mama ti lo, atene: Mbi ye fade ti mu ye na mo ti sara nzoni na mo, me mbi zia ni nde ti mu na Nzapa, 6zo ni alingbi ti gbanzi mungo ye ni na babâ wala mama ti lo senge.’ Lege so laa ala yeke buba ya ti tënë ti Nzapa ti bata lege ti ndia ti akotara ti ala! 7Ala, azo so tënë ti yanga ti ala ayeke nde na sarango ye ti ala so! Ésaïe atene peko ti tënë ti yanga ti Nzapa na ndö ti ala na legeni, lo tene:

8 ‘Azo so ayeke ne mbi gi na yanga ti ala senge,

me be ti ala ayeke yongoro na mbi mingi.

9Vorongo so ala yeke voro mbi so,

ayeke gi senge senge,

ngbanga ti so ala yeke fa gi andia

so azo laa asigigi na ni.’ ”

Aye so asara si zo aga sioni

(Marc 7.14-23)

10Na pekoni, Jésus airi gba ti azo ni si lo tene na ala: “Ala ma mbi, ala ma ya ti tënë ti mbi nzoni: 11ye so ali na yanga ti zo laa ayeke sara titene zo ni aga *sioni pepe; me ye so alondo na yanga ti lo asigigi laa ayeke sara titene lo ga *sioni.” 12Tongaso, adisiple ti lo ague nduru na tere ti lo si ala tene na lo: “Mo hinga, mo tene, tënë so mo tene so aso be ti *afarizien mingi?” 13Jésus akiri tënë na ala: “Akeke so kue Babâ ti mbi so ayeke na yayu alu ni pepe, fade a yeke gboto ni. 14 Ala zia afarizien ni: ala yeke awaziba, ala ye ti fa lege na amba ti ala awaziba! Tongana waziba afa lege na mbeni mba ti lo waziba, fade ala use kue ayeke ti na ya ti du!” 15Pierre amu tënë si lo tene na Jésus: “Fa na e nda ti toli so.” 16Jésus ahunda ala, atene: “Ala nga, ala de ti hinga ndo pepe? 17Ala hinga kue atene, aye so kue ali na yanga ti zo, ague, asi na ya ti lo si na pekoni, ague na ya ti du. 18 Me ye so asigigi na yanga ti zo, alondo na be ti lo. So laa asara titene zo ni aga *sioni. 19Biani, aye tongana asioni tënë ti be ti zo, fango zo, gingo wali wala koli ti zo, sarango aye ti ndumba, nzi, tenengo mvene na le ti ngbanga na zongango ndo, alondo kue na be ti zo si asigigi. 20Aye so laa asara si zo aga *sioni. Me tengo kobe na maboko so a sukula ni pepe, so laa asara si zo aga *sioni pepe.”

Mabe ti mbeni wali ti kodro ti Kanaan

(Marc 7.24-30)

21Jésus alondo na ndo so, lo gue na sese ti Tir na ti Sidon. 22Mbeni wali ti kodro ti Kanaan aga si lo dekongo, lo tene: “*Kota Gbia, Molenge ti David, baa mawa ti mbi! Molenge ti mbi ti wali ayeke na sioni yingo na ya ti lo si asara lo pasi mingi.” 23Me Jésus akiri tënë oko na lo pepe. Adisiple ti lo aga nduru na tere ti lo si ala tene na lo: “Mo tumba lo, ngbanga ti so lo yeke dekongo si lo yeke mu gi peko ti e.” 24Jésus akiri tënë na ala: “Nzapa atokua mbi gi na azo ti Israel so ala yeke tongana ataba so agirisa.”

25Me wali ni aga, lo kuku na gbe ti Jésus si lo tene na lo: “Kota Gbia, mu maboko na mbi!” 26Jésus akiri tënë na wali ni, atene: “Ti mu kobe ti amolenge ti bi na akete mbo, so ayeke na legeni pepe.” 27Wali ni akiri tënë: “Taa-tënë, kota zo! Akete mbo ayeke te nga afuku ti kobe so ayeke ti na gbe ti meza ti awa ti ala.” 28Tongaso, Jésus akiri tënë na lo: “Wali, mabe ti mo ayeke kota! Ye so mo ye so, ayeke nzoni mo wara ni.” Gi na ndembe ni so, tere ti molenge ti lo ni aga nzoni.

Jésus akai kobela na tere ti azo mingi

29Jésus alondo na ndo so, lo gue na tere ti kota ngu ti Galile. Lo gue na li ti hoto, kâ, lo duti na sese. 30Gba ti azo aga na tere ti lo. Ala mu azo so gere ti ala abuba, awaziba, azo so mbage ti tere ti ala abuba, abuburu na azo ti kobela mingi aga na ala na lo. Ala zia ala na gbe ti Jésus si lo kai akobela ti ala. 31Li ti azo ni kue akpe, ngbanga ti so ala baa abuburu atene tënë, azo so mbage ti tere ti ala abuba, tere ti ala akiri aga nzoni, azo so gere ti ala abuba, ala yeke tambula, awaziba akiri abaa ndo. Tongaso ala gonda Nzapa ti Israel.

Jésus amu kobe na gba ti azo

(Marc 8.1-10)

32Jésus airi adisiple ti lo si lo tene na ala: “Mawa ti gba ti azo so agbu mbi, ngbanga ti so na ya ti alango ota so ala yeke na tere ti mbi, ala yeke na ye ti tengo ni pepe. Mbi ye ti zia ala titene ala gue na nzara na ya ti ala pepe, ngbanga ti ala woko na nzara na lege.” 33Adisiple ahunda lo, atene: “So e yeke na ya ti ngonda ge so, e yeke wara kobe na ndo wa ti mu na gba ti azo so kue titene ala te, ya ti ala asi?” 34Jésus ahunda ala, atene: “Ala yeke na mapa oke?” Ala kiri tënë na lo: “E yeke na mapa mbarambara na ambeni kete susu na tere ni.” 35Jésus amu yanga na gba ti azo ni ti duti na sese. 36Lo mu mapa mbarambara na asusu so, lo mu singila na Nzapa, lo fâ ya ni, lo mu na adisiple ti lo si ala kangbi ni na gba ti azo ni kue. 37Zo oko oko ate, ya ti lo asi. Na pekoni, adisiple ti lo aro tanga ti anduru ni asi sakpa mbarambara. 38Azo so kue ate kobe ni, wungo ti ala ayeke saki osio; a diko awali na amolenge daa pepe. 39Na pekoni, Jésus azia lege na gba ti azo ni ti kiri na ndo ti ala. Lo ko na ya ti ngo si lo gue na sese ti Magadan.

Atualmente Selecionado:

Matthieu 15: MNF2010

Destaque

Copiar