Tongo nda ti aye 8
8
1 Nzapa adabe ti lo na Noe, na anyama kue ti ngonda, na ala ti kodro so kue ayeke na tere ti lo na ya ti mangboko ni. Nzapa asara si mbeni pupu alondo, aya na ndö ti sese si ngu ni ato nda ti kiri. 2Lege ti angu ti gbe ti sese so ali mingi so akanga; fenetere ti yayu nga akanga. Ngu-Nzapa akai ti pikango ni. 3Ngu ni akiri yeke-yeke si azia sese ni. Na lango ngbangbo oko na baleoku ni si ngu ni ato nda ti kiri. 4Na lango baleoko na mbarambara ti nze mbarambara ni, mangboko ni ague, aduti na ndö ti hoto ti Arara. 5Ngu ni angba ti kiri na gbeni ngbii asi na nze baleoko ni. Na kozo lango ti nze baleoko ni, ali ti ahoto asigigi.
6Na peko ti lango baleosio, Noe azi fenetere so lo leke na tere ti mangboko ni. 7Lo mu *kpakpo, lo bi lo na gigi. Kpakpo ni ague, aga, ague, aga, ngbii ngu ni ahole na ndö ti sese ni. 8Na pekoni, lo mu *mbipa, lo bi lo na gigi titene lo gue, lo baa wala na ndö ti sese, ngu ni akiri na gbeni awe. 9Me mbipa ni ague, awara mbeni ndo ti luti daa pepe. Lo kiri na tere ti Noe na ya ti mangboko ni, ngbanga ti so ngu ni amu ndö ti sese kue. Noe ayoro maboko ti lo, lo mu mbipa ni si lo kiri na lo na ya ti mangboko ni. 10Lo kiri lo ku lango mbarambara, lo mu mbipa ni si lo bi lo na gigi. 11Na lakui, mbipa ni akiri na Noe. Mbeni kete fini maboko ti keke ti olive ayeke na yanga ti lo. Noe ahinga atene, na ndö ti sese, ngu ni akiri na gbeni awe. 12Lo kiri lo ku lango mbarambara, lo mu mbipa ni si lo bi lo na gigi. Mbipa ni ahon si lo kiri na tere ti Noe mbeni pepe.
13Na kozo lango ti kozo nze so Noe awara ngu ngbangbo omene na oko, ngu ni ahole na ndö ti sese awe. Noe azi li ti mangboko ni; lo baa ndo na gigi si lo baa so ndö ti sese ahole awe. 14Na lango baleuse na mbarambara ti use nze ni, sese ni ahole biani biani.
15Nzapa atene na Noe: 16 “Sigigi na ya ti mangboko ni, mo na wali ti mo, amolenge ti mo, na awali ti amolenge ti mo. 17Mo sigigi na amara ti nyama so kue ayeke na tere ti mo na ya ti mangboko ni, amara ti ndeke nde nde, anyama ti kodro, na anyama so kue ayeke hara harango na sese. Ayeke nzoni anyama ni awu amu ndö ti sese kue; ala du, ala wu mingi.” 18Noe asigigi, lo na amolenge ti lo, wali ti lo, na awali ti amolenge ti lo. 19Anyama kue, anyama so kue ayeke hara harango na sese, andeke kue na aye so kue ayeke tambula na sese, ala londo gi na lege ti amara ti ala si ala sigigi na ya ti mangboko ni.
20Noe aleke mbeni gbalaka ndali ti KOTA GBIA. Na popo ti anyama so kue ayeke *nzoni, na andeke so kue ayeke *nzoni, lo mu oko na ya ti mara oko oko ti mu na *sandaga so a yeke gbi ni kue na wâ na KOTA GBIA na ndö ti gbalaka ni. 21KOTA GBIA ama nzoni fion ti sandaga ni, anzere na lo si lo tene na be ti lo, lo tene: “Mbi yeke kiri ti deba sese ndali ti zo pepe. Biani, ti londo na ndembe so zo ade maseka, be ti lo aye ti sara gi ye ti sioni. Tongaso mbi yeke kiri ti buba aye so ayeke na fini so tongana ti so mbi sara so pepe.
22Na ndembe so sese ayeke ngba,
fade lungo le ti kobe wala kongo le ti kobe,
ndo-wâ na de,
ngoi ti ngu-Nzapa na buru,
bi na lâ
ayeke hunzi laoko pepe.”
Atualmente Selecionado:
Tongo nda ti aye 8: MNF2010
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© La Société Biblique de Centrafrique 2010
